Bishkektiki gülliniwatqan "Medine" baziri

Ixtiyariy muxbirimiz azad
2016-02-26
Élxet
Pikir
Share
Print
Bishkektiki "Medine" baziri
Bishkektiki "Medine" baziri
RFA/Azad

Qirghizistanning bishkek shehiridiki Uyghur ilidin kelgen tijaretchilerni asas qilghan "Medine" baziri qirghizistandiki eng chong uniwérsal bazarlarning biri shundaqla yalghuz ottura asiyadila emes, belki chet'ellerde mexsus Uyghurlar üchün qurulghan birdin - bir bazar bolup hésablinidu.

"Medine" baziri 2002 - yili qirghizistandiki milletperwer karxanichi tursuntay selimufning teshebbusi we meblegh sélishi bilen qurulghan bolup, bazar qurulghan 14 yil dawamida kichikliktin zoriyip, soda - sétiq, tawar yötkesh, tikküchilik, yémek - ichmek mulazimiti, banka mulazimiti qatarliqlar bir gewdileshken soda merkizige aylandi.

Yéqinda radi'omiz ziyaritini qobul qilghan "Medine" bazirining qurghuchisi tursuntay selimuf ependi bazarning qirghizistanning iqtisadi tereqqiyati jeryanida oynighan roli, Uyghur ilidin kelgen tijaretchilerge körülgen ghemxorluqlar we Uyghur millitining qirghizistandiki ijtima'iy orni qatarliqlar heqqide öz qarashlirini otturigha qoydi.

Medine bazirining qurghuchisi tursuntay selimuw ependi, 2016-yil féwiral bishkek shehri.
Medine bazirining qurghuchisi tursuntay selimuw ependi, 2016-yil féwiral bishkek shehri. Photo: RFA

Tursuntay ependi aldi bilen "Medine" bazirining qirghizistanning iqtisadi tereqqiyatigha qoshqan töhpiliri heqqide munularni bildürdi:"Bazar qurulghan 2002 - yildin buyan qirghizistanning tikküchilik saheside zor janlinishning barliqqa kélishige türtke bolup, bügünki künde 200 mingdin artuq ademning ishqa orunlishishigha öz hessisini qoshup kéliwatidu."

U yene Uyghur ilidin kelgen tijaretchilerge asanliq yaritip bérish, yoluqqan mesililerni hel qilish qatarliq jehetlerde ishlen'gen xizmetler heqqide toxtaldi. U mundaq dédi: "Wetendin kelgen tijaretchilerning soda shara'itini yaxshilap bérish meqsitide barliq dukanlargha issiqliq bérish eslihelirini ornitip bérish ishlirini qiliwatimiz."

Qirghizistandiki Uyghur ziyaliyliridin nazim qembiri ependi "Medine" baziri qurulghandin buyan barliqqa kelgen özgirishlerge ijabiy baha bérip mundaq dédi: "Ottura asiyadiki Uyghurlar topliship olturaqlashqan qirghizistanda 'medine' bazirining bolghanliqi qérindash milletler arisidiki öz - ara chüshinishni ilgiri süridu dep qaraymen."

Tursuntay selimuf ependi qirghizistanda milletler ittipaqliqi, Uyghurlarning jem'iyettiki ijtima'iy orni shundaqla Uyghur yémek - ichmek medeniyitining tesiri qatarliqlar heqqidimu öz qarashlirini otturigha qoydi.

U: "Qirghizistan köp milletlik memliket. Biz Uyghurlar tariximizning uzunluqi, örp - adetlirimizning mukemmelliki, tamaqlirimizning serxilliqi bilen bashqa milletlerning hörmitige na'il bolup kéliwatimiz" dédi.

Toluq bet