Xitay hökümitining Uyghur rayonida zor sanda oqutquchi qobul qilishi guman qozghimaqta

Muxbirimiz eziz
2019-07-24
Élxet
Pikir
Share
Print

Uyghur diyaridiki lagérlarning taqilishi heqqide mish-mish paranglar otturigha chiqiwatqanda xitay hökümitining herqaysi jaylarda köplep oqutquchi qobul qilish heqqide élan chiqirishi zor guman qozghimaqta.

"Aqsu hökümet tori" ning 23-iyuldiki xewiride éytilishiche, 2019-yiligha qarita aqsu rayoni jem'iyettin oqutquchi qobul qilish heqqide tepsiliy élan chiqarghan. Shuning bilen birge yesli we bashlan'ghuch mektepler üchün qobul qilinidighan oqutquchilardin "Weten, men séni söyimen", "Béyjingni tyen'enménni söyimen", "Ögineyli léy féng ülgisini", "Xelq'ara balilar intérnatsiyonali" qatarliq naxshilarni éytish maharitini körsitish telep qilin'ghan.

"Korla sheherlik hökümet tori" ning munasiwetlik élanida 2019-yiligha qarita jem'iyettin shtat sirtida 600 neper oqutquchi qobul qilinidighanliqi, ularning kespiy diplomliridin bashqa xitay tilida 2-B derijisige yetken bolushi telep qilinidighanliqi éytilidu. Emma bunche köp sandiki oqutquchilarning qeyerde ders ötidighanliqi heqqide héchnerse déyilmeydu.

Analizchilar bu heqte pikir qilip "Bunche köp sanda oqutquchi qobul qilishning özi atalmish 'terbiyelesh' ke qamalghanlargha oqutquchi yétishmeywatqanliqining bir ipadisi bolushi mumkin" dep körsetti. Shuningdek lagérgha qamilidighan ata-anilarning sani barghanséri éship mangghanliqtin, shuninggha munasip halda köpiyip mangghan ige-chaqisiz Uyghur gödeklirini xitaylashturush terbiyesining éhtiyajimu hazir nahayiti zor sanda oqutquchilar qoshunigha mohtaj boluwatqanliqini tekitlidi.

"Xitay xewerliri tori" ning 24-iyuldiki xewiride éytilishiche, xitay hökümiti bu yilning axirighiche "Gherb pilani" boyiche gherbiy rayon'gha bérip xizmetke chüshidighan "Xizmetchi pida'iylar" ning sanini 20 minggha yetküzidighanliqini bildürgen. Yéqindin buyan Uyghur diyarida bériliwatqan munasiwetlik xizmet élanlirida pewqul'adde yuqiri ma'ash, olturaq öy teminati, yilliq mukapat sommisi qatarliqlar alahide tekitliniwatqan bolup, ichkiridiki xitay oqughuchilarni jelp qilish wasitisi bolup kelgen idi.

Toluq bet