14 яшлиқ яридар дохтурханидин қамақханиға елип кетилди

2009-Йили 5-июл вәқәси мәзгилидә үрүмчидә хитайниң дөләт бихәтәрлики мәнпәити билән уйғурниң һаят бихәтәрлики мәнпәити бир-бири билән җиддий һалда тоқунушқан.
Мухбиримиз шөһрәт һошур
2013-01-29
Елхәт
Пикир
Share
Принт
Үрүмчи наразилиқ намайишини бастуруш үчүн үрүмчигә киргән қораллиқ әскәрләр. 2011-Йили июл.
Үрүмчи наразилиқ намайишини бастуруш үчүн үрүмчигә киргән қораллиқ әскәрләр. 2011-Йили июл.
RFA

Путиға оқ тәккән 14 яшлиқ бир бала кариватта һошсиз ятмақта; икки гуруппа кишиләр униң бешида өз-ара ғәвғалашмақта; бир гуруппа дохтур вә сестралар, улар яридарниң җенини қутқузуш үчүн һәрикәт қилмақта; йәнә бир гуруппа болса сақчи вә кадирлар, улар яридарниң җинайитини сүрүштә қилиш үчүн уни дохтурханидин дәрһал ачиқип кетишкә урунмақта. Бир гуруппиниң учисида ақ халат, йәнә гуруппиниң үстидә хитайниң сақчи формиси, бир тәрәпниң қолида дор,-окул, йәнә бир тәрәпниң қолида қорал-ярақ. Тәбиий һалда қораллиқлар, ақ халатлиқларниң үстидин ғалип кәлди. 14 яшлиқ яридар, дохтурларниң қолидин юлуп ачиқип кетилди.

5-Июл мәзгилидә, ечинишлиқ сәһниләрдин бири, үрүмчидики миллий шипаханида йүз бәргән. Шипаханиға шу күни таң атқичә келидиған яридарларниң айиғи үзүлмигән; дохтурлар, сестралар яридарларни инчикә давалаш әмәс, қан тохтитишқиму йетишип болалмиған. Дохтур, сестралар, 6-июл күни сәһәрдә яридарларни рәсмий давалашқа өткәндә, миллий шипаханиниң барлиқ бөлүмлири хитай сақчилириниң қоршавиға елинған. Сақчилар яридарларниң һәммини йөткәп кетидиғанлиқини ейтқан, әмма нәгә апиридиғанлиқини ейтмиған. Дохтурлар арида бәзи яридарларниң әһвалиниң еғирлиқини, каривитидин йөткәшкә болмайдиғанлиқини ейтқан. Сақчилар бу агаһландурушқа пәрва қилмиған, әксичә дохтурларға тәһдит салған. Бәзи дохтур, сестралар, өз бимарлириниң йөткилишигә қарши туруп, сақчилар билән тиркәшкән, әмма бимарлирини қоғдап қалалмиған. Сақчилар мәсилиниң дөләт бихәтәрлики мәсилиси икәнликини ейтип, дохтурларни бу ишқа арилашмаслиққа чақирған; нәтиҗидә 5-июл күни миллий шипаханиға әкелингән яридарларниң һәммиси, 6-июл күни хитай сақчилири тәрипидин намәлум бир җайға йөткәп кетилгән. Вәқәдин икки күн кейин, хитай даирилири миллий шипаханиға уқтуруш чүшүрүп, дохтурханиға яридарлар кәлсә, дәрһал сақчиға мәлум қилишини, яридарларни сақчиларға актиплиқ билән тапшурушини тәләп қилған. Дохтурлар өзлириниң инсаний, миллий вә кәспий әхлақиға хилап һәрикәт қилишқа мәҗбурланған.

Шу күни дохтурханидин ачиқип кетилгән яридарлардин бири, 14 яш болуп, униң дохтурханидин йөткилиши дохтурларниң қаттиқ наразилиқиға учриған. Мәлум болушичә, мәсул дохтур, яридар дохтурханидин елип кетилгүчә сақчилар билән тиркәшкән.

Җан талишиватқан яридарни каривитидин елип әкетип сорақ қилиш қандақ бир әһвал? буниң әхлақий вә қануний нуқтидин көрүнүши қандақ? бу соалимизға, америкида яшаватқан сиясий көзәткүчи илшат әпәнди җаваб бәрди.

Илшат әпәнди сөзиниң ахирида, 14 яшлиқ яридарни дохтурханидин мәҗбурий елип кетиш вәқәси вә дохтурларниң тәһдиткә учриши, ялғуз әхлақий вә қануний мәсилә әмәс, әң муһими, хитайниң дөләт бихәтәрлики мәнпәити билән уйғурларниң һаятий бихәтәрлики мәсилисиниң бир-биригә зит икәнликидин ибарәт сиясий бир мәсилә.

Пикирләр (0)
Share
Толуқ бәт