Явропа парламентида «уйғурларниң етиқад вә саяһәт әркинликиниң чәклиниши» темисида илмий муһакимә йиғини өткүзүлди

Ихтиярий мухбиримиз әкрәм
2017-03-29
Елхәт
Пикир
Share
Принт

29-Март чүштин бурун явропа парламентида өткүзүлгән «уйғурларниң етиқад вә саяһәт әркинликиниң чәклиниши» темисидики илмий муһакимә йиғини нәтиҗилик ахирлашти.

Д у қ тәрипидин уюштурулған уйғур яшлирини демократийә, кишилик һоқуқ вә қануний билимләр билән тәрбийиләш программисиниң муқәддимисидә, 29-март күни явропа парламентиниң йиғин залида «уйғурларниң етиқад вә саяһәт әркинликиниң чәклиниши» темисида илмий муһакимә йиғини өткүзүлди.

Явропа парламентида өткүзүлгән мәзкур йиғинға 15 дөләттин кәлгән уйғур яшлар вәкиллиридин сирт, явропа либерал демократлар партийисиниң вәкили, явропа иттипақи ташқи ишлар комитети хадими, парламент әзаси ваҗгер әпәнди, парламент әзаси, уйғурларниң явропа иттипақидики актип қоллиғучиси, мәзкур йиғин үчүн явропа парламентида земин һазирлап бәргән илһан күчүк әпәнди, явропа парламенти либерал демократлар партийиси вәкили, парламент әзаси териноса қатарлиқ явропа парламентиниң бир қисим милләт вәкиллири һәмдә у н п о, хәтәр астидики милләтләрни қоғдаш тәшкилати, хәлқара кәчүрүм тәшкилати қатарлиқ тәшкилатларниң вәкиллири болуп көп санда киши қатнашти.

Саәт 9:00 билән башланған бу йиғинға, у н п о хадими лусия ханим риясәтчилик қилди. Йиғинда илһан күчүк, териноса қатарлиқ парламент әзалири, өмәр қанат, һанно шедлер, нури түркәл, питер ирвен, зубәйрә шәмшидин, мәттен, әмәт, долқун әйса.... Қатарлиқ һәрқайси әлләрдин кәлгән кишилик һоқуқ паалийәтчилири, тәшкилат вәкиллири вә зиялийлар нутуқ сөзләп, хитайниң уйғур диярида елип бериватқан диний җәһәттики қаттиқ бастуруш сиясити, диний затларниң қолға елиниш, қамилиш мәсилилири, уйғурларниң паспортлириниң йиғивелиниши, дөләт атлап саяһәт қилишниң чәклиниши, бир юрттин йәнә бир юртқа яки мәһәллидин ‏-мәһәллигә бериштин ибарәт әқәллий йөткилиш әркинлики, саяһәт әркинликиниң қамал қилиниватқанлиқи, йол ‏-йолда қурулған тәкшүрүш понкитлири, ян телефонларниң контрол қилиниши, интернетларниң чәклиниши, қалаймиқан тутуп тәкшүрүлүш қатарлиқ уйғурларниң бешиға келиватқан зулумларға аит кәң саһәләрдә доклатлар тәқдим қилди.

4 Саәт давам қилған бу йиғинда йәнә, дуняниң һәр йеридә сәрсан болуп йүргән уйғур мусапирлири мәсилиси, пакистан, һиндонезийә, тайланд қатарлиқ бир қисим әлләрниң уйғур сиясий панаһлиқ тилигүчиләрни хитайға қайтуруп бәргәнликидәк б д т ниң мунасивәтлик бәлгилимилиригә еғир дәриҗидә хилаплиқ қилиш мәсилилириму оттуриға қоюлди. Түркийә қатарлиқ әлләрдә қейин турмуш көчүрүватқан уйғур мусапирлири мәсилисиму муһакимә қилинди. Йиғин җәрянида соал-җаваб үчүн вақит аҗритилип, йиғин әһлиниң чүшәнмигән мәсилилиригә изаһлар берилди.

Д у қ баш катипи долқун әйса әпәнди сөзидә, бу қетимқи йиғинниң д у қ, у н п о һәм явропа парламенти әзалириниң ортақ күч чиқириши билән оңушлуқ өткүзүлгәнликини әскәртти.

Д у қ муавин рәиси өмәр қанат әпәнди бүгүнки йиғин һәққидә нәқ мәйданда зияритимизни қобул қилғанда, бу йиғинниң явропа парламенти хадимлириға муһим бир доклат тәқдим қилиш пурсити яритип берипла қалмай, дуняниң һәр йеридин кәлгән 50 әтрапидики уйғур яшлири үчүн әһмийәтлик бир дәрс болғанлиқини тилға алди.

Бу қетимқи йиғин мунасивити билән зияритимизни қобул қилған шиветсийәдин кәлгән бир яш йиғин һәққидики тәсиратлирини баян қилди. Бу йиғинға қатнашқан исмини ашкарилашни халимиған йәнә бир қизму йиғиндин көп савақ алғанлиқини тәкитлиди. Бу һәқтә малайшиядин келип йиғинға қатнашқан йәнә бир қизму зияритимизни қобул қилди.

Йиғин 4 саәт давам қилип ахирлашти. Йиғиндин кейин уйғур вәкилләр саәт 13:00-15:00 гә қәдәр тәшкиллик һалда явропа парламентиниң хизмәт бинасини зиярәт қилди вә явропа парламенти, явропа комиссийони һәмдә явропа кеңишиниң хизмәт функсиюни һәққидә мәхсус дәрс аңлиди.

Пикирләр (0)
Share
Толуқ бәт