Shiwétsiyede Uyghurlar, tibetler we xongkongluqlar birleshme namayish ötküzdi

Ixtiyariy muxbirimiz ekrem
2019-11-25
Élxet
Pikir
Share
Print
Shiwétsiyede ötküzülgen Uyghurlar, tibetler we xongkongluqlarning birleshme namayishidin körünüsh. 2019-Yili 24-noyabir, sitokholm.
Shiwétsiyede ötküzülgen Uyghurlar, tibetler we xongkongluqlarning birleshme namayishidin körünüsh. 2019-Yili 24-noyabir, sitokholm.
RFA/Ekrem

24-Noyabir küni Uyghurlar, tibetler, xongkongluqlar shiwétsiye paytexti sitokholm shehiride xitaygha qarshi birleshme namayish ötküzdi.

Merkizi sitokholmdiki "Shiwétsiye Uyghur ma'arip uyushmisi" ning mes'ulliridin abdulla kökyar ependining bergen melumatlirigha asaslan'ghanda, 24-noyabir küni shiwétsiyede yashawatqan Uyghurlar, tibetler, xongkongluqlar we kishilik hoquq teshkilatliri birliship, sitokholm sheher merkizide xitaygha qarshi birleshme namayish élip barghan.

Abdulla ependining bildürüshiche, bu qétimqi birleshme namayishning meqsiti dunya jama'itining nezirini sherqiy türkistandiki jaza lagérliri mesilisige hemde xitayning éghir zulumlirigha uchrawatqan Uyghurlar, tibetler we xongkongluqlargha yene bir qétim merkezleshtürüsh iken.

"Shiwétsiye Uyghur ma'arip uyushmisi" ning mes'ulliridin nijat turghun ependimu bu heqte bizni bezi melumatlar bilen teminlidi. U sözide dunya jama'itining neziri xongkong we sherqiy türkistan'gha merkezlishiwatqan mushundaq bir weziyette xitay zulumigha ortaq uchrawatqan Uyghurlar, tibetler, xongkongluqlarning birliship xitaygha qarshi namayish uyushturushining zor ehmiyetke ige ikenlikini tilgha aldi.

Bu qétimqi namayishta Uyghur, tibet we xongkong teshkilatlirining wekilliri hemde shiwétsiyediki kishilik hoquq teshkilatlirining rehberliri arqa-arqidin nutuqlar sözlep, xitay hakimiyitining Uyghurlar, tibetler, xongkongluqlargha séliwatqan zulumlirini qattiq eyibligen.

Abdulla ependining eskertishiche, bu qétimqi namayishqa Uyghurlar, tibetler, xongkongluqlardin bashqa bir qisim yerlik shiwét xelqimu qatnashqan bolup, ular bundin kéyin bu xildiki naraziliq heriketlirining kölimini barghanséri kéngeytishke, özlirining zulumgha qarshi iradilirini téximu yarqin namayan qilishqa tirishidiken.

Nijat turghun ependi sözide hazirqidek éghir weziyette muhajirettiki Uyghurlarning birlishishke bolidighan barliq küchler bilen birliship, xitay hakimiyitige qarshi ortaq heriket élip bérishining zörürlükini tekitlidi.

Bu qétimqi namayishqa qatnashqan herqaysi milletler özlirining bayraqlirini, simwolluq belgilirini namayish meydanida élip chiqip, namayan qilishqan. Ay-yultuzluq kök bayraqlarni kötürüshken Uyghur jama'iti bu qétimqi namayishchilar qoshunining asasiy salmiqini teshkil qilghan.

Toluq bet