پىچان لۈكچۈندىكى ساقچىخانىغا ئوت قويۇپ ھۇجۇم قىلىش ۋەقەسىدە ئاز دېگەندە 45 كىشى ئۆلگەن

مۇخبىرىمىز شۆھرەت ھوشۇر
2013-06-27
ئېلخەت
پىكىر
Share
پرىنت
پىچان ناھىيىسى لۈكچۈن بازىرىدا يۈز بەرگەن توقۇنۇشتىن بىر كۆرۈنۈش. 2013-يىلى 26-ئىيۇن.
پىچان ناھىيىسى لۈكچۈن بازىرىدا يۈز بەرگەن توقۇنۇشتىن بىر كۆرۈنۈش. 2013-يىلى 26-ئىيۇن.
t2.qpic.cn/mblogpic

بۈگۈن مۇخبىرىمىزنىڭ پىچان لۈكچۈندە يۈز بەرگەن ساقچىخانىغا ئوت قويۇپ ھۇجۇم قىلىش ۋەقەسى ھەققىدە يەرلىك دائىرىلەر ۋە ئاھالىلەردىن ئىگىلىگەن ئۇچۇرلىرىدىن مەلۇم بولۇشىچە، ۋەقەدە ھۆكۈمەت تەرەپتىن ئاز دېگەندە 35 كىشى، ھۇجۇمچىلاردىن 11 كىشى ئۆلگەن.

تۈنۈگۈن ئۆلۈم مۇراسىملىرى ئۈچۈن  35 كېپەن سېتىۋېلىنغانلىقىنى ئاشكارىلىغان بىر مەھەللە ئىمامىنىڭ بىلدۈرۈشىچە، تۈنۈگۈن ھۆكۈمەت تەرەپتىن ئۆلگەنلەرنىڭ ھەممىسى يەرلىكىدە قويۇلۇپ بولغان. ئەمما ھۇجۇمچىلاردىن ئۆلگەنلەرنىڭ جەسىتى تېخى بىر تەرەپ قىلىنمىغان. يەنە ئاشكارىلىنىشىچە، ھۇجۇمچىلاردىن ئامان قالغانلارنى قوغلاپ تۇتۇش ئۈچۈن  تۈنۈگۈن چۈش مەزگىلىدە خىتاينىڭ ئىككى تىك ئۇچار ئايروپىلانى لۈكچۈندە چارلاش ئېلىپ بارغان. تۆۋەندە مۇخبىرىمىز شۆھرەت ھوشۇردىن بۇ ھەقتە تەپسىلىي مەلۇمات ئاڭلايسىلەر:

******
مۇخبىر: بۇ پىچان بازارلىق ساقچىخانىمۇ؟
خادىم: شۇنداق، بازارلىق ساقچىخانا.
مۇخبىر: ئەمىسە ماڭا جىداۋيۈەننى چاقىرىپ بېقىڭ.
خادىم: جىداۋيۇەن ھۈسەن سادىق، تېلېفونى......

*******
مۇخبىر: جىداۋيۈەن ھۈسەن سادىقمۇ؟
ساقچى: شۇنداق، مەن شۇ؟
مۇخبىر: مۇقىملىق تەدبىرلىرى قانداقراق ئېلىنىۋاتىدۇ؟
ساقچى: شۇ، ئۆي ۋە يول تەكشۈرەۋاتىمىز، نۆۋەتتە تۇرۇۋاتىمىز.
مۇخبىر: ۋەقەدە قانچە كىشى ئۆلگەن بولدى؟
ساقچى: بۇ ئىشلارنى ھېچقانداق ئادەمگە دېمەڭلار دېگەن، شۇڭا ناھىيىلىك قوماندانلىق شتاپىدىن سوراڭ.

*******

مۇخبىر: ۋەي بۇ لۈكچۈنمۇ؟

ئاھالە: شۇنداق، بۇ لۈكچۈن.
مۇخبىر: لۈكچۈندىكى ۋەقە ھەققىدە نېمىلەرنى ئاڭلىدىڭلار؟
ئاھالە: پىچاندىكى ئۇرۇق ‏- تۇغقانلار تېلېفون قىپتىكەن، سىلەر تەرەپتىن دوختۇرخانىغا يارىدارلارنى ئەكىلىۋاتىدۇ، ئامانمۇ سىلەر دەپ،  بىز تىنچ-ئامان دېيىشتۇق.
مۇخبىر: تۇققانلىرىڭلار نېمە دەپ ئاڭلاپتۇ، نېمە دېدى؟
ئاھال ە: 40 نەچچە ئادەم ئۆلۈپتۇ دەپ ئاڭلاپتۇ.
مۇخبىر: ئۆلگەن بۇ 40 نەچچە ئادەم ئوقتا ئۆلگەنلەرمىكەن، ئوتتىمۇ ياكى پىچاقتىمۇ؟
ئاھالە: ھەممىسى ئوخشايدۇ.
مۇخبىر: ۋەزىيەت قانداق ھازىر لۈكچۈندە؟
ئاھالە: چارلاش-تەكشۈرۈش ئېلىپ بېرىلىۋاتىدۇ، ئۆيدىن تالاغا چىقالمىدۇق.
مۇخبىر: نېمىلەرنى كۆردىڭىز چارلاش ئىشلىرىدىن؟
ئاھالە: چۈشلەر بىلەن گۈرۈلدەپ ئاۋاز چىقىپ كەتتى، سىرتقا چىقىپ قارىسام، تىك ئۇچار ئايروپىلان ئىكەن. بۇنداق پەس ئۇچقاننى كۆرمىگەنتىم؛ دەرەخ بويىلام ئۇچتى.
مۇخبىر: ئۇنداقتا، ئامان قالغان گۇماندارلارنى قوغلاپ تۇتۇش ئۈچۈن ھەرىكەت قىلغان تىك ئۇچار ئوخشىمامدۇ؟
ئاھالە: شۇنداق چېغى، ئايروپىلاننى ساي تەرەپكە چۈشتى دېيىشتى، ساي بىزدىن يىراق بولغاچقا، ئۇ يەردە نېمە ئىش بولغىنىنى ئۇقمىدۇق.

********
مۇخبىر: بۈگۈن ۋەقەدە ئۆلگەنلەرنى يەرلىكىدە قويغان  ئىمام سىز بولامسىز؟
ئىمام: ھە، مەن شۇ؟
مۇخبىر: سىز قانچە كىشىنىڭ دەپنە مۇراسىمىگە قاتناشتىڭىز؟
ئىمام: بىزنى بىرقانچە يەرگە بۆلۈۋەتتى، مەن ئۈچىگە باردىم.
مۇخبىر: ۋەقەدە جەمئىي قانچە كىشى ئۆلۈپتۇ؟
ئىمام: قانچە كىشى ئۆلگەنلىكىنى ئۇقتۇرمىدى، كېپەننىڭ سانىغا قارىغاندا 35 .
مۇخبىر: تۈنۈگۈن 35 كىشىنىڭ دەپنە مۇراسىمى بولدىمۇ؟
ئىمام: شۇنداق.
مۇخبىر: ھەممىسى سىلەرنىڭ مەھەللىدىنمۇ؟
ئىمام: ياق، كارىز، مۇقام، دۆلەتباغ قاتارلىق.....
مۇخبىر: ئۆلگەنلەرنىڭ ئىچىدە خەنزۇلار قانچە ئىكەن؟
ئىمام: 7 ‏-8 ى بار ئوخشايدۇ.
مۇخبىر : ئۆلگۈچىلەر كىملەر ئىكەن؟
ئىمام: يىغىندا ئۇقتۇرۇلۇشىچە، كۆپىنچىسى ساقچى - مىنبىڭ.
مۇخبىر: ۋەقەنىڭ جەريانىنى قانداق دەپ ئۇقتۇردى؟
ئىمام: ئاۋۋال ساقچىخانىغا ئوت قويۇپتۇ، ئاندىن يېزىلىق ھۆكۈمەتكە.
مۇخبىر: سىز دەپنە مۇراسىمىغا قاتناشقان ساقچى قانداق ئۆلتۈرۈلۈپتۇ؟
ئىمام: قوينى ئۆلتۈرگەندەكلا ئۆلتۈرىۋېتىپتۇ، بوينىدىن كېسىپ.
مۇخبىر: بوغۇزلىنىپتۇ-دە ئەمىسە؟
ئىمام : شۇنداق، بوغۇزلىنىپتۇ.
مۇخبىر: گۇماندارلارنىڭ ئۆلۈم مۇراسىمىغا باردىڭىزمۇ؟
ئىمام: ياق، ئۇ ۋاھابىيلار بىلەن بىزنىڭ چاتىقىمىز يوق، ئۇلارنىڭ جەسىتى ساقچىنىڭ قولىدا.
مۇخبىر: ئۇنداقتا سىز دېگەن 35 كېپەن پەقەت ھۆكۈمەت تەرەپتىن ئۆلگەنلەر ئۈچۈنلا تەييارلانغان ، شۇنداقمۇ؟
ئىمام: شۇنداق.
مۇخبىر: كېپەنلەرنى سىز نەدە كۆردىڭىز، كىملەر بىلەن كۆردىڭىز؟
ئىمام: يېزىلىق بىرلىكسەپ خادىمىنىڭ ئۆيىدە، ۋىلايەتلىك ساقچى ۋە ئاپتونوم رايوندىن كەلگەن باشلىقلارمۇ بار.

ھۆرمەتلىك رادىئو ئاڭلىغۇچىلار، يۇقىرىقى مەلۇماتلاردىن قارىغاندا، ۋەقەدە ھۆكۈمەت تەرەپتىن ئاز دېگەن 35 كىشى، پىدائىيلاردىن 11 كىشى ئۆلگەن. پىچاندىكى ۋەزىيەت يەنىلا جىددىي ھالەتتە تۇرماقتا.

پىكىرلەر (1)
Share

ئىسىمسىز ئوقۇرمەن

新疆和田发生暴力袭击案件 伤亡人数正在核实
2013年06月28日 1719
|

据央视报道,今日中午,新疆维吾尔自治区和田市发生一起暴力袭击案件。目前,事件已得到有效处置,伤亡人数正在核实中。

- See more at: http://www.zaobao.com.sg/realtime/china/story20130628-221714#sthash.cyBcvauy.dpuf

Jun 28, 2013 05:39 AM

تولۇق بەت