Heptilik xewerler (12-dékabirdin 18-dékabirghiche)

Muxbirimiz qutlan
2015-12-18
Élxet
Pikir
Share
Print
Erkin asiya radi'osi Uyghur bölümi heptilik xewerliri
Erkin asiya radi'osi Uyghur bölümi heptilik xewerliri
Photo: RFA

Gollandiyede rabiye qadir xanimning muhajirettiki 10 yili daghdughiliq xatirilendi

12-Dékabir küni gollandiyede Uyghur milliy herikitining rehbiri rabiye qadir xanimning muhajirettiki on yili daghdughiliq tebriklen'gen.

Tebriklesh pa'aliyitini "Gollandiye Uyghur birliki", "Türk öyi" we "Yawro-asiya teshkilati munbiri" qatarliq orunlar birlikte teshkilligen.

Yighin qatnashchiliri rabiye xanimning Uyghur dewasi yolida sunmas irade we tinimsiz küreshler bilen ötküzgen muhajirettiki 10 yilini qizghin tebrikligen.

Pa'aliyette rabiye qadir xanimgha pütün türk sistémisidiki teshkilatlar namidin "Mehmud qeshqeriy kümüsh médali" teqdim qilin'ghan. "Gollandiye Uyghur birliki" Uyghurlar namidin rabiye xanimgha bir dane altun médal teqdim qilghan.

Da'iriler muqimliq saqlash üchün Uyghur élining jenubidiki saqchixanilargha yardemchi saqchi qobul qilmaqtiken

Melum bolushiche, da'iriler muqimliq saqlash üchün Uyghur élining jenubidiki yéza-bazarliq saqchixanilargha zor sanda yardemchi saqchi qobul qilmaqtiken.

Yéqinda Uyghur élining jenubiy wilayetliridin radi'omiz ziyaritini qobul qilghan ikki neper yardemchi saqchi bu ehwalning rastliqini delillidi.

Igilinishiche, awat nahiyesidiki saqchixanilar yardemchi saqchiliqqa iltimas qilghuchilarni siyasiy jehettin ishenchlik bolsila oqush tarixigha shert qoymastin qobul qilmaqtiken.

Guma nahiyesidiki yardemchi saqchilarning jiddiy peytlerde 24 sa'et nöwetchilikte turidighanliqi, ularning wezipe da'irisining muqimliqqa a'it herqandaq ishqa chétilidighanliqi melum bolmaqta.

Uyghur élidiki déhqan ressamlar ijadiyetlirining siyasiy teshwiqatchiliq yoligha yétekliniwatqanliqi melum

Igilishimizche, Uyghur élidiki déhqan ressamlar nöwette xitay kompartiyesining rayondiki siyasiy teshwiqati üchün xizmet qilishqa yéteklenmektiken.

Uyghur élining mekit, chaqiliq we bashqa jayliridin melum bolushiche, déhqan ressamlar yéqinqi yillardin buyan "Jungxu'ani söyüsh", "Diniy esebiylikning tesirini tügitish" mezmunidiki resimlerni sizishqa uyushturulmaqtiken.

Muhajirettiki Uyghur ressamlar bu heqte pikir bayan qilip, déhqan ressamlar ijadiyitining siyasiy teshwiqatchiliq yoligha yéteklinishi emeliyette "Sen'etkarlarning erkin tuyghusini kontrol qilish" tin bashqa nerse emes, dégenlerni ilgiri sürdi.

Nobél mukapatigha érishken türk alimi eziz sanjar enqere sepiride Uyghurlargha otluq salam yollidi

2015-Yilliq nobél ximiye mukapatigha érishken türk alimi eziz sanjar ependi 14-dékabir küni enqere ayrodromigha yétip kelgende, uni türk jama'iti bilen birlikte Uyghur wekillirimu kütüwalghan.

Enqerede olturushluq mirkamil qeshqeri bilen oghli mujahit qeshqeri Uyghur jama'itige wakaliten eziz sanjar ependige güldeste teqdim qilghan. Béshigha Uyghur doppisini kiyip güldeste qobul qilghan eziz sanjar ependi pütün Uyghur xelqige özining otluq salimini yollighan.

Doktor eziz sanjar ependi "D n a" üstide élip barghan tetqiqatlirida dewr bölgüch yéngiliq yaratqanliqi üchün 2015-yilliq nobél ximiye mukapatigha érishken.

Xitay taratqulirining bay kömürkan hujumchilirini "Méngisi yuyulghan kishiler" déyishi közetküchilerde so'al peyda qilmaqta

Xitay hökümet taratquliri yéqinda baydiki kömürkan hujumchilirini "Esebiy dini idiye" ler bilen "Méngisi yuyulghan kishilerdur" dep xewer bergen.

"Shinjang géziti" bu heqtiki xewiride bay kömürkan hujumchiliridin turghun emet isimlik tirik qolgha chüshken bir gumandarning öz qilmishidin "Towa" qilghanliqi ilgiri sürülgen. Uningda yene bay hujumchilirining diniy esebiylik tüpeyli "Méngisi pütünley yuyulup jinayet yoligha mangghan" liqi tilgha élin'ghan.

Xitay hökümet taratqulirining bay weqesi heqqide bergen bir-birige ziddiyetlik xewerliri közetküchilerning küchlük gumanini qozghimaqta.

Gunnar yarring namidiki merkiziy yawro'asiya ilmiy yighmisi we uning reqemlik kutupxanisi ilim sahesige échiwétilgen

Shiwétsiyelik meshhur Uyghurshunas gunnar yarring namidiki ilmiy yighma 2012-yili sitokholm uniwérsitétidin istanbuldiki shiwétsiye tetqiqat institutigha köchürülgenliki melum.

Yéqinda mezkur yighmining reqemlik kutupxanisi yasilip, gunnar yarring toplighan Uyghur til-yéziqidiki qolyazmilar we klassik menbelerning éléktronluq nusxisi torgha qoyulghan.

Mezkur ilmiy yighma nöwette Uyghurshunasliq tetqiqati bilen shughulliniwatqan bilim ademlirining küchlük diqqitini qozghimaqtiken.

Igilinishiche, Uyghur tetqiqatigha qiziqidighan herqandaq kishi mezkur institutning tor bétidin bu matériyallarni köreleydiken.

Toluq bet