Yéngisarda burunqi ayaligha uzun könglek kiydürgen wahap tursun 10 yilliq késilgen

Muxbirimiz shöhret hoshur
2017-11-03
Élxet
Pikir
Share
Print
Xitayning térror we diniy ashqunluqqa zerbe bérish herikitidin körünüsh.
Xitayning térror we diniy ashqunluqqa zerbe bérish herikitidin körünüsh.
CCTV

Yéngisarning egüs yézisida 67 yashliq tursun memetning oghlini haraqtin tosqanliqi üchün 10 yilliq késilgenliki ashkarilan'ghan idi. Muxbirimizning ilgirilep ehwal éniqlishi dawamida, tursun memetning 3‏-oghli wahap tursunning burunqi ayaligha uzun könglek kiydürgenliki üchün dadisidin kéyin uningmu 10 yilliq késilgenliki ashkarilandi.

Biz 67 yashliq tursun memetning oghlini haraqtin tosqanliqi üchün 10 yilliq késilgenlik weqesini éniqlishimiz dawamida, ahalilerdin biri, tursun memetning 3‏-oghli wahap tursunningmu 10 yilliq késilgenliki, bu jazagha wahap tursunning burunqi ayaligha uzun könglek kiydürgenlikining seweb bolghanliqini bayan qildi.

Özini ashkarilashni xalimighan bu ahalining bayan qilishiche, 40 yashqa yéqinlashqan wahap tursun, nöwette jaza mudditini aqsudiki bir jaza lagérida ötimekte. Biz bu uchurning toghriliqini delillesh üchün awwal saqchi we kent amanliq mudirlirigha téléfon qilduq. Ular bu heqte pikir bayan qilalmaydighanliqini bildürüshti.

67 Yashliq tursun memetning jorisi, mehbus wahap tursunning anisi, wahap tursunning ayaligha uzun könglek kiydürgenliki üchün késilgenlikini tilgha aldi. Melum bolushiche, wahap tursun 10 yilning aldida nurnisa séyit isimlik bir ayal bilen toy qilghan we ikki yildin kéyin ajrashqan. Ular er‏-ayal bolghan mezgilide wahap tursun ayaligha uzun könglek kiyishini teshebbus qilghan. Ahalilerning pash qilishiche, nurnisa séyit wahap tursun bilen ajriship ketkendin kéyin bashqa biri bilen toy qilghan we qeshqerge köchüp ketken. 

Éniqlashlirimizdin wahap tursunning nurnisa siyitqa uzun könglek kiydürgenliki üchün "Diniy esebiylik" bilen eyiplen'genliki éniq, emma uzun könglek kiygenliki üchün nurnisa siyitning özining béshigha néme künler kelgenliki melum emes؛ yene éniqlashlirimiz dawamida nurnisa séyitning dadisi siyit eysaningmu türmide ikenliki ashkarilandi. 

Yerlik da'iriler yéqinda "Diniy esebiylikning alamiti" süpitide qisqa ishtan kiygenlerni közitiwatqanliqini ashkarilighan. Emdilikte 10 yilliq qamaq jazasigha seweb bolghan uzun könglek zadi qandaq reng yaki sheklidiki könglek ikenliki hazirche melum emes. 

Uyghur rayonida bu yil dawam qiliwatqan "Qattiq zerbe" dolqunining yéngisarda téximu keng-kölemlik we shiddetlik dawam qiliwatqanliqi bir anglighuchimiz teripidin inkas qilin'ghan idi. Éniqlashliri dawamida yéngisarda dostigha yaghliq artishni tewsiye qilghan 21 yashliq hörnisa nasirningmu 10 yilliq késilgenliki delillen'gen idi.

Toluq bet