Heptilik xewerler (8-13-yanwar)

2006-01-13
Élxet
Pikir
Share
Print

Rabiye qadir qatnash weqeside yarilandi

Xelq'ara Uyghur kishilik hoquq we démokratiye fondi jemiyitining prézidénti rabiye qadir xanim ötken heptide qatnash weqesige yoluqqandin kéyin, bir qanche kün doxturxanida dawalinip, öyige yénip chiqti hemde perzentliri bilen birlikte qurban héytni kütüwaldi.

Igileshlerge qarighanda, 1-ayning 5-küni kech sa'et 7 :00 lerde rabiye qadir xanim katipi bilen washin'gtondiki ishxanisidin öyige qaytiwatqanda, ular olturghan mashinini , qarshi tereptin chiqqan bir kichik tiptiki minibus uruwetken hemde weqe sadir qilghuchi mashinini tashlap qéchip ketken. Rabiye qadir xanimning ömürlük hemriyi sidiq haji ruzi ependi bu weqeni" saqchilarning tekshürüp éniqlighiche sirliq qatnash weqesi" dep ataydighanliqini bildürdi.

Rabiye qadir xanim ötken yili 3-ayning 17-küni xitay türmisidin chiqip amérikigha kelgendin buyan Uyghurlarning kishilik hoquq we milliy dawasini xelq'aralashturush yolida aktip pa'aliyet élip barmaqta.

Qurban héyt ötküzüldi

1-Ayning 10-küni (ötken heptide)pütün dunya musulmanliri qurban héytni kütüwaldi. Uyghur élidiki, Uyghur, qazaq, tunggan qatarliq musulmanlarmu özlirining mezkur mubarek bayrimini qarshi aldi. Emma, radi'o istansimizning igilishiche, xitay da'irilirining qattiq diniy ölchemliri tüpeylidin 18 yashtin töwen musulmanlar, ayallar , hökümet xizmetchiliri hem oqutquchi-oqughuchilarning meschitlerge bérishi we namaz oqushi cheklen'gen.

Ötken heptide axirlashqan mekkidiki hej ibaditi pa'aliyitide, se'udi erebistan hökümiti hej pa'aliyitining ongushluq bolushi üchün köp tirishchanliq körsetken bolsimu, emma mina téghidiki sheytan'gha tash étish pa'aliyiti jeryanida qalaymiqanchiliq yüz bérip, az dégende 345 adem ölgen we texminen ming etrapida adem yarilan'ghan.

Burhan zunun üchün stokholimde nezir ötküzüldi

11-Yanwar küni shiwitsiyining stokholm shehiride shiwitsiye Uyghur medeniyet merkizining teshkillishi bilen 200 din artuq adem qatnashqan, merhum burhan zunon'gha atalghan nezir pa'aliyiti ötküzüldi.

Gérmaniyide siyasiy panahliq tilep ret qilin'ghandin kéyin qayta norwégiyige bérip siyasiy panahliq tiklimekchi bolghan burhan zunonning ötken ayning axirida daniye saqchiliri teripidin tutuwélinip, tuyuqsizdin qaza qilishi Uyghurlarni bek échindurdi. Bu munasiwet bilen yawropa hem amérikidiki Uyghur teshkilatliri daniye hökümitige naraziliq bildürdi shuningdek weqeni éniqlashni telep qildi. Daniye saqchi we hökümet da'irilirimu bu mesilige yéqindin köngül bölüp tekshürmekte iken. Emma ,uchurlargha qarighanda, daniyidiki xitay elchixanisi burhan zunonning tughqanlirining uning jesitini Uyghur éligha élip kétip depne qilish telipini ret qilghan iken.

Xitay nazarbayéfgha rehmet éytti

11-Yanwar künidiki qazaqistan prézidénti nazarbayéfning prézidéntliqqa qesem bérish murasimigha qatnishish üchün kelgen xitay mu'awin dölet re'isi zéng chingxong nazarbayéf bilen ayrim söhbet ötküzüp, qazaqistanning teywen , tibet we "üch xil küch"ke qarshi turush mesililiride xitayni qollighanliqigha rehmet éytti.

Zéng chingxong yene murasimgha kelgen qirghizistan prézidénti qurmanbék baqiyéw bilenmu körüshüp, qirghizistanni xitay bilen birlikte "üch xil küchke" qarshi küresh qilishqa dewet qildi. Ötken yili 12-ayda 90% awaz bilen saylamda utup chiqqan nazarbayéf 11-yanwar küni resmi qesem bérish murasimi ötküzüp yene yette yilliq möhlet bilen wezipe tapshuruwaldi.

Rusiye xitaylarni qoghlap chiqardi

Rusiye köchmenler idarisi ötken heptide rusiyide qanunsiz yashawatqan xitaylardin 60 nechche ademni chégridin qoghlap chiqardi. Bu tunji qétimliq ish emes bolup, belki bundaq qoghlap chiqirish ilgirimu bir qanche qétim yüz bergen idi.

Hazir rusiyide xitay köchmenliri köpiyip ketken bolup, rusiyiliklerde xitaygha qarshi keypiyatlarmu kücheymekte, rusiye hökümitimu xitay köchmenliri mesilisige jiddiy qarimaqta.

Amérika kéngesh palatasi béyjingni agahlandurdi

Amérika kéngesh palatasi we kéngesh palata maliye -iqtisad komitétining ezasi bawkos seyshenbe küni béyjing da'irilirini agahlandurup, eger xitay amérika-xitay sodisidiki tengpungsizliqlirini tüzetmise, "washin'gtonning xitay mallirini amérikigha ékisport qilinishini cheklesh yolida chare qollinishi mumkin" dep körsetti. Amérika dölet mejlisidiki démokratlargha mensup kéngesh palata ezasi chak shumér yéqinda 2006-yili xitaydin import qilinidighan barliq tawarlardin 27% baj élish toghrisida qanun teklip layihisi sunup, xitay-amérika soda balansidiki tengpungsizliqni azaytidighanlqini bildürgen.

Amérika bilen rusiye yadro pilanini eslige keltürgenlikige epsuslandi

Ötken heptide iran yadro tetqiqat layihisini eslige keltürgendin kéyin, amérika bilen rusiye iranning bu qilmishidin epsuslan'ghanliqini ipade qilghan.

Amérika birleshme agéntliqining uchuridin melum bolushiche, amérika aq saray bayanatchisi sikot makillan " eger iran xelq'ara shertnamilerge ri'aye qilmisa, u chaghda bizning bu ehwalni b d t bixeterlik kéngishide hel qilmay bashqa amalimiz yoq" dégen.( Ümidwar)

Pikirler (0)
Share
Toluq bet