Һәптилик хәвәрләр (25 - 31 - март)

2006-03-31
Елхәт
Пикир
Share
Принт

Америка хитай билән болған сода мунасивити һәққидә йиғин өткүзди

Чаршәнбә күни америкиниң пайтәхти вашингтонда америка кеңәш палатаси малийә комитетиниң орунлаштуруши билән хитайниң сода рекорти һәққидә муһакимә йиғини өткүзүлди.

Йиғинда сөз қилған америкиниң муавин сода вәкили каран батиа, хитайниң нөвәттә америка билән болған сода мунасивитидә бир "йеңи дәвр" гә қәдәм қойғанлиқини ейтти:

"Бу йеңи дәвр хитайниң дуня сода тәшкилатиға әза болған өткүнчи мәзгилиниң ахирлашқанлиқидин һәмдә җиддий һәрикәт қоллинип бу тәшкилаттики ишәнчлик бир әзаға айлиниш мәзгилиниң башланғанлиқидин дерәк бериду. Шундақла хитай йәнә хәлқара сода сестимисиға пайдилиқ болуши керәк".

Батиа сөзидә йәнә, америкиниң хитайниң әқлий мүлүк һоқуқини қоғдаш җәһәттики тиришчанлиқиға гуман билән қарайдиғанлиқини ейтти. Униң билдүрүшичә, гәрчә хитай тәрәп әқлий мүлүк һоқуқини қоғдаш җәһәттики қанун-бәлгилимилиридә азрақ илгириләшләрни һасил қилған болсиму, лекин техичә униң үнүми яхши көрүлмигән. Йиғинда батиа йәнә, хитай һөкүмитиниң һәтта америкиниң телеграф-алақиға охшаш бир қисим мулазимәт санаәтлириниң хитайға киришини тосуватқанлиқини көрсәткән. Шундақла хитай йәнә, америкидин кала гөши импорт қилишниму чәклигән.

Әркин алиптекин пан явропа һәрикитиниң хәлқара йиғинида сөз қилди

Пан явропа һәрикитиниң йиғини 24-25-март күнлири германийидә өткүзүлди. Русийә федератсийисидики аз санлиқ милләтләрниң вәзийити асаслиқ тема қилинған йиғинға, явропа парламентиниң вә явропа иттипақиға әза дөләтләрниң парламент әзалири, естонийә парламентиниң сабиқ рәиси, германийә һөр демократик бирлик партийисиниң әзалири, христиан демократик бирлик партийисиниң әзалири вә йешиллар партийисиниң әзалири қатнашқан.

Йиғинға қатнашқан дуня уйғур қурултийиниң рәиси әркин алиптекин, йиғинда явропа парламентиниң һазирғичә хитайниң шәрқий түркистандики кишилик һоқуқ сияситини әйибләп 2 қетим қарар чиқарғанлиқини әскәртип өтүп, явропа парламенти вә явропа миллий парламентилириниң шәрқий түркистандики инсан һәқлири вәзийитигә көңүл бөлүшини вә бу һәқтә қарар чиқиришини илтимас қилған.

Хитай үч хил күчкә зәрбә бериш тәрбийисини мәктәпләрдиму башлиди

Уйғур аптоном районлуқ җамаәт хәвпсизлик идарисиниң мәлум қилишичә, аптоном районлуқ җ х идариси, маарип вә мәдәнийәт органлири билән бирликтә бу йил 5‏-айдин 12‏- айғичә уйғур елидики мәктәп орунлирида аталмиш " үч хил күчләр" сиңип киришигә зәрбә бериш һәрикитини елип баридикән. Җ х идариси мәхсус түр бойичә елип баридиған бу алаһидә һәрикитини тонуштуруп, йеқинқи йиллардин буян "үч хил күчләр" ниң яш-өсмүрләрниң идийисиниң садда болуши, җәмийәт тәҗрибисиниң кәмчил болуши шундақла ақ-қарини пәрқ етиш иқтидариниң йетәрлик болмаслиқидин пайдилинип, уларға бөлгүнчи идийиләрни сиңдүрүп, мәктәп орунлириниң бихәтәрликигә еғир зиян йәткүзгәнликини билдүрди. Чәтәлләрдики уйғур паалийәтчилири хитай даирилириниң бу қилмишилирини қаттиқ тәнқид қилмақта.

Қирғизистанлиқ уйғур рәссаминиң сүрәтлири истанбулда көргәзмә қилинди

Йеқинда истанбул гүзәл сәнәт музейида оттура асия рәссамлириниң рәсим көргәзмиси ечилди. Түркийә саяһәт вә мәдәнийәт министирлиқи тәрипидин уюштурулған мәзкур көргәзмигә қирғизистандин кәлгән атақлиқ уйғур рәссам тәләт миррәхимовниң рәсимлириму қоюлди. Униң уйғурлар һаятиға беғишланған сүрәтлири түрк көрәрмәнлириниң қизиқишини қозғиған.

Тәләт миррәхимов қирғизистан қатарлиқ оттура асия мәмликәтлиригә тонулған уйғур рәссамлириниң бири болуп, көп қетим мукапатларға еришкән.

Қәбрә көчүрүш бәлгилимиси чәтәлләрдики уйғурларниң наразилиқини қозғимақта.

Йеқинда хитай даирилири үрүмчи шәһиридики шамал бағ хоҗа нияз һаҗим қәбристанлиқини йөткәш һәққидә қарар чиқарғандин кейин, чәтәлләрдики уйғурлар арисида наразилиқлар пәйда болди. Канададики сиясий паалийәтчи вә язғучи ғолам әпәнди, шаир вә сиясий паалийәтчи әхмәтҗан осман қатарлиқлар мухбиримизниң зияритини қобул қилип, бу һәқтә өз көз қаришини оттуриға қоюп, буниң хитай һөкүмитиниң уйғурларниң миллий кимлик вә миллий дөләт еңини йоқитиш муддиаси билән мунасивәтлик пиланлиқ бир һәрикәт икәнликини билдүрди.

Қазақистан өзбекистанлиқ сиясий мусапирларни қайтуривәтти

Қазақистан һөкүмити, өзбекистандики сиясий бесимдин қечип қазақистандин сиясий панаһлиқ тәләп қилған 9 нәпәр өзбекистан пуқрасини, өзбекистанға қайтуривәтти. Хәлқара кишилик һоқуқни көзитиш тәшкилатиниң яврупа вә оттура асия бөлүминиң мудири һоли картнәр, қазақистан һөкүмити тәрипидин өзбекистанға қайтурулған мәзкур кишиләр қаттиқ җазаға учришиши мумкин, деди.

Өзбекистан даирилири, мәзкур 9 кишини радикал диний тәшкилатқа әза болған һәмдә өзбекистандики һакимийәтни ағдурушқа урунған дәп әйиблимәктә. (Үмидвар)

Пикирләр (0)
Share
Толуқ бәт