Gumida ahaliler kündüzi noruz ötküzüp, kéchisi mesile tapshurghan

Muxbirimiz shöhret hoshur
2017-03-21
Élxet
Pikir
Share
Print
Xoten wilayetlik hökümet "Térrorluq, zorawanliq" qa da'ir yip uchi bilen teminligenlerni 5 milyon somghiche mukapatlaydighanliqini jakarlash yighini. 2017-Yili 22-féwral.
Xoten wilayetlik hökümet "Térrorluq, zorawanliq" qa da'ir yip uchi bilen teminligenlerni 5 milyon somghiche mukapatlaydighanliqini jakarlash yighini. 2017-Yili 22-féwral.
ts.cn


Bügün xitayning tengritagh torida guma nahiyisining chyawda yézisida 4000 kishilik noruz ötküzülgenliki xewer qilindi. Muxbirimizning éniqlishiche, chyawdadikisi gumida ötküzülgen noruz pa'aliyitining kichikreki bolup, uningdinmu kattisi gumaning piyalima yézisida ötküzülgen. Emma, piyalimada shu küni kechte mesile tapshurush yighinimu dawamliq halda ötküzülüp, kishiler atalmish xataliqlirini pash qilishqa qistalghan. Melum bolushiche, noruz katta ötküzülgen piyalima yézsida nöwette 150 che kishi mesilisini chala tapshurghanliqi üchün qamaqta tutulmaqta.

Hörmetlik radiyo anglighuchilar, melumki guma nahiyisi yéqinqi yillardin béri milliy qarshiliq heriketlirining qétim sani we shidditi jehette Uyghur rayoni boyiche aldinqi orunda turup keldi. Shunga da'iriler 2014-yili bashlan'ghan qattiq zerbe bérish dolqunidimu, bu yil bashlan'ghan mesile tapshurush herikitidimu gumini muhim nuqta qildi. Xitay axbaratidin melum bolushiche, birqanche yildin béri, qattiq zerbe bérish herikiti wehimilik dawam qilghan guma nahiyiside bu yil noruzmu daghdughiliq ötken, emma oxshash künde mesile tapshurush herikitimu toxtimighan. Gumidiki sékritar we saqchi xadimlirining gumining noruz kunidiki weziyiti heqqidiki bayanliri bu nuqtini yurutup bermekte.

Melum bolushiche, gumining piyalima yézisi 7 kenttin teshkillen'gen bolup, nopusi 12 ming etrapida. Yuqirida ashkarilinishiche, piyalimadiki, 1400 nopusqa ige 3-kenttin 18 kishi mesilisini chala tapshurghanliqi üchün qamaqta. Muhajirettiki Uyghur közetküchiler, bu sanliq melumat we gumaning nahiyisining siyasiy weziyitige asasen, atalmish mesili'ini chala tapshurush seweblik, piyalima yézisida 150che kishining, guma nahiyisi boyiche minglarche kishining qamaqta ikenlikini perez qilishmaqta. Emma, gumidiki noruzni daghdughiliq xewer qilghan xitay da'iriliri, bu mesile tapshurush herikiti heqqide hazirghiche héchqandaq uchur bermidi.

Toluq bet