Һәптилик хәвәрләр (23-июлдин 29-июлғичә)

Мухбиримиз җүмә
2011-07-29
Елхәт
Пикир
Share
Принт

«Әркинлик лоңқиси» путбол мусабиқиси башланди

Уйғур тарихидики тунҗи қетимлиқ «әркинлик лоңқиси» ни талишиш мусабиқиси 27-июл голландийиниң дәнһах шәһиридә ғәлибилик башланди.

Явропа тупрақлирида яшаватқан миңға йеқин уйғур өз-ара қучақлашти. Һәрқайси командилар алқиш садалири ичидә ай-юлтузлуқ көк байрақни көтүрүп  һаяҗан иликидә мәйданға кирип кәлди. Истиқлал марши оқулди вә вәтән ичи-сиртидики шеһитләрниң роһиға сүкүт билән һөрмәт билдүрүлди. Дуня уйғур қурултийи рәһбәрлиридин сәмәт абла әпәнди уйғурларниң мәниви аниси рабийә қадир ханимниң салимини йәткүзди. Америкида туруп зияритимизни қобул қилған рабийә қадир ханим «путболчи баллиримниң урған һәр бир топи хитайға бир зәрбә, уйғур хәлқимгә бир илһам!» деди.

Йешил мәйдандики үмидлик сада «өзимизниң мустәқил кәспий путбол командисини қурсақ»

Дәнһахта өткүзүватқан уйғур яшлириниң тунҗи нөвәтлик «әркинлик лоңқиси» ни талишиш путбол мусабиқиси бүгүн 3-күнигә күнигә қәдәм қойди.

Мусабиқә пилан бойичә интайин рәтлик, қизиқарлиқ вә юқири кәйпиятта давамлашмақта. Биз бу арида мусабиқә мәйданидики әзимәтләр, мәшқавул вә һәвәскарларни телефон арқилиқ зиярәт қилдуқ. Улар бирдәк «бизниңму уйғур топчилардин тәшкилләнгән бир кәспи командимиз қурулған болса...» Дегән арзусини баян қилишти.

1-Күни голландийә билән норвегийә, шветсийә билән белгийә вә америка билән германийә командилири тутушти. Голландийә уйғур яшлар партийиси командиси 1 гә қарши 2 нәтиҗә билән норвегийә уйғур командисини утқан. Шветсийә уйғур командиси 1 гә қарши 4 нәтиҗә билән белгийә уйғур командисини, германийә уйғур командиси 0 қарши 1 нәтиҗә билән америка уйғур командисини йәңгән иди.

Уйғур яшлириниң тунҗи нөвәтлик «әркинлик лоңқиси» ни талишиш путбол мусабиқисиниң иккинчи күни

Уйғур яшлириниң тунҗи нөвәтлик «әркинлик лоңқиси» ни талишиш путбол мусабиқисиниң иккинчи күни голландийә билән германийә, америка билән норвегийә, франсийә билән белгийә командилири тутушти. Голландийә командиси 2 гә қарши 4 нәтиҗә билән германийә командисини йәңди. Америка билән норвегийә 1=1 тәңлишип қалди. Франсийә билән белгийиму 1=1 нәтиҗә билән тәңлишип ахирлашти.

3-Күни голландийә билән америка, германийә билән норвегийә, шветсийә билән франсийә уйғур командилири мусабиқилишиду.

Мәзкур мусабиқә дуняниң һәрқайси җайлирида яшаватқан уйғурларға иптихарлиқ, үмид вә ишәнч туйғулирини ата қилди.

Голландийидики хитай әлчиханиси алдида намайиш

Һәрқайси дөләтләрдин «әркинлик лоңқиси» ни талишиш мусабиқисигә кәлгән уйғурлар 28-июл голландийидә турушлуқ хитай әлчиханиси алдида намайиш қилип хитайниң «18-июл хотән вәқәси» дики зораванлиқи вә уйғурларға қаратқан бастуруш сияситигә қаршилиқ билдүрди.

Намайишчилар баштин ахири шоар товлап өзиниң хитай диктаторилиқи вә таҗавузчилиқиға болған наразилиқини ипадилиди. Дуня уйғур қурултийи яшлар комитетиниң башлиқи ғәюр әпәнди вә голландийидики аммиви тәшкилатларниң йетәкчиси садиқҗан сәләй әпәндиләр намайиш вә паалийәт һәққидики пикир қарашлирини баян қилди.

18-Июл хотән қирғинчилиқиға наразилиқ билдүрүш йүзисидин германийидә намайиш өткүзүлди

26-Июл германийидики уйғурлар 18-июл йүз бәргән хотәндики қанлиқ қирғинчилиққа наразилиқ билдүрүш йүзисидин мюнхенда йәнә бир қетим намайиш өткүзди.

Намайишни д у қ, явропа шәрқий түркистан бирлики тәшкилати, хәтәр астидики милләтләрни қоғдаш тәшкилати вә тибәт тәшкилати бирликтә уюштурған.

Бу хилдики намайишлар йәнә 7-айниң 24-күни түркийиниң 3-чоң шәһири измирда, 7-айниң 27-күни әзәрбәйҗанниң пайтәхти бакуда өткүзүлгән. Изимиздики бу намайишни «көк бөриләр» яшлар тәшкилати уюштурған.

Бакудики намайиш хитайниң бакуда турушлуқ әлчиханиси алдида өткүзүлгән болуп намайишқа әзәрбәйҗандики бир нәччә партийә тәшкилат әзалири қатнашқан.

Күрәш өлмәйду!

25-Июл мәрһум күрәш күсән туғулғанлиқниң 52-йиллиқи мунасивити билән шветсийидә яшаватқан бир қисим яшлар өзлүкидин тәшкиллинип, шветсийә уйғур комитети мәсуллириниң һәмраһлиқида мәрһумниң қәбрисини йоқлиди.

Қәбрә йоқлаш җәрянида мәрһумниң роһиға атап қуран қираәт қилинди вә мәрһумниң һаяти тонуштурулди.

Мәрһум күрәш күсән әпәндини қазақистандики вақитлиридин тартип тонуйдиған вә паалийәтлиригә иштирак қилған, һазир шветсийидә яшаватқан йүсүп әпәнди мәрһумни әсләп өтти.

Вакаләтсиз милләтләр тәшкилати хитайниң хотәндики бастуруш һәрикитини әйиблиди

Вакаләтсиз милләтләр тәшкилати 25-июл баянат елан қилип, хитайниң хотән вәқәсидики бастуруш һәрикитини әйиблиди.

Баянатта мундақ дейилди «шәрқи түркистанниң хотән шәһиридә 18 ‏-июлдики қанлиқ вәқәдә 20 кишиниң өлгәнлики илгири сүрүлүватиду, әмма хитай тәрәп вәқә һәққидики учурларға чәклимә қоюп, вәқәни өз муддиаси бойичә тонуштурушқа урунуватиду.»

Баянатта хотәндики вәқә үстидә мустәқил тәкшүрүш елип берилиши керәклики тәкитләнди. Рабийә қадир ханим хотән вәқәсидә қолға елинғанларниң тәқдиридин әндишә қилмақта.

Мәлум болушичә, хотәндики вәқә шәһәрдики хитайларниң  тиҗаритигә еғир тәсир көрсәткән.

Пакистанниң равалпинди шәһиридики бир тиҗарәтчиләр уюшмисиниң рәисликигә йәнә уйғур сайланди

Муһаҗирәттики уйғурлар өзлириниң ишчанлиқи, интизамчанлиқи вә дуруслуқи билән өз дөләтлиридики йәрлик аһалиләрниң қизғин қучақ ечишиға вә иззәт-һөрмитигә еришип кәлмәктә.

Өткән һәптә пакистанниң равалпинди шәһиридики бир чоң базарда өткүзүлгән тиҗарәтчиләр уюшмисиниң рәис сайлимида ғәниҗан рози исимлик бир уйғур рәисликкә сайланған.

Ғәниҗан рози, уйғур елиниң бортала шәһиридин, у 1982-йили 12 яш вақтида, ата-аниси билән бирликтә пакистанға көчмән болуп келип йәрләшкән. У бу җәрянда равалпиндидики тиҗарәтчиләр арисида һөрмәткә еришкән.

Бир ай давам қилған сайлам паалийити тоғрисида өмәр уйғур вәхпиниң мәсули әкбәрҗан билидиғанлирини баян қилди вә ғәниҗан розини тәбриклиди.

Толуқ бәт