Җәнвәдики фото сүрәт көргәзмисидә җаза лагерлири баш тема қилинди

Ихтиярий мухбиримиз әкрәм
2020-09-25
Елхәт
Пикир
Share
Принт

Д у қ җәнвәдә өткүзгән фото сүрәт көргәзмиси вә б д т дики паалийитини бүгүн нәтиҗилик ахирлаштурған.

Җәнвәдин игилигән мәлуматларға қариғанда, д у қ 22-сентәбирдин 25-сентәбиргичә б д т бинаси алдида өткүзгән җаза лагерлириға қарши фото сүрәтләр көргәзмиси паалийити зор диққәт қозғиди.

Д у қ рәиси долқун әйса әпәнди бу һәқтә зияритимизни қобул қилғанда, б д т кишилик һоқуқ кеңишиниң 45-нөвәтлик йиғини мунасивити билән җәнвәдики б д т бинаси алдида өткүзүлгән фото сүрәт көргәзмиси паалийитиниң һәрсаһә кишиләрниң диққитини җәлип қилғанлиқини әскәртти.

Бу қетимқи фото сүрәт көргәзмиси паалийитигә германийә, шиветсийә, шиветсарийәдин кәлгән бирқисим уйғурлар қатнашқан болуп, паалийәткә иштирак қилған д у қ ниң программа ярдәмчиси әва стокер ханимму зияритимизни қобул қилип, 4 күнлик бу паалийәтниң нәтиҗилик өткүзүлгәнлики ипадә қилди. У мундақ деди: «биз бу қетимқи сүрәт көргәзмисигә җаза лагерлириға қамалған бир бөлүк уйғурларниң рәсимлирини таллап киргүздуқ. Бу ечинишлиқ көрүнүшләр әлвәттә, көплигән кишиләрниң күчлүк диққитини тартти. Биз бу арқилиқ хитайниң җаза лагерлирини дәрһал тақиши тоғрисида б д т хадимлириға җиддий сигнал беришни мәқсәд қилған идуқ. Мәнчә, көзлигән мәқсәдкә йәттуқ. Биз фото сүрәт көргәзмиси паалийити җәрянида йәнә көплигән йәрлик кишиләргә хитайниң җаза лагерлирида йүз бериватқан паҗиәлирини сөзләп, уларниң һессидашлиқини қолға кәлтүрдуқ. Биз үчүн буму бир утуқ һесаблиниду.»

Бу қетимқи фото сүрәт көргәзмисидә хитайниң җаза лагирлирини тақаш вә мәҗбурий әмгәккә хатимә бериштин ибарәт икки чоң тема асасий салмақни игилигән.

Д у қ рәиси долқун әйса әпәндиниң билдүришичә, улар бу қетимқи фото сүрәт көргәзмиси паалийити җәрянида бирқисим дөләтләрниң б д т дики әлчилири вә б д т ниң бәзи мунасивәтлик хадимлири билән учрушуш өткүзүп, улардин хитайниң җаза лагерлирини дәрһал тақиши тоғрисида чарә-тәдбир қоллинишни тәләп қилған.

Пикирләр (0)
Share
Толуқ бәт