Хитай һөкүмитиниң уйғур районида зор санда оқутқучи қобул қилиши гуман қозғимақта

Мухбиримиз әзиз
2019-07-24
Елхәт
Пикир
Share
Принт

Уйғур дияридики лагерларниң тақилиши һәққидә миш-миш параңлар оттуриға чиқиватқанда хитай һөкүмитиниң һәрқайси җайларда көпләп оқутқучи қобул қилиш һәққидә елан чиқириши зор гуман қозғимақта.

«Ақсу һөкүмәт тори» ниң 23-июлдики хәвиридә ейтилишичә, 2019-йилиға қарита ақсу райони җәмийәттин оқутқучи қобул қилиш һәққидә тәпсилий елан чиқарған. Шуниң билән биргә йәсли вә башланғуч мәктәпләр үчүн қобул қилинидиған оқутқучилардин «вәтән, мән сени сөйимән», «бейҗиңни тйәнәнменни сөйимән», «өгинәйли лей фең үлгисини», «хәлқара балилар интернатсийонали» қатарлиқ нахшиларни ейтиш маһаритини көрситиш тәләп қилинған.

«Корла шәһәрлик һөкүмәт тори» ниң мунасивәтлик еланида 2019-йилиға қарита җәмийәттин штат сиртида 600 нәпәр оқутқучи қобул қилинидиғанлиқи, уларниң кәспий дипломлиридин башқа хитай тилида 2-B дәриҗисигә йәткән болуши тәләп қилинидиғанлиқи ейтилиду. Әмма бунчә көп сандики оқутқучиларниң қәйәрдә дәрс өтидиғанлиқи һәққидә һечнәрсә дейилмәйду.

Анализчилар бу һәқтә пикир қилип «бунчә көп санда оқутқучи қобул қилишниң өзи аталмиш ‹тәрбийәләш' кә қамалғанларға оқутқучи йетишмәйватқанлиқиниң бир ипадиси болуши мумкин» дәп көрсәтти. Шуниңдәк лагерға қамилидиған ата-аниларниң сани барғансери ешип маңғанлиқтин, шуниңға мунасип һалда көпийип маңған игә-чақисиз уйғур гөдәклирини хитайлаштуруш тәрбийәсиниң еһтияҗиму һазир наһайити зор санда оқутқучилар қошуниға моһтаҗ болуватқанлиқини тәкитлиди.

«Хитай хәвәрлири тори» ниң 24-июлдики хәвиридә ейтилишичә, хитай һөкүмити бу йилниң ахириғичә «ғәрб пилани» бойичә ғәрбий районға берип хизмәткә чүшидиған «хизмәтчи пидаийлар» ниң санини 20 миңға йәткүзидиғанлиқини билдүргән. Йеқиндин буян уйғур диярида бериливатқан мунасивәтлик хизмәт еланлирида пәвқуладдә юқири мааш, олтурақ өй тәминати, йиллиқ мукапат соммиси қатарлиқлар алаһидә тәкитлиниватқан болуп, ичкиридики хитай оқуғучиларни җәлп қилиш васитиси болуп кәлгән иди.

Пикирләр (0)
Share
Толуқ бәт