«Зимистан» ториниң хитайдики мухбирлири тутқун қилинған

Мухбиримиз әркин
2018-12-28
Елхәт
Пикир
Share
Принт

Уйғур районидики лагерларниң ички әһвалиға даир нурғун син вә рәсимлик дәлилләрни тарқитип келиватқан «зимистан» ториниң хитайдики 40 тәк мухбириниң тутқун қилинғанлиқи илгири сүрүлди.

«Зимистан» ториниң 28‏-декабир хәвиридә ашкарилинишичә, бу йил 8‏-айдин бери мәзкур тор бетиниң 45 нәпәр мухбири ғайиб болған.

Хәвәрдә, уларниң хитай аманлиқ даирилири тәрипидин тутқун қилинғанлиқи илгири сүрүлгән. «Зимистан» тори хитайниң уйғур районидики йиғивелиш лагерлириниң орни, қурулуши, ички мәшғулати, қаидә-түзүми қатарлиқ җәһәтләрдики әһвалиға даир нурғун син вә рәсимлик дәлилләр билән тәминләп кәлгән иди.

«Зимистан» ториниң билдүрүшичә, уларниң уйғур районидики лагерлар һәққидә учур билән тәминләп келиватқан бир мухбири бу йил 9‏-айниң ахирлирида тутқун қилинған.

Бу мухбирниң һазир қәйәрдә тутуп турулуватқанлиқи мәлум әмәс икән. Мәзкур тор бетиниң бу мухбири тутқун қилинишниң алдида хитайниң ғулҗа шәһиригә қарашлиқ йеңийәр йезисидики бир йиғивелиш лагериниң қурулуши вә ички әһвалини син вә рәсимгә тартип, мәзкур торда елан қилған.

У йеңийәрдики мәзкур йиғивелиш лагериниң ичигә завут қуруватқанлиқи, лагердики тутқунларниң бу орунда мәҗбурий әмгәккә селинидиғанлиқини ашкарилиған. Униң хәвири хәлқарадики бәзи нопузлуқ таратқуларниң диққити лагерларда ишләпчиқириш сехлириниң қурулуп, тутқунларниң мәҗбурий әмгәккә селиниватқанлиқиға даир хәвәрләргә буралған мәзгилдә елан қилинған иди.

«Зимистан» ториниң билдүрүшичә, даириләр уларниң ичкири өлкиләрдә тутқун қилинған бәзи мухбирлирини қийин‏-қистаққа алған, бәзи мухбирлирини агаһландурғандин кейин қоюп бәргән.

Пикирләр (0)
Share
Толуқ бәт