Yawropa parlaméntida "Uyghurlarning étiqad we sayahet erkinlikining cheklinishi" témisida ilmiy muhakime yighini ötküzüldi

Ixtiyariy muxbirimiz ekrem
2017-03-29
Élxet
Pikir
Share
Print

29-Mart chüshtin burun yawropa parlaméntida ötküzülgen "Uyghurlarning étiqad we sayahet erkinlikining cheklinishi" témisidiki ilmiy muhakime yighini netijilik axirlashti.

D u q teripidin uyushturulghan Uyghur yashlirini démokratiye, kishilik hoquq we qanuniy bilimler bilen terbiyilesh programmisining muqeddimiside, 29-mart küni yawropa parlaméntining yighin zalida "Uyghurlarning étiqad we sayahet erkinlikining cheklinishi" témisida ilmiy muhakime yighini ötküzüldi.

Yawropa parlaméntida ötküzülgen mezkur yighin'gha 15 dölettin kelgen Uyghur yashlar wekilliridin sirt, yawropa libéral démokratlar partiyisining wekili, yawropa ittipaqi tashqi ishlar komitéti xadimi, parlamént ezasi wajgér ependi, parlamént ezasi, Uyghurlarning yawropa ittipaqidiki aktip qollighuchisi, mezkur yighin üchün yawropa parlaméntida zémin hazirlap bergen ilhan küchük ependi, yawropa parlaménti libéral démokratlar partiyisi wekili, parlamént ezasi térinosa qatarliq yawropa parlaméntining bir qisim millet wekilliri hemde u n p o, xeter astidiki milletlerni qoghdash teshkilati, xelq'ara kechürüm teshkilati qatarliq teshkilatlarning wekilliri bolup köp sanda kishi qatnashti.

Sa'et 9:00 bilen bashlan'ghan bu yighin'gha, u n p o xadimi lusiya xanim riyasetchilik qildi. Yighinda ilhan küchük, térinosa qatarliq parlamént ezaliri, ömer qanat, hanno shédlér, nuri türkel, pitér irwén, zubeyre shemshidin, mettén, emet, dolqun eysa.... Qatarliq herqaysi ellerdin kelgen kishilik hoquq pa'aliyetchiliri, teshkilat wekilliri we ziyaliylar nutuq sözlep, xitayning Uyghur diyarida élip bériwatqan diniy jehettiki qattiq basturush siyasiti, diniy zatlarning qolgha élinish, qamilish mesililiri, Uyghurlarning pasportlirining yighiwélinishi, dölet atlap sayahet qilishning cheklinishi, bir yurttin yene bir yurtqa yaki mehellidin ‏-mehellige bérishtin ibaret eqelliy yötkilish erkinliki, sayahet erkinlikining qamal qiliniwatqanliqi, yol ‏-yolda qurulghan tekshürüsh ponkitliri, yan téléfonlarning kontrol qilinishi, intérnétlarning cheklinishi, qalaymiqan tutup tekshürülüsh qatarliq Uyghurlarning béshigha kéliwatqan zulumlargha a'it keng sahelerde doklatlar teqdim qildi.

4 Sa'et dawam qilghan bu yighinda yene, dunyaning her yéride sersan bolup yürgen Uyghur musapirliri mesilisi, pakistan, hindonéziye, tayland qatarliq bir qisim ellerning Uyghur siyasiy panahliq tiligüchilerni xitaygha qayturup bergenlikidek b d t ning munasiwetlik belgilimilirige éghir derijide xilapliq qilish mesililirimu otturigha qoyuldi. Türkiye qatarliq ellerde qéyin turmush köchürüwatqan Uyghur musapirliri mesilisimu muhakime qilindi. Yighin jeryanida so'al-jawab üchün waqit ajritilip, yighin ehlining chüshenmigen mesililirige izahlar bérildi.

D u q bash katipi dolqun eysa ependi sözide, bu qétimqi yighinning d u q, u n p o hem yawropa parlaménti ezalirining ortaq küch chiqirishi bilen ongushluq ötküzülgenlikini eskertti.

D u q mu'awin re'isi ömer qanat ependi bügünki yighin heqqide neq meydanda ziyaritimizni qobul qilghanda, bu yighinning yawropa parlaménti xadimlirigha muhim bir doklat teqdim qilish pursiti yaritip béripla qalmay, dunyaning her yéridin kelgen 50 etrapidiki Uyghur yashliri üchün ehmiyetlik bir ders bolghanliqini tilgha aldi.

Bu qétimqi yighin munasiwiti bilen ziyaritimizni qobul qilghan shiwétsiyedin kelgen bir yash yighin heqqidiki tesiratlirini bayan qildi. Bu yighin'gha qatnashqan ismini ashkarilashni xalimighan yene bir qizmu yighindin köp sawaq alghanliqini tekitlidi. Bu heqte malayshiyadin kélip yighin'gha qatnashqan yene bir qizmu ziyaritimizni qobul qildi.

Yighin 4 sa'et dawam qilip axirlashti. Yighindin kéyin Uyghur wekiller sa'et 13:00-15:00 ge qeder teshkillik halda yawropa parlaméntining xizmet binasini ziyaret qildi we yawropa parlaménti, yawropa komissiyoni hemde yawropa kéngishining xizmet funksiyuni heqqide mexsus ders anglidi.

Toluq bet