Heptilik xewerler (24-dékabirdin 30-dékabirghiche)

Muxbirimiz qutlan
2016-12-30
Élxet
Pikir
Share
Print
Erkin asiya radi'osi Uyghur bölümi heptilik xewerliri
Erkin asiya radi'osi Uyghur bölümi heptilik xewerliri
Photo: RFA

Qaraqash nahiyelik partkomgha hujum qilish weqesining bir qisim tepsilati aydinglashti

28-Dékabir küni qaraqash nahiyelik partkomgha aptomobilliq hujum qilish weqesi yüz bérip, 5 ademning ölgenliki, birqanche kishining yarilan'ghanliqi melum boldi.

Bu Uyghur élida tunji qétim nahiyelik partkomgha biwasite hujum qilish weqesi bolup, xelq'ara taratqularda küchlük inkas peyda qildi. Xitay hökümiti weqeni "Térrorluq hujumi" dep élan qildi.

Radiyomiz 3 neper hujumchining kimlikini éniqlap chiqti. Yerlik da'irilerning ashkarilishiche, hujumchilarning ikki nepiri qaraqash nahiyesining yawa yézisidiki aka-uka toxtimuhemmet tursunniyaz bilen nurmemet tursunniyaz iken. Yene bir nepiri jahanbagh yézisidin abdullitip metqurban iken.

Tuyuqsiz haraq tashlighan abdulmijit abletning 7 yilliq qamaqqa höküm qilin'ghanliqi melum boldi

Uyghur aptonom rayonluq da'iriler tüzüp chiqqan "Diniy esebiylikning 75 xil alamiti" namliq qollanmida ushtumtut haraq tashlashningmu "Diniy ashqunluq" ning bir xil béshariti ikenliki bayan qilin'ghan.

Uyghur diyarida 2014‏-yili bashlan'ghan "Qattiq zerbe bérish" we "Esebiylikni tügitish" herikiti dawamida nechche minglighan Uyghur yashlirining tutqun qilin'ghanliqi we qamaqqa höküm qilin'ghanliqi melum.

Radiyomizning bu heqtiki ehwal éniqlishi dawamida, yéngisar nahiyesining lop yézisidiki abdulmijit memetning "Tuyuqsiz haraq tashlighanliqi" we dostlirigha namaz ayetlirini ögetkenliki üchün 7 yilliq késilgenliki ashkarilandi. Shahitlardin türkiyede olturushluq arzugül nurmemetning bildürüshiche, oxshash ehwal xoten we aqsudimu yüz bergen iken.

Tonulghan Uyghur ziyaliysi abduweli ayup özining türmidin qoyup bérilgendin kéyinki kechürmishlirini anglatti

Abduweli ayupning 2012-yili amérikidin ana yurtigha qaytip, ana tilliq ma'arip yolida dadilliq bilen izdinip körüshi we axirida türmige tashlinishi xitayning yuqiri bésimliq siyasiti yürgüzülüwatqan Uyghur élida eng eqelliy insaniy heq-hoquqlarningmu ishqa ashmaydighanliqini körsetken idi.

Aridin birqanche yil ötken bügünki künde abduweli ayup radiyomiz arqiliq öz kechürmishlirini bayan qilip, özining türmidin qoyup bérilgendin kéyinki achchiq sergüzeshtliri bilen qandaq shara'itta wetenni terk étishke mejbur bolghanliqini ashkara qildi.

U, "Men tutqunluqtin qutulup hör dunyagha qaytip keldim, emma xelqim eng mohtaj boluwatqan ana tildiki milliy ma'arip yolidin hergizmu waz kechmidim," dédi.

Awstraliyede ötküzülgen "Uyghur longqisi" ni talishish putbol musabiqiside sidnéy Uyghur komandisi chémpiyon bolghan

Awstraliyede ötküzülgen 13-qétimliq "Uyghur longqisi" ni talishish putbol musabiqisi 12-ayning 25-küni mélborn shehiride ghelibilik axirlashqan.

Musabiqide sidnéy Uyghur komandisi chémpiyon bolghan. Mélborn Uyghur komandisi ikkinchi, adélayd Uyghur komandisi üchinchi bolghan.

Awstraliye Uyghur jem'iyitining re'isi memtimin elaning bildürüshiche, "Uyghur longqisi" sini talishish putbol musabiqisi awstraliyede 2006-yilidin étibaren ötküzülüwatqan bolup, uningda Uyghur yashlirining dostluqi we öz-ara chüshinishi meqset qilin'ghan iken.

Uyghur perzenti mujahit qeshqeri türk dunyasi pen-téxnika we layihelesh musabiqiside yaxshi bahagha érishken

Türkiyede tonulghan Uyghur ösmür mujahit qeshqeri özi layiheligen yéngi esiri bilen yaxshi netijige ériship, yene bir qétim türkiye taratqulirining diqqet nuqtisida bolghan.

Mujahit qeshqeri layiheligen pütün kün aptap chüshidighan aylanma öy modéli ötken hepte axirida türkiyede ötküzülgen "Türk dunyasi pen-téxnika we layihelesh musabiqisi" de aldinqi 100 projékt qatarigha kirgen we yaxshi bahagha érishken.

Mujahit qeshqerining dadisi mirkamil qeshqeri bu heqte radiyomiz ziyaritini qobul qilip, kichik mujahitning bu xildiki ammiwi pa'aliyetlerde "Öz talantini namayen qilish bilen bir waqitta yene, sherqiy türkistan mesilisinimu anglitip kelgenliki" ni bildürdi.

Xitayning Uyghur élidiki meschit chéqish herikiti türk metbu'atlirida küchlük inkas peyda qildi

Xitay da'irilirining ötken üch ay jeryanida qeshqer, xoten we aqsu qatarliq wilayetlerde "Meschitlerni elalashturush" wiwiskisi bilen köpligen meschitlerni chéqiwétishi yéqinqi bir heptidin buyan türk taratqulirida küchlük inkas peyda qildi.

Türkiyening aldinqi qatardiki 4 chong gézitining biri bolghan we erdoghan hökümitige qarita mayilliqi bilin'gen "Yéngi shepeq" géziti bu heqte "Sherqi türkistandiki meschit bitchiti" dégen témida xewer élan qildi.

Xewerde da'irilerning Uyghur diyaridiki 3500 dek chong-kichik meschitni bixeterlikni bahane qilip chéqiwétkenliki, bu heriketning yerlik musulmanlarning qelbide saqaymas jarahet peyda qilghanliqi eskertildi.

Pikirler (0)
Share
Toluq bet