D u q rehberliri "Jenwe kishilik hoquq we démokratiye aliy yighini" da Uyghur weziyitini tonushturdi

Ixtiyariy muxbirimiz ekrem
2018-02-20
Élxet
Pikir
Share
Print

20-Féwral küni "10-Nöwetlik jenwe kishilik hoquq we démokratiye aliy yighini" shwétsariyening jenwe shehiride bashlan'ghan.

D u q re'isi dolqun eysa we qurultayning b d t diki wekili kerim sherif ependilerning bügün jenwedin bergen melumatigha asaslan'ghanda, yighinni 25 xelq'araliq teshkilat birlikte uyushturghan bolup, yighin'gha besh qit'ediki 150 din artuq dölettin 500 etrapida kishi qatnashqan. Bu, birleshken döletler teshkilati kishilik hoquq kéngishining yilliq yighinliridin biri hésablinidu.

D u q re'isining bildürüshiche, "10-Nöwetlik jenwe kishilik hoquq we démokratiye aliy yighini" ning meqsiti, dunyadiki kishilik hoquq mesilisini muhakime qilish, herqaysi döletlerdiki kishilik hoquq kürishi seweblik ziyankeshliklerge uchrighanlarni xatirilesh we ularni qutuldurushning chariliri üstide izdinish, kishilik hoquq yolida küresh qilip töhpe yaratqanlarni mukapatlash qatarliq keng mezmunlarni öz ichige alghan.

Dolqun eysa ependining yighin heqqide bergen uchurlirigha qarighanda, bu qétimqi yighin jeryanida ularning dunya Uyghur qurultiyigha wakaliten, köpligen döletlerdin kelgen wekillerge Uyghurlarning nöwettiki weziyitidin melumat bérish pursetliri tughulghan.

D u q ning b d t diki wekili kerim sherif ependimu ziyaritimizni qobul qilip, bu qétimqi yighin jeryanida Uyghurlarning hazirqi weziyitige a'it aldin hazirlan'ghan matériyallarni yighin ehlige tarqatqanliqini hemde yighin jeryanida shwétsariyening sabiq prézidénti ruth dreyfus xanim bilenmu uchriship, Uyghurlar heqqide söhbet élip barghanliqini tekitlidi.

Yighin jeryanida yene, dunyaning herqaysi jayliridiki kishilik hoquqliri depsende qilin'ghan, türmilerge bend qilin'ghan kishilik hoquq pa'aliyetchilirining terjimihali tonushturulghan resim körgezmisi ötküzüsh pa'aliyitimu qoshumche élip bérilghan. Dolqun eysa ependi bu xususta toxtalghanda, xitay türmisidiki ilham toxti qatarliq 4 neper Uyghur tutqunning süretlirining bu yighin zaligha ésilip, kishilerning diqqitini jelp qilghanliqini eskertti.

Yighin dawamida d u q re'isi dolqun eysa ependi bezi döletlerning wekilliri we b d t ning kishilik hoquq sahesidiki xizmetchiliri bilen uchriship, Uyghur élining nöwettiki weziyitidin melumat bérish pa'aliyetliri bilenmu shughullan'ghan.

Dolqun eysa ependining éytishiche, "10-Nöwetlik jenwe kishilik hoquq we démokratiye aliy yighini" gha dunya Uyghur qurultiyini öz ichige alghan halda, tom lantos fondi, xelq'ara kishilik hoquq fondi, xelq'ara libérallar partiyesi, b d t ni közitish teshkilati, erkinlik programmisi, chégrasiz kishilik hoquq teshkilati, puqralar küchi teshkilati qatarliq 25 teshkilat sahibxaniliq qilghan.

Toluq bet