14 Yashliq yaridar doxturxanidin qamaqxanigha élip kétildi

2009-Yili 5-iyul weqesi mezgilide ürümchide xitayning dölet bixeterliki menpe'iti bilen Uyghurning hayat bixeterliki menpe'iti bir-biri bilen jiddiy halda toqunushqan.
Muxbirimiz shöhret hoshur
2013-01-29
Élxet
Pikir
Share
Print
Ürümchi naraziliq namayishini basturush üchün ürümchige kirgen qoralliq eskerler. 2011-Yili iyul.
Ürümchi naraziliq namayishini basturush üchün ürümchige kirgen qoralliq eskerler. 2011-Yili iyul.
RFA

Putigha oq tekken 14 yashliq bir bala kariwatta hoshsiz yatmaqta؛ ikki guruppa kishiler uning béshida öz-ara ghewghalashmaqta؛ bir guruppa doxtur we séstralar, ular yaridarning jénini qutquzush üchün heriket qilmaqta؛ yene bir guruppa bolsa saqchi we kadirlar, ular yaridarning jinayitini sürüshte qilish üchün uni doxturxanidin derhal achiqip kétishke urunmaqta. Bir guruppining uchisida aq xalat, yene guruppining üstide xitayning saqchi formisi, bir terepning qolida dor,-okul, yene bir terepning qolida qoral-yaraq. Tebi'iy halda qoralliqlar, aq xalatliqlarning üstidin ghalip keldi. 14 Yashliq yaridar, doxturlarning qolidin yulup achiqip kétildi.

5-Iyul mezgilide, échinishliq sehnilerdin biri, ürümchidiki milliy shipaxanida yüz bergen. Shipaxanigha shu küni tang atqiche kélidighan yaridarlarning ayighi üzülmigen؛ doxturlar, séstralar yaridarlarni inchike dawalash emes, qan toxtitishqimu yétiship bolalmighan. Doxtur, séstralar, 6-iyul küni seherde yaridarlarni resmiy dawalashqa ötkende, milliy shipaxanining barliq bölümliri xitay saqchilirining qorshawigha élin'ghan. Saqchilar yaridarlarning hemmini yötkep kétidighanliqini éytqan, emma nege apiridighanliqini éytmighan. Doxturlar arida bezi yaridarlarning ehwalining éghirliqini, kariwitidin yötkeshke bolmaydighanliqini éytqan. Saqchilar bu agahlandurushqa perwa qilmighan, eksiche doxturlargha tehdit salghan. Bezi doxtur, séstralar, öz bimarlirining yötkilishige qarshi turup, saqchilar bilen tirkeshken, emma bimarlirini qoghdap qalalmighan. Saqchilar mesilining dölet bixeterliki mesilisi ikenlikini éytip, doxturlarni bu ishqa arilashmasliqqa chaqirghan؛ netijide 5-iyul küni milliy shipaxanigha ekélin'gen yaridarlarning hemmisi, 6-iyul küni xitay saqchiliri teripidin namelum bir jaygha yötkep kétilgen. Weqedin ikki kün kéyin, xitay da'iriliri milliy shipaxanigha uqturush chüshürüp, doxturxanigha yaridarlar kelse, derhal saqchigha melum qilishini, yaridarlarni saqchilargha aktipliq bilen tapshurushini telep qilghan. Doxturlar özlirining insaniy, milliy we kespiy exlaqigha xilap heriket qilishqa mejburlan'ghan.

Shu küni doxturxanidin achiqip kétilgen yaridarlardin biri, 14 yash bolup, uning doxturxanidin yötkilishi doxturlarning qattiq naraziliqigha uchrighan. Melum bolushiche, mes'ul doxtur, yaridar doxturxanidin élip kétilgüche saqchilar bilen tirkeshken.

Jan talishiwatqan yaridarni kariwitidin élip ekétip soraq qilish qandaq bir ehwal? buning exlaqiy we qanuniy nuqtidin körünüshi qandaq? bu so'alimizgha, amérikida yashawatqan siyasiy közetküchi ilshat ependi jawab berdi.

Ilshat ependi sözining axirida, 14 yashliq yaridarni doxturxanidin mejburiy élip kétish weqesi we doxturlarning tehditke uchrishi, yalghuz exlaqiy we qanuniy mesile emes, eng muhimi, xitayning dölet bixeterliki menpe'iti bilen Uyghurlarning hayatiy bixeterliki mesilisining bir-birige zit ikenlikidin ibaret siyasiy bir mesile.

Toluq bet