Shiwétsiyede ötküzülgen milliy görüshning "Qur'an dastixini" namliq pa'aliyitide Uyghur mesilisi anglitildi

Ixtiyariy muxbirimiz éhsan
2016-05-09
Élxet
Pikir
Share
Print
"Qur'an dastixini" namliq pa'aliyetke teklip bilen qatnashqan türkiye 7-qanalning diniy programma riyasetchisi ömer dönggel oghli Uyghur ma'arip uyushmisining bir qisim ezaliri bilen. 2016-Yili 8-may, shiwétsiye.
"Qur'an dastixini" namliq pa'aliyetke teklip bilen qatnashqan türkiye 7-qanalning diniy programma riyasetchisi ömer dönggel oghli Uyghur ma'arip uyushmisining bir qisim ezaliri bilen. 2016-Yili 8-may, shiwétsiye.
RFA/Éhsan

Shiwétsiyede pa'aliyet qiliwatqan "Milliy görüsh " teshkilatining "Qur'an dastixini" pa'aliyitige Uyghurlarmu alahide teklip bilen qatnashti.

Pa'aliyet 8-may küni, sitokholmdiki "El'ezer" mektipining pa'aliyet zalida ötküzüldi.

Pa'aliyetke türkiyedin alahide teklip qilin'ghan 7-qanalning diniy programma riyasetchisi ömer dönggel oghli we merkizi gérmaniyediki "Milliy görüsh" teshkilatining bash meslihetchisi ramizan uchar, Uyghur ma'arip uyushmisining mu'awin re'isi exmetjan tursun bashchiliqida hey'et ezaliri we shiwétsiyede yashawatqan türklerdin bolup 500 din artuq kishi qatnashti.

Bu pa'aliyette yawropadiki qur'an musabiqiside birinchilikke érishken qarilar qur'an tilawet qilish bilen birge "Milliy görüsh "teshkilatining her qaysi döletlerdiki piqirlargha qiliwatqan yardemliri, xizmetliri filimlik körsitildi.

Bash merkizi gérmaniyediki "Milliy görüsh" teshkilati her yili qurban héyt mezgilide, Uyghur diyarigha mexsus adem ewetip qurbanliq qilip, shu yerdiki Uyghur xelqige qurbanliq gösh teqsim qilip kelmekte.

Biz bu pa'aliyet ehwalini xewer qiliwatqan türkiyening anadoli xewer agéntliqining shiwétsiyede turushluq muxbiri atillani, 1-may küni xitay da'irilirining altay wilayitide belgilime chiqirip, partiye kadirlirining toyda nikah oqutushini chekligenlikige da'ir xewerler tarqalghanliqini bu xewerge qarita köz qarishini élish üchün ziyaret qilduq.

U ziyaritimizni qobul qilip, xitay da'irilirining bu xil qilmishini eyiblep mundaq dédi: "Yawropadiki döletler bolsa, musulman döletlerdin kelgen imamlarning, shu yerde yashawatqan musulmanlarning nikahini oqushigha ruxset qilidu. Yawropagha oxshash xristi'an dinigha étiqad qilidighan döletlerde bundaq bir belgilime tursa, sherqiy türkistandiki musulman Uyghurlargha xitay da'irilirining bundaq belgilimilerni chiqirishi kishilik hoquqigha we bashqa shu yerning qanunlirigha uyghun kelmigen bir heriket. Xelq'ara kishilik hoquq teshkilatliri we yawropa birliki qatarliq xelq'araliq teshkilatlar bu mesilide xitaygha bésim qilish kérek.

21-Esirde xitay da'irilirining sherqiy türkistanda élip bériwatqan siyasetliri, insanlarning eqli qobul qilalmighudek derijide, dunyaning héchqandaq jayida musulmanlarning nikahini chekleydighan qanun-belgilimilerni körmiduq. Bu, xitay da'irilirining irqiy qirghinchiliqqa oxshash bir belgilimisidur. Bu, Uyghurlarni toy qilma, bala tapma, nesling qurup tügisun, dégendin bashqa nerse emes."

Biz Uyghurlargha wakaliten teklip bilen pa'aliyetke qatnashqan Uyghur ma'arip uyushmisining mu'awin re'isi exmetjan tursunni ziyaret qilduq.

Exmetjan tursun pa'aliyet jeryanida, Uyghur mesilisini anglatqanliqini bayan qildi.

Pa'aliyet dawamida, Uyghur ma'arip uyushmisining mu'awin re'isi exmetjan tursun, ömer dönggel oghli we merkizi gérmaniyediki "Milliy görüsh" teshkilatining bash meslihetchisi ramizan uchar ependimlerge Uyghur ma'arip uyushmisi teripidin layihilinip basturulghan sharpa hediye qildi.

Toluq bet