Д у қ рәиси рабийә қадир ханим испанийәниң барселона шәһәр башлиқи билән көрүшти

Ихтиярий мухбиримиз әркин тарим
2016-09-28
Елхәт
Пикир
Share
Принт
Д у қ рәиси рабийә қадир ханим барселона шәһәр башлиқи мәрсе сонеса и пагәс (Merce Conesa I Pages) ханим билән көрүшти. 2016-Йили 27-сентәбир, испанийә.
Д у қ рәиси рабийә қадир ханим барселона шәһәр башлиқи мәрсе сонеса и пагәс (Merce Conesa I Pages) ханим билән көрүшти. 2016-Йили 27-сентәбир, испанийә.
RFA/Erkin Tarim

Дуня уйғур қурултийи рәиси рабийә қадир ханим 27-өктәбир күни испанийәниң барселона шәһәр башлиқи мәрсе сонеса и пагәс (Merce Conesa I Pages) ханим вә шәһәрлик һөкүмәтниң рәһбәрлик һәйити билән көрүшүп, уйғурларниң вәзийити һәққидә мәлумат бериш билән биргә, мухбирларни күтүвелиш йиғини чақирип, уйғурларниң һазирқи омумий вәзийити тоғрисида мәлумат бәргән. Чүштин кейин бу паалийәткә қатнишиватқан латин америкиси, ирақ, сүрийә вә пәләстин қатарлиқ дөләтләрдин кәлгән инсан һоқуқлири паалийәтчилири билән бирликтә барселона йеқинидики сантаталамо шәһиригә берип, шәһәр идарә һәйити биләнму көрүшкән. Шәһәрлик һөкүмәтниң йиғин залида елип берилған учришишта рабийә қадир ханим сөз қилип, йиғинға иштирак қилған шәһәрлик һөкүмәтниң һәр дәриҗилик кадирлириға вә инсан һәқлири тәшкилати мәсуллириға уйғурларниң һазирқи вәзийити, хитайниң уйғурларға елип бериватқан, күнсайин ешиватқан бесим сиясити тоғрисида мәлумат бәргән.

Д у қ рәиси рабийә қадир ханим вә муавин рәис өмәр қанатниң ейтишичә «кишилик һоқуқни қоғдайдиған шәһәрләр» мавзулуқ паалийәтни испанийәниң каталонийә өлкисидики 14 шәһәр вә кишилик һоқуқини қоғдаш тәшкилатлири уюштурған. Бу 4-қетимлиқ йиғин болуп, уйғурлар тунҗи қетим тәклип қилинған.

Дуня уйғур қурултийи рәиси рабийә қадир ханим бәргән мәлуматларға асасланғанда, уйғурларни тәклип қилиштики мәқсити, уйғур мәсилисини каталонийә хәлқигә аңлитиш, уйғурларға һесдашлиқ қилидиған аммиви тәшкилатларни техиму көпәйтиштин ибарәт икән.

Рабийә қадир ханим бизгә паалийәтлири һәққидә тәпсилий мәлумат бәргәндин сирт, өзи испанийәдә қатнишиватқан бу паалийәтниң әһмийитиниң зор икәнликини тәкитлиди.

Өмәр қанат әпәнди, радиомизға бәргән мәлуматида, каталонийәниң испанийәдин айрилип чиқип мустәқил болушни тәләп қиливатқан бир район икәнликини, шәһәр башлиқлириниң уйғурларниң дәвасини һәққаний бир дәва дәп қарайдиғанлиқини тәкитлиди.

«Кишилик һоқуқни қоғдайдиған шәһәрләр» паалийити испанийәниң каталонийә өлкисидики 14 шәһәрдә өткүзүлидиған болуп, 14 шәһәрдә уйғур мәсилиси аңлитилидикән.

Юқиридики аваз улинишидин, дуня уйғур қурултийи рәиси рабийә қадир ханим вә муавин рәиси өмәр қанатниң испанийәдә туруп бәргән мәлуматиниң тәпсилатини аңлиғайсиләр.

Пикирләр (0)
Share
Толуқ бәт