Шиветсийәдә уйғурлар, тибәтләр вә хоңкоңлуқлар бирләшмә намайиш өткүзди

Ихтиярий мухбиримиз әкрәм
2019-11-25
Елхәт
Пикир
Share
Принт
Шиветсийәдә өткүзүлгән уйғурлар, тибәтләр вә хоңкоңлуқларниң бирләшмә намайишидин көрүнүш. 2019-Йили 24-ноябир, ситокһолм.
Шиветсийәдә өткүзүлгән уйғурлар, тибәтләр вә хоңкоңлуқларниң бирләшмә намайишидин көрүнүш. 2019-Йили 24-ноябир, ситокһолм.
RFA/Ekrem

24-Ноябир күни уйғурлар, тибәтләр, хоңкоңлуқлар шиветсийә пайтәхти ситокһолм шәһиридә хитайға қарши бирләшмә намайиш өткүзди.

Мәркизи ситокһолмдики «шиветсийә уйғур маарип уюшмиси» ниң мәсуллиридин абдулла көкяр әпәндиниң бәргән мәлуматлириға асасланғанда, 24-ноябир күни шиветсийәдә яшаватқан уйғурлар, тибәтләр, хоңкоңлуқлар вә кишилик һоқуқ тәшкилатлири бирлишип, ситокһолм шәһәр мәркизидә хитайға қарши бирләшмә намайиш елип барған.

Абдулла әпәндиниң билдүрүшичә, бу қетимқи бирләшмә намайишниң мәқсити дуня җамаитиниң нәзирини шәрқий түркистандики җаза лагерлири мәсилисигә һәмдә хитайниң еғир зулумлириға учраватқан уйғурлар, тибәтләр вә хоңкоңлуқларға йәнә бир қетим мәркәзләштүрүш икән.

«Шиветсийә уйғур маарип уюшмиси» ниң мәсуллиридин ниҗат турғун әпәндиму бу һәқтә бизни бәзи мәлуматлар билән тәминлиди. У сөзидә дуня җамаитиниң нәзири хоңкоң вә шәрқий түркистанға мәркәзлишиватқан мушундақ бир вәзийәттә хитай зулумиға ортақ учраватқан уйғурлар, тибәтләр, хоңкоңлуқларниң бирлишип хитайға қарши намайиш уюштурушиниң зор әһмийәткә игә икәнликини тилға алди.

Бу қетимқи намайишта уйғур, тибәт вә хоңкоң тәшкилатлириниң вәкиллири һәмдә шиветсийәдики кишилик һоқуқ тәшкилатлириниң рәһбәрлири арқа-арқидин нутуқлар сөзләп, хитай һакимийитиниң уйғурлар, тибәтләр, хоңкоңлуқларға селиватқан зулумлирини қаттиқ әйиблигән.

Абдулла әпәндиниң әскәртишичә, бу қетимқи намайишқа уйғурлар, тибәтләр, хоңкоңлуқлардин башқа бир қисим йәрлик шивет хәлқиму қатнашқан болуп, улар бундин кейин бу хилдики наразилиқ һәрикәтлириниң көлимини барғансери кеңәйтишкә, өзлириниң зулумға қарши ирадилирини техиму ярқин намаян қилишқа тиришидикән.

Ниҗат турғун әпәнди сөзидә һазирқидәк еғир вәзийәттә муһаҗирәттики уйғурларниң бирлишишкә болидиған барлиқ күчләр билән бирлишип, хитай һакимийитигә қарши ортақ һәрикәт елип беришиниң зөрүрлүкини тәкитлиди.

Бу қетимқи намайишқа қатнашқан һәрқайси милләтләр өзлириниң байрақлирини, символлуқ бәлгилирини намайиш мәйданида елип чиқип, намаян қилишқан. Ай-юлтузлуқ көк байрақларни көтүрүшкән уйғур җамаити бу қетимқи намайишчилар қошуниниң асасий салмиқини тәшкил қилған.

Пикирләр (0)
Share
Толуқ бәт