Uyghur élidin 2500 yil burunqi zoro'astir qebristanliqi tépildi

Muxbirimiz erkin
2013-08-16
Élxet
Pikir
Share
Print


Xitay ijtima'iy penler akadémiyisining arxé'ologlar Uyghur élining tashqorghan nahiyisidin 2500 yil burunqi dewrge a'it zoro'astir "Ateshpereslik" qebristanliqini tapqan.

Arxé'ologlar karbon - 14 tejribixanisida tekshürüp, 3050 métir égizliktin tépilghan mezkur qebristanliqning buningdin 2500 yil burun yasalghanliqini otturigha qoyghan.

Zoro'astir diniy otqa choqunidighan qedimki iran diniy bolsimu, biraq mezkur din'gha a'it qedimiy izlar ottura asiyada keng uchraydu.

Shinxu'a agéntliqining xitay arxé'ologliridin neqil keltürüp xewer qilishiche, qebristanliqtiki munber nur chéchip turghan kün'ge oxshitilip aq we qara tashtin yasalghan. Qara tash zoro'astir dinidiki qarangghuluq yaki yamanliqqa, aq tash yoruqluq yaki yaxshiliqqa wekillik qilidiken.

Arxé'ologlar yene, qebristanliqtin di'amétiri 30 santimétirliq yaghach isriqdan tapqan.

Arxé'ologlarning ilgiri sürüshiche, qebristanliqning qurulushi we uningdin tépilghan buyumlar zoro'astir dinining asasliq alahidiliklirini eks ettüridiken.

Qebristanliqtin yene, méssopatamiyedin kelgen kehriwa, yung toqulma, yipek kiyimler tépilghan. Mezkur buyumlarning bir qismi irandin kelgen, yene bir qismi ottura asiyaning yerlik buyumliri bolup, bu Uyghur élining qedimki méssopatamiye we iran bilen bolghan qoyuq medeniyet alaqisini chüshendürüp béridiken.

Toluq bet