Шветсийидики уйғурлар вә әзәрбәйҗан тәшкилатлири бирликтә паалийәт елип бармақта

Ихтиярий мухбиримиз қутлан
2013-02-28
Елхәт
Пикир
Share
Принт
Хоҗали қирғинчилиқиниң 21 йиллиқи мунасивити билән әзәрбәйҗан вә уйғур тәшкилатлири бирликтә намайиш өткүзди. 2013-Йил 23-феврал, шветсийә.
Хоҗали қирғинчилиқиниң 21 йиллиқи мунасивити билән әзәрбәйҗан вә уйғур тәшкилатлири бирликтә намайиш өткүзди. 2013-Йил 23-феврал, шветсийә.
RFA/Qutlan

Йеқинқи йиллардин буян, шималий явропадики дөләтләрдә, болупму шветсийидә паалийәт елип бериватқан уйғур тәшкилатлириниң муһаҗирәттики әзәрбәйҗан топлуқлири билән болған қоюқ алақилири вә миллий һәмкарлиқи йилдин-йилға күчәймәктә.

Қериндаш әзәрбәйҗан хәлқиниң, болупму иранниң контроллуқида туруватқан җәнубий әзәрбәйҗан хәлқиниң нөвәттики иҗтимаий реаллиқи уларни өз келәчики үчүн күришиватқан муһаҗирәттики уйғур җамаәтчилики билән йеқинлаштурмақта.

Өткән һәптидин буян шветсийидики қериндаш әзәрбәйҗан топлуқлири вә аммиви тәшкилатлириниң паалийәтлири җанлиниш вәзийитини бәрпа қилған. 1992-Йилидики әзәрбәйҗан билән әрминийә оттурисидики тоқунушта, әрмән армийиси тәрипидин әзәрбәйҗанниң хоҗали вә қарабағ вилайәтлиридә йүргүзүлгән қанлиқ қирғинчилиқ хатириләнгән. Хоҗали қирғинчилиқиниң 21 йиллиқи мунасивити билән стокһолмдики әзәрбәйҗан вә түрк бирликлири, шветсийә-әзәрбәйҗан достлуқ гурупписи һәмдә шветсийә уйғур маарип уюшмиси қатарлиқ тәшкилатлар бирликтә стокһолмда намайиш уюштурған. 26-Феврал кәчқурун стокһолмда әзәрбәйҗан федиратсийониниң тәшкиллиши билән йиғин чақирилған. Йиғинда әзәрбәйҗан парламентидин вәкил болуп кәлгән икки нәпәр парламент әзаси буниңдин 21-йил бурунқи хоҗали қирғинчилиқи тоғрилиқ йиғин қатнашчилириға баянат бәргән.

Мәзкур йиғинға қатнашқан шветсийә уйғур маарип уюшмисиниң мәсуллиридин әхмәтҗан турсун әпәнди сөз қилип, уйғур хәлқиниң әзәрбәйҗанлар билән қериндаш хәлқ болуш сүпити билән хоҗали қирғинчилиқида һаятидин айрилған вә ханивәйран болған әзәрбәйҗан хәлқигә чоңқур һесдашлиқ қилидиғанлиқини билдүргән. Шуниң билән биргә уйғур хәлқиниңму хитай даирилири тәрипидин йүргүзүлгән миллий зулум ичидә яшаватқанлиқини баян қилип өткән. Ахирида у әзәрбәйҗан парламент әзалиридин 2009-йили «5-июл үрүмчи қирғинчилиқи» йүз бәргәндә әзәрбәйҗан һөкүмитиниң немә үчүн һечқандақ инкас қайтурмиғанлиқи һәмдә бу қәтлиамға қаттиқ наразилиқи билдүргән түркийини ялғуз қалдурғанлиқиниң сәвәбини чүшәндүрүп беришни тәләп қилған. Әпсус, әзәрбәйҗан парламентиниң вәкиллири бу соалға җаваб берәлмигән һәмдә йиғин қатнашчилири алдида ениқ ипадә билдүрүштин өзини тартқан. Әмма йиғиндин кейин уйғур вәкилләр билән өткүзгән шәхсий сөһбәттә өзлириниң диндаш вә қериндаш хәлқ болуш сүпити билән уйғурларға чоңқур һесдашлиқ қилидиғанлиқини билдүргән.

Биз бу һәқтә тәпсилий мәлумат елиш үчүн әхмәтҗан турсун әпәнди билән сөһбәт елип бардуқ.

Тәпсилатини аваз улинишидин аңлиғайсиз.

Пикирләр (0)
Share
Толуқ бәт