Ғулҗадики меһманханилар карантин орниға айландурулған вә асаслиқ уйғур дохтурлар сәпләнгән

Мухбиримиз гүлчеһрә
2020-03-30
Елхәт
Пикир
Share
Принт
Уйғур диярида даириләр елип бериватқан вирустин мудапиәлиниш тәшвиқатидин көрүнүш. 2020-Йили январ.
Уйғур диярида даириләр елип бериватқан вирустин мудапиәлиниш тәшвиқатидин көрүнүш. 2020-Йили январ.
Social Media

Мәлум бир аңлиғучимизниң өткән һәптә ахири учур йәткүзүшичә, ғулҗа шәһиридики уйғур миллий тебабәт дохтурханисини өз ичигә алған барлиқ дохтурханилардики асаслиқ уйғур дохтур, сестра һәмдә давалаш хадимлири өткән айниң ахиридин башлап, или областлиқ һөкүмәтниң юқумлинишни тизгинләш җиддий хизмитигә маслишиш қарари бойичә карантин қилинған орунларда кечә күндүз хизмәт қилишқа орунлаштурулған, инкастин мелим болушичә, улар һазирға қәдәр аилисигә қайтмиған.

Биз бу учурға асасән ғулҗа шәһәрлик миллий тебабәт дохтурханисиға телефон қилип әһвал игилидуқ.

Ғулҗа миллий тебабәт дохтурханисиниң пәқәт партком ишханисиға телефон уланди. Телефонни алған бир хитай хадим бизниң: «бу дохтурханидиму корона вируси юқумдарлирини даваламду?» дегән соалимизға: «дохтурханимизму йеңи типтики өпкә яллуғи юқумдарлирини тәкшүрүш давалаш орни қилип бекитилгән дохтурхана, әмма дохтурханимизда һазир бирму юқумдар йоқ, улар һәммиси карантин қилинған меһманханиларда, дохтурларму шу меһманханиларда» дәп җаваб бәрди.

Биз йәнә: «ундақта қайси меһманханиларда карантин қилиниватиду?» дәп соридуқ. У җавабән: «карантин қилиниватқан меһманханилар бәк җиқ, уларниң қайсилиқиниму билмәймән, ишқилип һәммә дохтур хадимлиримиз юқум контрол хизмитини башқуруш мәркизиниң орунлаштуруши билән карантин орунлириға тәқсим қилинип хизмәт қиливатиду. Буниңдин артуқини мәнму билмәймән» деди.

Ғулҗа шәһәрлик уйғур миллий тебабәт дохтурханисиниң тор бетидин, мәзкур дохтурханиниң дохтур вә давалаш хадимлири саниниң 97 нәпәр икәнлики мәлум.

Биз радийомизға кәлгән инкастики «пәқәт уйғур дохтурлар карантин қилинған җайларға мәҗбурий сәпләнгән» дегән учурни дәлилләш үчүн йәнә ғулҗа шәһәрлик «җуңгочә давалаш дохтурханиси» ға телефон қилдуқ. Бу дохтурханиниң давалаш бөлүмидин телефонни алған бир хитай дохтур, бу дохтурханиниң таҗсиман өпкә яллуғи юқумини тәкшүрүш орни қатарида әмәслики, юқум тизгинләш хизмитигә бу дохтурханиниң хадимлири қатнаштурулмиғанлиқини вә уйғур тебабәт дохтурханиси нуқтилиқ юқум тизгинләш дохтурханисиниң бири икәнликини ейтти.

У йәнә «карантин орни қилип бекитилгән меһманханилардики юқум контрол қилиш хизмитигә җуңгочә давалаш дохтурханисидин дохтурлар сәпләнмиди» деди.

Ғулҗа шәһәрлик һөкүмәтниң юқум тизгинләш мәркизи баш штаби тәшвиқат ишханисидин телефон зияритимизгә җаваб бәргән хадим, қайси меһманханиларниң карантин орни қилип бекитилгәнликини сориғинимизда, бу соалимизға биваситә җаваб бәрмәй «йеңи типтики өпкә яллуғи һазир омумйүзлүк контрол қилинип болди, болмиса кочиларға адәмләр чиқамти? һәммә ишлар нормал» деди.

Ундақта немә үчүн дохтурлар һазирғичә өйлиригә қайтмай ишләватиду? дегән соалимизға болса: ««юқум әһвали түгигән билән башқа хизмәтләр бардә, башқисини юқиридин сораң, мән билмәймән» дәпла телефони қойди вә телефонимиз қайта уланмиди.

Ғулҗадики меһманханиларға телефон қилип әһвал игиләш җәрянида ғулҗа иқтисадий тәрәққият райониға қурулған 4 юлтузлуқ меһманхана болған җенҗяң меһманханисиниң пүтүнләй карантин орни қилинғанлиқи ашкариланди.

Меһманхана мулазимәт хадимлиридин бири соаллиримизға җаваб бәрди.

Биз униңдин ғулҗа уйғур дохтурханисидин кәлгән дохтурларни издәйдиғанлиқимизни ейтқанда у «биздә дохтурлар җиқ қайсисини издәйсиз?» дәп сориди.

Бизниң «мунчә җиқ дохтур бир меһманханиға сәпләнгән болса бимарлар, юқумдарлар қанчә?» дәп сориған соалимизға у дәрһал җиддий еһтият билән җаваб берип, : «бу мутләқ мәхпийәтлик, буни сорап немә қилисиз? дохтурни издимәкчи болсиңиз уларни дохтурханидин яки мәһәллә комитети арқилиқ издәң. Биз чақирип берәлмәймиз» деди.

«Немә үчүн дохтурларни өйгә қайтқили рухсәт қилмайсиләр?» дәп соридуқ

У, «бу, биз көңүл бөлидиған иш әмәс, бу дегән һөкүмәтниң буйруқи, бизму охшаш өйгә қайтқумиз бар, қайталмайватимиз» деди.

«юқум контрол қилинди дәватқанғу йәнә немишқа өйгә қайталмайсиләр?» дегән соалимизға у «бу соалларни соримаң, буни сизгә дейишкә болмайду дедимғу, кимдинла сорисаң охшаш, җаваб бәрмәйду» деди.

«Ундақта меһманханиға киришкә боламду ?» дәп соридуқ.

У интайин тақәтсизләнгән һалда «әлвәттә киргүзмәймиз» дәп телефонни қоювәтти.

Бу меһманханиға бир айдин буян зади қанчилик бимар вә дохтурларниң қамалғанлиқи намәлум, бу меһманхана 2017-йили 8-айда мулазимәт башлиған, 12 қәвәтлик бар алий меһманхана болуп җәмий 100 дин артуқ ятаққа игә икән.

Буниң алдида атуштики яшиң меһманханисида 99 нәпәр вухәнликниң карантин қилинғанлиқи радийомиз мухбирлириниң шу җайға қаратқан телефон зиярәтлири арқилиқ ашкара қилинғаниди.

Уйғур аптоном райони сәһийә тармақлириниң 30-март елан қилған юқум әһвали доклатида ғулҗа уйғур дияридики юқум әһвали үрүмчидин қалса иккинчи орунда болуп, диагноз қоюлған юқумдар 18, давалап сақайғини 18, өлгән сан 0 дәп йезилған. Шундақла йәрлик даириләр юқум әһвалиниң үнүмлүк контрол қилинип, йеңи юқумдарларниң байқалмиғанлиқи, бир айдин буян юқумниң тарқилиштин тохтиғанлиқини илгири сүргән.

Уйғур аптоном районлуқ сәһийә даирилириниң өткән һәптә елан қилишичә, һазирға қәдәр уйғур аптоном районида вирустин юқумлинип өлгәнләр 2 нәпәр болуп, җәмий 44 нәпәр юқумдар дохтурханида даваланмақтикән. Әмма уйғур аптоном райони даирилириниң мәзкур санлиқ мәлумати көзәткүчиләрни қайил қилалмиған.

«Ню-йорк почтиси гезити» вә «вал стрет журнили» ниң хәвәр қилишичә хитай даирилири корона вирусидин 2019-йили декабирдила хәвәр тапқан болсиму, бу вирус һәққидики учур вә дәлил-испатларни буйруқ чүшүрүп бастуруп қойған.

3-январ хитай дөләтлик сәһийә комитети бу һәқтики учурларни контрол қилиш вә дәлил-испатларни йоқитиш һәққидә буйруқ чүшүргән.

Америка авам палатаси әзаси марко рубийо өткән җүмә күни елан қилған баянатидиму, хитайниң юқумланғучиларниң һәқиқий санини мәхпий тутқанлиқи вә хитайниң һәқиқий сан мәсилидә ялғанчилиқ қилғанлиқини тәкитлигәниди.

Пикирләр (0)
Share
Толуқ бәт