Amérika tashqi ishlar ministiri: xitayning tetür teshwiqatigha yol qoyushqa bolmaydu

Muxbirimiz jüme
2020-03-22
Élxet
Pikir
Share
Print
Amérika tashqi ishlar ministiri mayk pompéyo "2019-Yilliq kishilik hoquq doklati" ning élan qilinish munasiwiti bilen söz qildi. 2020-Yili 11-mart, washin'gton.
Amérika tashqi ishlar ministiri mayk pompéyo "2019-Yilliq kishilik hoquq doklati" ning élan qilinish munasiwiti bilen söz qildi. 2020-Yili 11-mart, washin'gton.
Photo: RFA

Amérika tashqi ishlar ministiri mayk pompéyo 20-mart bayanat élan qilip, xitay qatarliq döletlerning "Wuxen wirusi" seweblik amérikigha qarshi tetür teshwiqat herikiti élip bériwatqanliqini, emma buninggha yol qoyushqa bolmaydighanliqini bildürdi.

U mundaq dédi: "Tetür teshwiqat dunya miqyasidiki bezi shexslerdinla emes, belki xitay kommunist partiyesi, rusiye we iran hökümetliridinmu kéliwatidu. Biz démokratiyemiz, erkinlikimiz we'wuxen wirusi'gha qayturghan inkaslirimizning ulini kolaydighan bundaq heriketlerge hergiz yol qoymasliqimiz kérek." 

U yene amérika xelqning mezkur wirusqa taqabil turush üchün heriketke ötkenlikini, shunga amérikaning mezkur tirishchanliqlirini yoqqa chiqiridighan bu xil heriketlerge yol qoyushqa bolmaydighanliqini éytti.

Shu esnada yene, amérikaning yuqiri qatlam erbabliri arisida xitayni eyiblesh pikirliri üzlüksiz körülüp turdi.

Prézidént tramp 21-mart kechqurun yollighan twittér uchurida, tajsiman korona wirusini "Xitay wirusi" dep atidi. 

Amérikining kéngesh palatasi ezasi tom kotton 22-mart etigen yollighan twittér uchurida, xitay kompartiyesidin choqum hésab élinidighanliqini ima qildi. 

U mundaq dédi: "Xitay kompartiyesining yalghanliri we chirikliki bir yerlik sehiye mesilisini dunyawi wabagha aylandurdi. Bu dölitimizdimu hayat we arzu-armanlarni weyran qilmaqta. Buning hésabi élinidu." 

Xitay hökümiti yéqindin buyan amérikaning korona wirusining aldini élish tedbirlirini eyibleydighan we wirus menbesini amérikagha dönggeydighan teshwiqatlarni kücheytken idi.

Toluq bet