"Zimistan" torining xitaydiki muxbirliri tutqun qilin'ghan

Muxbirimiz erkin
2018-12-28
Élxet
Pikir
Share
Print

Uyghur rayonidiki lagérlarning ichki ehwaligha da'ir nurghun sin we resimlik delillerni tarqitip kéliwatqan "Zimistan" torining xitaydiki 40 tek muxbirining tutqun qilin'ghanliqi ilgiri sürüldi.

"Zimistan" torining 28‏-dékabir xewiride ashkarilinishiche, bu yil 8‏-aydin béri mezkur tor bétining 45 neper muxbiri ghayib bolghan.

Xewerde, ularning xitay amanliq da'iriliri teripidin tutqun qilin'ghanliqi ilgiri sürülgen. "Zimistan" tori xitayning Uyghur rayonidiki yighiwélish lagérlirining orni, qurulushi, ichki meshghulati, qa'ide-tüzümi qatarliq jehetlerdiki ehwaligha da'ir nurghun sin we resimlik deliller bilen teminlep kelgen idi.

"Zimistan" torining bildürüshiche, ularning Uyghur rayonidiki lagérlar heqqide uchur bilen teminlep kéliwatqan bir muxbiri bu yil 9‏-ayning axirlirida tutqun qilin'ghan.

Bu muxbirning hazir qeyerde tutup turuluwatqanliqi melum emes iken. Mezkur tor bétining bu muxbiri tutqun qilinishning aldida xitayning ghulja shehirige qarashliq yéngiyer yézisidiki bir yighiwélish lagérining qurulushi we ichki ehwalini sin we resimge tartip, mezkur torda élan qilghan.

U yéngiyerdiki mezkur yighiwélish lagérining ichige zawut quruwatqanliqi, lagérdiki tutqunlarning bu orunda mejburiy emgekke sélinidighanliqini ashkarilighan. Uning xewiri xelq'aradiki bezi nopuzluq taratqularning diqqiti lagérlarda ishlepchiqirish séxlirining qurulup, tutqunlarning mejburiy emgekke séliniwatqanliqigha da'ir xewerlerge buralghan mezgilde élan qilin'ghan idi.

"Zimistan" torining bildürüshiche, da'iriler ularning ichkiri ölkilerde tutqun qilin'ghan bezi muxbirlirini qiyin‏-qistaqqa alghan, bezi muxbirlirini agahlandurghandin kéyin qoyup bergen.

Toluq bet