Karxanichi abduweli abdusemet sichüenliklerge 100 ming yüen i'ane qilipmu siyasiy tarixidiki "Qara chékit" ni yoqitalmighan

Muxbirimiz shöhret hoshur
2019-11-07
Élxet
Pikir
Share
Print
"Qizil töge biyo-téxnika shirkiti" ning bash diréktori abduweli abdusemetning "Shinjang yashliri" zhurnilining 2011-yilliq 5-sanining muqawisidiki süriti.
"Qizil töge biyo-téxnika shirkiti" ning bash diréktori abduweli abdusemetning "Shinjang yashliri" zhurnilining 2011-yilliq 5-sanining muqawisidiki süriti.
Social Media

Melum bolushiche, "Qizil töge biyo-téxnika shirkiti" ning bash diréktori abduweli abdusemet 2008‏-yili sichüende yer tewresh apiti yüz bergende apetke uchrighan sichüenliklerge 120 ming yüen i'ane qilghan. Emma 2017-yili lagérgha tutqun bashlan'ghanda uning bu himmiti nezerge élinmighan. Eksiche uning 1990‏-yillardiki 3 yilliq siyasiy mehbusluq hayati este tutulup, sabiq mehbuslar qatarida eng bashta tutqun qilin'ghan.

Hörmetlik radiyo anglighuchilar, "Shinjang yashliri" zhornilining 2011‏-yilliq 5-‏sanida abduweli abdusemet tonushturulghan. "Yol mundaqmu échilidu" mawzuluq bu xewerde tonushturulishiche, 1974‏-yili qeshqer yéngisheherning yapchan yézisidiki chet bir kentide tughulup chong bolghan abduweli abdusemet baliliq mezgilliride hoylisidiki baghning méwilirini yol boyigha élip chiqip sétish bilen tijaret sépige atlan'ghan. Uningdin kéyin yurti yapchanning miwisini qeshqerge, qeshqerning méwisini ürümchige yötkep güliqaq sodigirige aylan'ghan. U 1990‏-yillarning axiri qeshqerde "Istanbul talla baziri" ni échip, tijaritini gülqaqchiliqtin yimek-ichmek sodisigha kéngeytken. 2003‏-Yilgha kelgende ürümchide "Shinjang qizil töge byo-téxnika cheklik shirkiti" ni qurup, tijaritini yimek-ichmek sétishtin ishlepchiqirishqa kéngeytken we aqsuning toqsu nahiyeside 100 mo, yeni 60000 kuwadirat métir yer séliwétip, shirketning zawutini berpa qilghan. 

Tor arxipliridin melum bolishiche, mezkur shirket 2013 ‏-yili "Chimbulaq" tor béktide shirket qurulghanliqining 10 yilliqini xatirilgen. 
"Shinjang yashliri" zhornilida tonushturulishiche, mezkur shirketning toqsu nahiyesidiki zawuti ishqa kirishkendin kéyin, eng deslep "Kewser" markisida kola ishlepchiqarghan. Andin "Qizil töge", "Yawa töge", "Yurtum", "Küchlen" qatarliq dangliq markilarda yüz xilgha yéqin mehsulat ishlepchiqarghan. Köpinchisi aliy melumatliq 100 ge yéqin xadimi bolghan bu shirket 2006‏-yili 6‏-ayda jonggu islam jem'iyiti teripidin "Jonggudiki musulmanche yémeklik ishlepchiqiridighan 28 karxanining biri" dégen namgha, shu yili 7‏-ayda xitaydiki memliketlik ishenchilik karxanichilar jem'iyiti teripidin "Jongguning a-derijilik ishenchlik karaxansi" dégen namgha érishken. 2007‏-Yili 9‏-ayda xelq'ara yéshil mehsulat tereqqiyatini ilgiri sürüsh jem'iyitige eza bolghan. 

Mezkur xatirilesh murasimide söz qilghan abduweli abdusemet shirket bu pelligge kelgiche köpligen dawanlarni bésip ötkenlikini tilgha alghan, emma bu dawanlar heqqide tepsiliy toxtalmighan. Weziyettin xewerdar kishining bayan qilishiche, abduweli abdusemet qeshqerde tonulghan diniy zat - sidiq xelpitim jemetidin bolup, u 1993‏-yili we 1997‏-yilliri ikki qétim 17 ay we 3 yilliqtin késilgen we jaza mudditini toluq ötigen. U özining soda tijaritini mana mushu dawanlarni halqip, bir nuqtiliq a'ile bashtin kechüridighan barliq tekshürüshlerdin ötüp dawam qilghan. 

Abduweli abdusemet "Chimbulaq" toridiki mezkur xatirilesh murasimida bu shirketning yüz yilliqiningmu xatirilinishini arzu qilidighanliqini bildürgen. Mana mushu arzusining türtkisidin bolsa kérek, u xeyr-saxwet ishlirida hökümetning chaqiriqlirighimu aktip awaz qoshqan. "Shinjang yashliri" zhurnilidiki mezkur maqalida déyilishiche, abduweli abdusemet 2008 ‏-yili yer tewresh apitige uchrighan sichüenliklerge 120 ming yüen yardem qilghan. Emma Uyghur rayonida 2017‏-yili lagérgha adem toplashta u eng bashtiki qatarda tutqun qilin'ghan. Da'iriler uning sichüen'ge qilghan yardiminimu nezergimu almighan. Peqet uning siyasiy mehbusluq hayatini este tutup, uni sabiq mehbuslar qatarida tutqun qilghan. Weziyettin xewerdar kishining bayan qilishiche, ‏2017‏-yilidiki tutulushida namelum sewep bilen 3 aydin kéyin qoyup bérilgen abduweli abdusemet 2018‏-yili 2‏-ayda "Diniy esebiylikke righbetlendürüsh" eyiblmisi bilen tutqun qilinip, iz-déreksiz ghayip bolghan.

Toluq bet