Карханичи абдувәли абдусәмәт сичүәнликләргә 100 миң йүән ианә қилипму сиясий тарихидики «қара чекит» ни йоқиталмиған

Мухбиримиз шөһрәт һошур
2019-11-07
Елхәт
Пикир
Share
Принт
«Қизил төгә бийо-техника ширкити» ниң баш директори абдувәли абдусәмәтниң «шинҗаң яшлири» журнилиниң 2011-йиллиқ 5-саниниң муқависидики сүрити.
«Қизил төгә бийо-техника ширкити» ниң баш директори абдувәли абдусәмәтниң «шинҗаң яшлири» журнилиниң 2011-йиллиқ 5-саниниң муқависидики сүрити.
Social Media

Мәлум болушичә, «қизил төгә бийо-техника ширкити» ниң баш директори абдувәли абдусәмәт 2008‏-йили сичүәндә йәр тәврәш апити йүз бәргәндә апәткә учриған сичүәнликләргә 120 миң йүән ианә қилған. Әмма 2017-йили лагерға тутқун башланғанда униң бу һиммити нәзәргә елинмиған. Әксичә униң 1990‏-йиллардики 3 йиллиқ сиясий мәһбуслуқ һаяти әстә тутулуп, сабиқ мәһбуслар қатарида әң башта тутқун қилинған.

Һөрмәтлик радийо аңлиғучилар, «шинҗаң яшлири» жорнилиниң 2011‏-йиллиқ 5-‏санида абдувәли абдусәмәт тонуштурулған. «Йол мундақму ечилиду» мавзулуқ бу хәвәрдә тонуштурулишичә, 1974‏-йили қәшқәр йеңишәһәрниң япчан йезисидики чәт бир кәнтидә туғулуп чоң болған абдувәли абдусәмәт балилиқ мәзгиллиридә һойлисидики бағниң мевилирини йол бойиға елип чиқип сетиш билән тиҗарәт сепигә атланған. Униңдин кейин юрти япчанниң мивисини қәшқәргә, қәшқәрниң мевисини үрүмчигә йөткәп гүлиқақ содигиригә айланған. У 1990‏-йилларниң ахири қәшқәрдә «истанбул талла базири» ни ечип, тиҗаритини гүлқақчилиқтин йимәк-ичмәк содисиға кеңәйткән. 2003‏-Йилға кәлгәндә үрүмчидә «шинҗаң қизил төгә бйо-техника чәклик ширкити» ни қуруп, тиҗаритини йимәк-ичмәк сетиштин ишләпчиқиришқа кеңәйткән вә ақсуниң тоқсу наһийәсидә 100 мо, йәни 60000 кувадират метир йәр селиветип, ширкәтниң завутини бәрпа қилған. 

Тор архиплиридин мәлум болишичә, мәзкур ширкәт 2013 ‏-йили «чимбулақ» тор бектидә ширкәт қурулғанлиқиниң 10 йиллиқини хатирилгән. 
«Шинҗаң яшлири» жорнилида тонуштурулишичә, мәзкур ширкәтниң тоқсу наһийәсидики завути ишқа киришкәндин кейин, әң дәсләп «кәвсәр» маркисида кола ишләпчиқарған. Андин «қизил төгә», «ява төгә», «юртум», «күчлән» қатарлиқ даңлиқ маркиларда йүз хилға йеқин мәһсулат ишләпчиқарған. Көпинчиси алий мәлуматлиқ 100 гә йеқин хадими болған бу ширкәт 2006‏-йили 6‏-айда җоңгу ислам җәмийити тәрипидин «җоңгудики мусулманчә йемәклик ишләпчиқиридиған 28 карханиниң бири» дегән намға, шу йили 7‏-айда хитайдики мәмликәтлик ишәнчилик карханичилар җәмийити тәрипидин «җоңгуниң а-дәриҗилик ишәнчлик караханси» дегән намға еришкән. 2007‏-Йили 9‏-айда хәлқара йешил мәһсулат тәрәққиятини илгири сүрүш җәмийитигә әза болған. 

Мәзкур хатириләш мурасимидә сөз қилған абдувәли абдусәмәт ширкәт бу пәллиггә кәлгичә көплигән даванларни бесип өткәнликини тилға алған, әмма бу даванлар һәққидә тәпсилий тохталмиған. Вәзийәттин хәвәрдар кишиниң баян қилишичә, абдувәли абдусәмәт қәшқәрдә тонулған диний зат - сидиқ хәлпитим җәмәтидин болуп, у 1993‏-йили вә 1997‏-йиллири икки қетим 17 ай вә 3 йиллиқтин кесилгән вә җаза муддитини толуқ өтигән. У өзиниң сода тиҗаритини мана мушу даванларни һалқип, бир нуқтилиқ аилә баштин кәчүридиған барлиқ тәкшүрүшләрдин өтүп давам қилған. 

Абдувәли абдусәмәт «чимбулақ» торидики мәзкур хатириләш мурасимида бу ширкәтниң йүз йиллиқиниңму хатирилинишини арзу қилидиғанлиқини билдүргән. Мана мушу арзусиниң түрткисидин болса керәк, у хәйр-сахвәт ишлирида һөкүмәтниң чақириқлириғиму актип аваз қошқан. «Шинҗаң яшлири» журнилидики мәзкур мақалида дейилишичә, абдувәли абдусәмәт 2008 ‏-йили йәр тәврәш апитигә учриған сичүәнликләргә 120 миң йүән ярдәм қилған. Әмма уйғур районида 2017‏-йили лагерға адәм топлашта у әң баштики қатарда тутқун қилинған. Даириләр униң сичүәнгә қилған ярдиминиму нәзәргиму алмиған. Пәқәт униң сиясий мәһбуслуқ һаятини әстә тутуп, уни сабиқ мәһбуслар қатарида тутқун қилған. Вәзийәттин хәвәрдар кишиниң баян қилишичә, ‏2017‏-йилидики тутулушида намәлум сәвәп билән 3 айдин кейин қоюп берилгән абдувәли абдусәмәт 2018‏-йили 2‏-айда «диний әсәбийликкә риғбәтләндүрүш» әйиблмиси билән тутқун қилинип, из-дерәксиз ғайип болған.

Пикирләр (0)
Share
Толуқ бәт