Turpanda saqchi a'ile-tawabi'ati bahargül hebibullaning késiwétilgenliki delillendi

Muxbirimiz shöhret hoshur
2020-04-23
Élxet
Pikir
Share
Print
80 Yashliq sabiq saqchi bashliqi hebibulla abdullaning qizi bahargül hebibulla éri bilen. 2016-Yili turpan.
80 Yashliq sabiq saqchi bashliqi hebibulla abdullaning qizi bahargül hebibulla éri bilen. 2016-Yili turpan.
Melikizat teminligen

Yéqinqi mezgillerde ijtima'iy axbaratlarda, turpanda 80 yashliq sabiq saqchi bashliqi hebibulla abdulla we uning saqchi saheside xizmet qiliwatqan perzentliridin bolup a'ilisidin jem'iy 7 kishining tutqunda ikenliki xewer qilin'ghanidi. Emma bu uchur da'iriler teripidin téxi delillenmigen idi. 23-Aprél küni muxbirimizning téléfonini qobul qilghan aptonom rayonluq yuqiri sotning bir xadimi, mezkur a'ilidiki tutqunlardin bahargül hebibullaning késiwétilgenliki we uning bu hökümge naraziliq bildürgenlikini ashkarilidi.

Mezkur a'ilining türkiyede yashawatqan ezasi melikizat hebibullaning guwahliq bayanatliridin melum bolushiche, sabiq saqchixana bashliqi, 80 yashliq hebibulla abdulla, turpanning chatqal yéziliq saqchixanisida 30 yilche xizmet qilghandin kéyin 1997 ‏-yili dem élishqa chiqqan. U 2017 ‏-yili, 4 ‏-ayda 75 yashliq ayali bümeryem tursun bilen birlikte namelum xataliqi seweblik "Terbiyelesh" merkizige ekétilgen. Arqidin ularning türme we saqchixanilarda ishlewatqan perzentliri alim hebibulla we méhray hebibulla؛ arqidin mektep we shirketlerde ishlewatqan perzentliri aygül hebibulla, memet hebibulla we bahargül hebibullarmu tutup kétilgen.

Saqchi saheside uzun we aktip ishligen, hetta mukapatlargha érishken bu a'ile ezalirining ehwali heqqide ilgiri köp qétimlap éniqlash élip barghan bolsaqmu, da'iriler bu heqte melum bérishni ret qilip kelgen. 22-Aprél küni turpan'gha qarita élip barghan téléfon ziyaretlirimiz dawamida, bu saqchi a'ile tawabi'atlirining ehwali heqqide yene bir qétim melumat sürüshte qilduq.

Saqchi sahesidiki köpinche xadimlar, bu heqte melumat bérishtin yenila özini tartti. Biz turpan sheherlik j x idarisidiki melum bir xadimdin özining bölüm bashliqini sorighinimizda, u mezkur bashliqning aptonom rayonluq yuqiri sottin kelgen xizmet guruppisi bilen meshghul ikenlikini éytti. U yene so'alimizgha jawaben, bu guruppining mehkum bahargül hebibullaning délosigha qaytidin qarap chiqiwatqanliqini eskertti. Biz bu xadim teminligen téléfon nomuri boyiche, yuqiri sottin kelgen xadim bilen alaqileshtuq. Bu xadim bahargül hebibullaning délosi heqqide tepsiliy melumat bermigen bolsimu, özining turpan'gha bu délo seweblik kelgenlikini inkar qilmidi. Biz uningdin bahargül hebibullaning délosining qaysi basquchqa kelgenlikini sorighinimizda, bu heqte rehbiriy xadimlar bilen sözlishishimizni tewsiye qilish arqiliq, uning délosining téxi xulasisi chiqmighanliqini isharetlidi. Bu xadim téléfonimizni qoyuwetkendin kéyin, biz mezkur saqchi a'ilisi heqqide ijtima'iy taratqularda izchil guwahliq bérip kéliwatqan melikizat hebibulla xanimni ziyaret qilduq. Melikizatning, tutqundiki a'ile ezaliri heqqide igiligen eng yéqinqi uchurlirigha asasen bayan qilishiche, uning dadisi, anisi we chong hedisi lagérda bir yérim yil etrapida yatqandin kéyin qoyup bérilgen. Emma akisi-türme xadimi alim hebibulla bilen saqchi hedisi méhray hebibulla we akisi memet hebibulla 3 yilliqtin késilgen؛ bir straxiwaniye shirkitide ishleydighan kichik hedisi bahargül hebibulla besh yilliq késiwétilgen.

Téléfonimiz qayta baghlan'ghan mezkur yuqiri sot xadimi, bahargül hebibullaning késiwétilgenliki we hökümge naraziliq bildürgenliki, shunga özlirining turpan'gha bahargül bilen söhbet ötküzgini kelgenlikini ashkarilidi.

Melikizat hazirgha qeder bu tutqundiki qérindashlirining nede ikenliki, yeni qamaqxana yaki lagérda ikenliki heqqide uchur alalmay kéliwatqanidi. Mezkur xadim, bahargül hebibulla bilen ékranda sözleshkenlikini bayan qilish arqiliq uning téxiche qamaqxana yaki lagérda ikenlikini ashkarilidi.

Ilgiriki igileshlirimizdin melum bolushiche, lagérdiki tutqunlarning köplüki seweblik, mutleq köp sandiki tutqunlar, sot organlirining qarari bilen emes, siyasiy qanun ishxanilirining muzakiriliri bilen bir terep qilinmaqta. Sotsiz chiqirilghan bu hökümler, mehkum a'ililirige xizmet guruppiliri arqiliq yetküzülmekte.

Biz mezkur xadimdin bahargül hebibulla üstidin sotning qayta qachan échilidighanliqini sorighinimizda, buning peqet "Muzakire qilinish" éhtimalliqi barliqini éytti.

Mana bu jawab, bahargül hebibullaning teqdirining Uyghur rayonidiki milyonlarche tutqun'gha oxshashla siyasiy qarar we muzakire bilen bir terep qilinidighanliqidin bésharet bermekte.

Bu uchurlardin yene, köp sandiki mehkumlardin perqliq halda, bahargül hebibullaning naraziliqining diqqet étibargha élin'ghanliqi melum. Emma buninggha seweb bolghan amilning uning saqchi a'ile tawabi'ati bolushtek a'ile arqa körünüshi ikenliki we yaki türkiyediki singlisi melikizat hebibullaning guwahliq bayanatlirining türtke bolghanliqi melum emes.

Bu yil 38 yashqa kirgen bahargül hebibulla 4 we 9 yashliq ikki balining anisidur.

Hörmetlik radi'o anglighuchilar, yuqirida 30 yilliq saqchi bashliqi hebibulla abdullaning tutqundiki 4 perzentidin bahargül hebibullaning késilgenliki we bahargülning bu hökümge qarita naraziliqigha qayta qariliwatqanliqi heqqide anglitish berduq.

Toluq bet