Хитай сақчилири хотән ханериқта топлишип тәкбир ейтип маңған җамаәткә оқ чиқарған

Мухбиримиз шөһрәт һошур
2013-06-28
Елхәт
Пикир
Share
Принт
Хотәндики җамаәт
Хотәндики җамаәт
AFP


Бүгүн хитай мәркизи теливизийәси хотәндә йәнә һуҗум қилиш вәқәси йүз бәргәнликини вә вәқәниң тинҗитилғанлиқини хәвәр қилди. Әмма вәқәниң тәпсилати һәққидә һечқандақ мәлумат бәрмиди. Мухбиримиз бүгүн хотәндики сақчи вә аһалиләргә телефон қилиш арқилиқ вәқә һәққидә бир қисим мәлуматларға еришти.

Мәлум болушичә, бүгүн  ханериқниң 8 ‏-кәнтидики мәсчитниң бир түркүм  җамаити 8 ‏-кәнттин 7 ‏-кәнткә қарап мотосекилитлар билән қатарлишип йолға чиққан вә йол үстидә тәкбир ейтип маңған. Кәйпияттин гуманланған хитай сақчилири уларниң арқисидин назарәт қилип маңған. Мотосекилитлиқ җамаәт 2 километирчә маңғандин кейин хитай сақчилири намәлум бир сәвәб билән җамаәткә қаритип чиқарған. Оққа тутушта аз дегән икки киши өлгән вә бир киши яриланған. Төвәндә мухбиримиз шөһрәт һошурниң бу һәқтә игилигән мәлуматлирини аңлайсиләр.

Мухбир: сиз навағ сақчиханиниң муавин башлиқи ғәйрәтму?
Хадим: шундақ, мән шу.
Мухбир: бүгүн вәқә йүз бәргән йәр силәрниң тәвәликтиму әмәсму?
Хадим: яқ, ханериқ сақчиханиниң тәвәликидә.
Мухбир: бихәтәрлик тәдбирлирини қандақрақ елип бериватисизләр?
Хадим: асаслиқ сақчиханини мудапиә қилип турдуқ.
Мухбир: вәқәдә җәмий қанчә киши өлди?
Хадим: буни наһийилик сақчиханидин сораң.

****************
Мухбир: ханериқ сақчиханиму?
Хадим: шундақ.
Мухбир: вәзийәт қандақрақ?
Хадим: мән шу мудапиә қалпиқимни кийип нөвәттә туруватимән, кәлгән телефонларни еливатимән, чазида тутулғанларни тизимлап соҗаңға йоллаватимән.
Мухбир: вәқәдә қанчә киши өлди?
Хадим: бая зидавйүән балиларни йиғип йиғин ечип бүгүнки ишларни мәлум қилған һәм бу һәқтә учурларни бизниң рухситимизсиз бәрмәңлар дегән.
Мухбир: вәқә саәт нәччидә йүз бәрди?
Хадим: җүмәдин кейин саәт 2дә.
Мухбир: вәқә қәйәрдә йүз бәрди?
Хадим: нәқ мәйданға мән бармидим, билмәймән.
Мухбир: нөвәттә турған адәмму вәқәниң җәрянини билмәмду?
Хадим: һазир һәммә адәм бәк алдираш, сақчилар кириду-чиқиду, кийим йәңгүшләйду, тапанчилириға оқ толуқлайду, алдираш, шуңа вәқәниң тәпсилатини уқмидим.

**************
Мухбир: соҗаң мәмтимин мәтқасимму?
Хадим: һә, мән шу.
Мухбир: ханериқта йүз бәргән бүгүнки вәқәниң баш-ахирини дәп бәрсиңиз?
Хадим: мән һазир адәм тутқили кетип баримән, сәл туруп дәп берәй.
Мухбир: вәқәдә қанчә адәм өлди, шуни дәп бериң?
Хадим: яқ буларни дәп берәлмәймән.

********************
Мухбир: бу ханериқтики бир аилиму?
Аһалә: шундақ, ханериқ.
Мухбир: бүгүн ханериқта йүз бәргән қандақ вәқә?
Аһалә: 2-3 адәм өләпту, дәп аңлидуқ.
Мухбир: қандақ болуп өлүпту?
Аһалә: һәрбийләр оқ чиқирип өлтүрүпту дәп аңлидуқ. Кишиләр « вәқә йеңи йолда йүз бәрсә, кона йолдикиләрни етивәтти» дейишиватқан.
Мухбир: вәқә зади немә вәқәкән, қандақ келип чиқипту?
Аһалә: мәсчиттин қайтқанларниң иши охшайду. Өткән җүмәму вәқә йүз бәргән у мәсчиттә.
Мухбир: өткән җүмәки немә вәқә икән?
Аһалә: сақчилар мәсчитни қоршивалған, мәсчитниң дәрвазисиға қулуп селип сиртқа чиқмайсән дегәндин кейин, мәсчиттикиләр, сақчиларни бөсүп чиқип кәткән. Бүгүнкисиму шу иш билән четишлиқ болса керәк.
Мухбир: өткән җүмә сақчиларниң мәсчитни қоршивелиши немә сәвәбтинкән?
Аһалә: мәсчитниң имами һүкүмәт  дә дегәнни демигән ишкән.
Мухбир: сақчилар гумандарларға қаритип оқ чиқарған гәпмикән яки қарисиға оқ чиқарғанму?
Аһалә: кишиләр кона йолда  4-5 кишиниң қанға милинип ятқанлиқини көрүпту, путиға икки пай оқ тәккән киши бир қоли йоқ мейип киши икән.
************
Мухбир: вәқә һәққидә җәмийәттә немә гәпләр бар?
Аһалә:  8 ‏-дадуйдики мәсчиттикиләр намаздин кейин 7 ‏-дадуйгә қарап  « аллаһуәкбәр» дәп товлап меңипту, ,мотосекилитлар билән, сақчилар кәйнигә чүшүпту, улар  2 километирчә маңғандин кейин сақчилар оқ чиқирипту.
Мухбир: улар мотосекилитлар билән 7 ‏-дадуй тәрәпкә қарап маңғанда немә мәқсәт билән меңипту, бирсини йоқлиғилиму, яки топлишип бир ишқа наразилиқ билдүргилиму?
Аһалә: уни уқмидим. Бу бәк җиддий бир ишкән, һәммизни секритар өйдин талаға чиқмаңлар деди, өйдин чиқмай олтурдуқ.

Һөрмәтлик радио аңлиғучилар, юқириқи мәлуматлардин қариғанда, ханериқтики бир мәсчит җамаити билән ханериқтики хитай сақчилири арисида йеқинда бир ихтилап пәйда болған вә шуниңдин кейин сақчилар мәзкур җамаәткә қарита контроллуқни күчәйткән, нәтиҗидә бүгүнки қанлиқ вәқә келип чиққан. Вәқәдә сақчилар топлишип өйлиригә  қайтқан яки топлишип наразилиқ билдүрүшкә маңған җамаәткә оқ чиқарған. Оққа тутушта аз дегәндә икки киши өлгән вә бир киши яриланған. Бүгүн хитайчә б б с ниң хотән ханериқтин игилигән мәлуматлиридин қариғанда, ханериқтики бир түркүм яшлар иттипақ мәйданиға топлинип, мәлум бир нәрсигә от йеқип көйдүргән. Нәтиҗидә сақчилар билән яшлар арисида тоқунуш келип чиққан.

Пикирләр (0)
Share
Толуқ бәт