Xoten laskuyda yer asti diniy mektep oqutquchisi ablikim sawut étiwétilgen

Muxbirimiz shöhret hoshur
2014-02-26
Élxet
Pikir
Share
Print
Xitay da'irilirining Uyghurlargha qaratqan türlük bésimi we diniy étiqad cheklimiliri Uyghurlarni chüshkünleshtürmekte. 2009-Yili 17-iyul, ürümchi.
Xitay da'irilirining Uyghurlargha qaratqan türlük bésimi we diniy étiqad cheklimiliri Uyghurlarni chüshkünleshtürmekte. 2009-Yili 17-iyul, ürümchi.
AFP

Anglighuchilirimizdin kelgen uchur we inkaslardin melum bolushiche, xitayning barghanséri küchiyiwatqan diniy-étiqad cheklimiliri Uyghurlarning diniy telim-terbiye ishlirini téximu qiyinlashturmaqta.

Dinning Uyghurlarning milliy mewjutluqi we erkinlik kürishidiki rolini toluq tonup yetken bir türküm pidakar diniy ziyaliylar ösmür-balilarni terbiyileshni kichik kölemdiki yer asti diniy mekteplerde dawamlashturmaqta. Bu weziyet mana bu pidakarlar bilen xitay saqchiliri arisida arilap qanliq toqunushlarni keltürüp chiqarmaqta. Radi'omizgha yéqinda kelgen bir inkasta bayan qilinishiche, xitay saqchiliri 2012-yili 9-ayda xotenning laskuy bazirida bir yer asti diniy mektep oqutquchisini étiwetken.

Bügün muxbirimizning ziyaritini qobul qilghan laskuydiki bir kent sékrétari weqening rastliqini, weqede ölgüchining 35 yashliq ablikim sawut ikenlikini ispatlidi.

So'al: bizge silerning tewelikte ablikim sawut isimlik bir kishining neq meydanda étiwétilgenliki heqqide bir uchur keldi, siz ablikim sawutni tonumsiz?
Jawab: tonuymen. U xoten sheher, laskuy bazar, bostan kenti 2-mehellidin.

So'al: bu weqe qandaq weqe? bash-axiri qandaq bolghan?
Jawab: öy tekshürüshke barghanlargha, pichaq kötürüp qarshiliq qilghan, shuningdin kélip chiqqan ish.

So'al: siz ablikim sawutning némisi bolisiz?
Jawab: men héchnémisi emes, shu weqe yüz bergende men shu kentning sékrétari idim.

So'al: tekshürüshke barghanlarning ichide sizmu barmu?
Jawab: menmu bar, men bilen bille yene ikki kadir, kentning saqchi mudirimu bar.

So'al: néme üchün, némini tekshürüp barghan idinglar?
Jawab: yer asti mektep échiptu dep anglap sürüshte qilip barghan.

So'al: ishning axiri qandaq boldi?
Jawab: biz kentke élip barayli dések, unimidi, yézidin saqchi chaqirduq, yézidin ikki yardemchi saqchi kelgen, ularni ghalchi dep tillidi hem pichaq kötürüp qoghlidi, andin sheherdin saqchilar we herbiyler kélip herbiyler étiwetti.

So'al: qachan yüz bergen weqe bu?
Jawab: 2012-yili 9-ayda.

So'al: weqe qeyerde yüz berdi?
Jawab: ablikim sawutning ishikining aldida.

So'al: ablikim sawut qanche yash idi?
Jawab: 35-36 yashlarda.

So'al: qanche balisi bar idi?
Jawab: üch balisi bar idi.

Yuqirida xoten laskuyda bir yer asti diniy mektep oqutquchisining étiwétilgenliki heqqide tepsiliy xewer berduq.

Toluq bet