Шиветсийәдә өткүзүлгән миллий гөрүшниң «қуран дастихини» намлиқ паалийитидә уйғур мәсилиси аңлитилди

Ихтиярий мухбиримиз еһсан
2016-05-09
Елхәт
Пикир
Share
Принт
«Қуран дастихини» намлиқ паалийәткә тәклип билән қатнашқан түркийә 7-қаналниң диний программа риясәтчиси өмәр дөңгәл оғли уйғур маарип уюшмисиниң бир қисим әзалири билән. 2016-Йили 8-май, шиветсийә.
«Қуран дастихини» намлиқ паалийәткә тәклип билән қатнашқан түркийә 7-қаналниң диний программа риясәтчиси өмәр дөңгәл оғли уйғур маарип уюшмисиниң бир қисим әзалири билән. 2016-Йили 8-май, шиветсийә.
RFA/Éhsan

Шиветсийәдә паалийәт қиливатқан «миллий гөрүш » тәшкилатиниң «қуран дастихини» паалийитигә уйғурларму алаһидә тәклип билән қатнашти.

Паалийәт 8-май күни, ситокһолмдики «әләзәр» мәктипиниң паалийәт залида өткүзүлди.

Паалийәткә түркийәдин алаһидә тәклип қилинған 7-қаналниң диний программа риясәтчиси өмәр дөңгәл оғли вә мәркизи германийәдики «миллий гөрүш» тәшкилатиниң баш мәслиһәтчиси рамизан учар, уйғур маарип уюшмисиниң муавин рәиси әхмәтҗан турсун башчилиқида һәйәт әзалири вә шиветсийәдә яшаватқан түркләрдин болуп 500 дин артуқ киши қатнашти.

Бу паалийәттә явропадики қуран мусабиқисидә биринчиликкә еришкән қарилар қуран тилавәт қилиш билән биргә «миллий гөрүш »тәшкилатиниң һәр қайси дөләтләрдики пиқирларға қиливатқан ярдәмлири, хизмәтлири филимлик көрситилди.

Баш мәркизи германийәдики «миллий гөрүш» тәшкилати һәр йили қурбан һейт мәзгилидә, уйғур дияриға мәхсус адәм әвәтип қурбанлиқ қилип, шу йәрдики уйғур хәлқигә қурбанлиқ гөш тәқсим қилип кәлмәктә.

Биз бу паалийәт әһвалини хәвәр қиливатқан түркийәниң анадоли хәвәр агентлиқиниң шиветсийәдә турушлуқ мухбири атиллани, 1-май күни хитай даирилириниң алтай вилайитидә бәлгилимә чиқирип, партийә кадирлириниң тойда никаһ оқутушини чәклигәнликигә даир хәвәрләр тарқалғанлиқини бу хәвәргә қарита көз қаришини елиш үчүн зиярәт қилдуқ.

У зияритимизни қобул қилип, хитай даирилириниң бу хил қилмишини әйибләп мундақ деди: «явропадики дөләтләр болса, мусулман дөләтләрдин кәлгән имамларниң, шу йәрдә яшаватқан мусулманларниң никаһини оқушиға рухсәт қилиду. явропаға охшаш христиан диниға етиқад қилидиған дөләтләрдә бундақ бир бәлгилимә турса, шәрқий түркистандики мусулман уйғурларға хитай даирилириниң бундақ бәлгилимиләрни чиқириши кишилик һоқуқиға вә башқа шу йәрниң қанунлириға уйғун кәлмигән бир һәрикәт. Хәлқара кишилик һоқуқ тәшкилатлири вә явропа бирлики қатарлиқ хәлқаралиқ тәшкилатлар бу мәсилидә хитайға бесим қилиш керәк.

21-Әсирдә хитай даирилириниң шәрқий түркистанда елип бериватқан сиясәтлири, инсанларниң әқли қобул қилалмиғудәк дәриҗидә, дуняниң һечқандақ җайида мусулманларниң никаһини чәкләйдиған қанун-бәлгилимиләрни көрмидуқ. Бу, хитай даирилириниң ирқий қирғинчилиққа охшаш бир бәлгилимисидур. Бу, уйғурларни той қилма, бала тапма, нәслиң қуруп түгисун, дегәндин башқа нәрсә әмәс.»

Биз уйғурларға вакалитән тәклип билән паалийәткә қатнашқан уйғур маарип уюшмисиниң муавин рәиси әхмәтҗан турсунни зиярәт қилдуқ.

Әхмәтҗан турсун паалийәт җәрянида, уйғур мәсилисини аңлатқанлиқини баян қилди.

Паалийәт давамида, уйғур маарип уюшмисиниң муавин рәиси әхмәтҗан турсун, өмәр дөңгәл оғли вә мәркизи германийәдики «миллий гөрүш» тәшкилатиниң баш мәслиһәтчиси рамизан учар әпәндимләргә уйғур маарип уюшмиси тәрипидин лайиһилинип бастурулған шарпа һәдийә қилди.

Пикирләр (0)
Share
Толуқ бәт