Мунәввәр өзуйғур ханим рәҗәп таййип әрдоғанға уйғурларниң вәзийитини аңлатти

Ихтиярий мухбиримиз әркин тарим
2018-03-09
Елхәт
Пикир
Share
Принт
Мунәввәр өзуйғур ханим түркийә дөләт рәиси рәҗәп таййип әрдоған «8-март хәлқара аяллар байрими» мунасивити билән орунлаштурған йиғилишта. 2018-Йили 7-март. Әнқәрә, түркийә.
Мунәввәр өзуйғур ханим түркийә дөләт рәиси рәҗәп таййип әрдоған «8-март хәлқара аяллар байрими» мунасивити билән орунлаштурған йиғилишта. 2018-Йили 7-март. Әнқәрә, түркийә.
RFA/Erkin Tarim

«8-Март хәлқара аяллар байрими» мунасивити билән 7-март күни әтигәндә түркийә дөләт рәиси рәҗәп таййип әрдоған, чүштин кейин түркийә парламенти инсан һәқ-һоқуқлири комиссийониниң мәсули өмәр сәрдар әпәнди дуняниң һәрқайси дөләтлиридин кәлгән шундақла түркийәдики аяллар аммиви тәшкилатлириниң вәкиллирини қобул қилди.

Мәзкур қобулда мунәввәр өзуйғур ханим дөләт рәисигә уйғурларниң еғир вәзийити тоғрисида мәлумат бәргән. У, радийомиз зияритини қобул қилип, бу һәқтә мундақ деди: «дөләт рәиси 55 дөләттин кәлгән аял вәкилләр, 7 нәпәр милләт вәкили, җәнубий африқиниң сабиқ дөләт рәиси нелсун манделаниң келини вә нәврисини қобул қилди. Бизни чүш саәт 12 дин 12 йеримгичә қобул қилди.»

Мунәввәр өзуйғур ханим дөләт рәиси рәҗәп таййип әрдоғанниң нуқтилиқ һалда дуняниң һәрқайси җайлиридики инсан һәқ-һоқуқлири дәпсәндичилики һәққидә тохталғанлиқини баян қилип мундақ деди: «рәис җумһур әрдоған нуқтилиқ һалда дуняниң һәрқайси җайлиридики инсан һәқ-һоқуқлири дәпсәндичилики тоғрисида тохталди.»

У, түркийә дөләт рәиси рәҗәп таййип әрдоған қисқа сөз қилғандин кейин аялларни сөзгә тәклип қилғанлиқини, өзиниң сөз қилип уйғурларниң һазирқи еғир вәзийити тоғрисида мәлумат бәргәнликини баян қилди вә мундақ деди: «у йәрдә мән шуларни дедим. Мән шәрқий түркистан аммиви тәшкилатлириға вакалитән бу йәргә кәлгәнликимни, пүтүн шәрқий түркистанлиқларниң салимини елип кәлгәнликимни ейттим. Униңдин кейин авази боғулуп қалған шәрқий түркистанлиқларниң йоқ болуш хәвпигә дучар болуватқанлиқини, униң үчүн дунядики мәзлумларниң дәрдини аңлатқан вақтимизда уйғурларниңму авазини аңлитишимиз керәкликини тәкитлидим.»

Мунәввәр өзуйғур ханим 7-март күни түркийә дөләт рәиси рәҗәп таййип әрдоғанниң ханими әминә ханим билән бирликтә вәкилләрни қобул қилғанлиқини, қобул қилиш ахирлашқандин кейин өзиниң әминә әрдоғанға көк байрақта ясалған шарпа совғат қилғанлиқини баян қилип мундақ деди: «қобул ахирлашқандин кейин әминә әрдоған ханимға шарпа совғат қилдим. Сиз билән бурунму көрүшкән идуқ, бизни унтуп қалмаң дәп шарпиниң үстидики аял қәһриманимиз нузугум тоғрисида мәлумат бәрдим. Әминә ханим пүтүн шәрқий түркистанлиқ қериндашлиримизға салам дәң, аллаһ ярдәм қилсун деди.»

Мунәввәр өзуйғур ханим дөләт рәиси рәҗәп таййип әрдоғанғиму көк шарпа тәқдим қилғанлиқини баян қилип мундақ деди: «мән пакистанлиқ аялдин кейинла рәҗәп таййип әрдоғанға шарпа бериветип, ‹бизни унтуп қалмаң' дедим, дөләт рәисиму ‹иншаалла' дәп җаваб бери.»

Игилишимизчә, 110 әтрапидики ханим-қизлардин тәркиб тапқан һәйәтни 7-март чүштин кейин түркийә парламенти инсан һәқлири комиссийониниң башлиқи өмәр сәрдар әпәнди билән парламент әзаси фатма бән ханим қобул қилған. Мәзкур учришишта 3 аял сөз қилған болуп, булардин бири уйғур аял мунәввәр өзуйғур ханим икән. У, уйғур дияриниң нөвәттики еғир вәзийити тоғрисида мәлумат бәргәнликини баян қилди.

Мунәввәр өзуйғур ханим түркийә парламенти инсан һәқлири комиссийонида уйғур ханим-қизлириниң вәзийити аңлатқандин кейин, уларниң бу мәсилигә көңүл бөлидиғанлиқини билдүргәнликини ейтти. 

Аял һәйәтләр ичидин орун алған уйғур аял паалийәтчи мәрзийә керәм ханим зияритимизни қобул қилип, уйғур аяллириға вакалитән мунәввәр өзуйғур ханимниң көрүшкәнликини, буниң миллий дәва үчүн пайдилиқ болидиғанлиқини баян қилди.

Шәрқий түркистан маарип вә һәмкарлиқ тәшкилатиниң рәиси һидайәтуллаһ оғузхан әпәндиму зияритимизни қобул қилип, уйғур аяллириниң дөләт рәиси вә түркийә парламенти инсан һәқ-һоқуқлири комиссийониға уйғурлар вәзийитини аңлитишниң зор үнүми болидиғанлиқини илгири сүрди. 

Биз бу һәқтә мәлумат игиләш үчүн түркийә парламенти инсан һәқ-һоқуқлири комиссийониниң башлиқи өмәр сәрдар әпәндигә телефон қилған болсақму, йиғинда болғанлиқ сәвәбидин телефонимизға җаваб берәлмиди. Мунәввәр өзуйғур ханим шәрқий түркистан тәшкилатлири мунбиригә вакалитән бу паалийәткә иштирак қилған болуп, бу уйғур аяллириниң тунҗи қетим түркийәниң әң алий рәһбиригә уйғурларниң еғир вәзийитини аңлитиши һесаблинидикән.

Пикирләр (0)
Share
Толуқ бәт