Бишкәктики уйғур җамаити «уйғур мәдәнийәт күни» паалийити өткүзди

Ихтиярий мухбиримиз ферузә
2019-07-16
Елхәт
Пикир
Share
Принт
«Уйғур хәлқиниң мәдәнийәт күни» паалийитидә уйғурчә уссул. 2019-Йили 14-июл, бишкәк.
«Уйғур хәлқиниң мәдәнийәт күни» паалийитидә уйғурчә уссул. 2019-Йили 14-июл, бишкәк.
RFA/Féruze

14-Июл күни бишкәк шәһиридики әң чоң сода мәркәзлириниң биридә «уйғур хәлқиниң мәдәнийәт күни» дәп аталған чоң бир паалийәт өтти.

Мәзкур паалийәт давамида уйғур нахша-сазлири яңрап вә миллий уссуллар орундалди.

Паалийәт бишкәк шәһиридики «азия мол» сода мәркизиниң тәшәббуси һәм қирғизистан хәлқ ассамблейәси, йәни хәлқ қурултийиниң тәркибидики «иттипақ» җәмийитиниң һәмкарлиқида уюштурулди. Мәзкур паалийәткә «юлтуз» уйғур миллий уссул ансамбили қатнишип «чинә уссули», «тәхсә уссули» вә йәнә башқа уссулларни маһирлиқ билән ойнап тамашибинларни һаяҗанға салди. Зияритимизни қобул қилған «юлтуз» ансамбилиниң бәдиий рәһбири гүлназ мәхсутова уйғур дияридики еғир вәзийәт түпәйлидин, уйғур сәнитини сақлап қелишта муһаҗирәттики уйғурларниң мәсулийити бәк еғирлиқини тилға елип, төвәндикиләрни көрсәтти.

Бүгүнки күнләрдә уйғур елидә уйғур тили, мәдәнийити, маарипи вә сәнити җиддий хирисларға дуч кәлмәктә. Көплигән тәтқиқатчилар, җүмлидин ғәрбтики тәтқиқатчилар уйғур мәдәнийитигә, җүмлидин уйғур уссуллири, нахша-сазлири вә әдәбиятиғиму алаһидә көңүл бөлмәктә. Бу һәқтә зияритимизни қобул қилған «иттипақ» җәмийитиниң аяллар кеңишиниң муавин рәиси турсунай ислам ханим уйғур сәнитиниң муһимлиқини тәкитлиди. У мундақ деди;

Мәзкур паалийәт давамида қирғизистанда тонулған яш нахшичилар ришат садиқоф вә әркин садиқофлар шох уйғурчә нахшиларни орундап, тамашибинларни уссулға тәклип қилишти. Қирғизистан әһли уйғур нахшилирини бәк яқтуруп, һәр бир той-төкүнләрдә уйғур нахшилири вә усуллиридин һузурлиниду. Қирғизистандики уйғур сәнәт топлири ичидә «әзиз дияр», «мәшрәп», «әтләс көңләк вә башқилар» алаһидә көзгә ташланмақта. Зияритимизни қобул қилған ришат садиқоф «азия мол» сода мәркизидә өткән паалийәтниң әһмийитиң зор икәнлики, җүмлидин уйғур мәдәнийитини тонуштурушта пайдилиқ рол ойниғанлиқини билдүрди. У: «қирғизистан хәлқи йәнә бир қетим уйғур хәлқиниң бай мәдәнийитигә шаһит болди» деди.

Игилинишичә, мәзкур уйғур мәдәнийәт күни паалийитигә тамашибинлар вә сода мәркәзниң хадимлиридин болуп 200 дин ошуқ киши қатнашти. Улар уйғур миллий уссуллири вә нахшилиридин бәк хушал болушти. Қисқиси мәзкур «уйғур хәлқиниң мәдәнийәт күни» юқири кәйпиятта өтти. Мәзкур паалийәткә тамашибин қатарида қатнашқан шерзат зияритимизни қобул қилип, бу паалийәттин һәммә киши сөйүнгәнликини билдүрди.

Бу йил 7-айдин тартип бишкәк шәһиридики «азия мол» сода мәркизи «достлуқ өй» лайиһәсини тәшәббус қилғаниди. Мәзкур лайиһәниң тармиқида һәр йәкшәнбә күни мәркәзниң ичидә һәр бир милләт өз мәдәнийитини намаян қилмақта. Уйғурлар қирғизистан җумһурийитиниң һәр саһәлиридә зор төһпиләрни қошуп, қирғизистан милләтлири ичидә алаһидә орунни игиләп, биринчилардин болуп бу лайиһәгә қошулушти.

Қирғизистандики уйғурлар асаслиқи бишкәк шәһири вә униң әтрапиға тарқалған болуп, улар өз миллий мәдәнийити, миллий кимликини бир қәдәр яхши сақлап қалған. Йеқинқи йиллардин буян уйғур елидә болуватқан хитай һөкүмитиниң уйғурларни лагерларға солап, меңә ююш, уйғур тилини вә маарипини йоқитиш қилмишлири бу җумһурийәттики уйғурларниңму қаттиқ наразилиқиға учриған. Улар уйғур мәдәнийити, тили вә өрп-адәтлири һәм миллий сәнитини қоғдаш вә раваҗландурушқа алаһидә әһмийәт бәрмәктә.

Пикирләр (0)
Share
Толуқ бәт