Koriyede échilghan "Asiya-tinch okyan erkinlik yighini" da Uyghur mesilisi anglitildi

Muxbirimiz méhriban
2019-11-07
Élxet
Pikir
Share
Print
Dunya Uyghur qurultiyining yaponiyediki wekili ilham mexmut ependi jenubiy koréyening 22-nöwetlik sabiq bash ministiri ro jaybong ependi bilen birge. 2019-Yili 7-noyabir. Sé'ol, koréye.
Dunya Uyghur qurultiyining yaponiyediki wekili ilham mexmut ependi jenubiy koréyening 22-nöwetlik sabiq bash ministiri ro jaybong ependi bilen birge. 2019-Yili 7-noyabir. Sé'ol, koréye.
Photo: RFA

Dunya Uyghur qurultiyining yaponiyediki wekili, yaponiye Uyghur jemiyitining re'isi ilham mexmut ependi 7-noyabir küni radiyomiz ziyaritini qobul qilip, 7-noyabirdin 9-noyabirghiche koriye paytexti sé'olda échiliwatqan "Asiya-tinch okyan erkinlik yighini" heqqide melumat berdi.

Melum bolushiche, "Asiya-tinch okyan erkinlik yighini" jenubiy koriyening 22-nöwetlik sabiq bash ministéri ro jaybong (1990-yilidin 1991-yilghiche wezipide olturghan) teripidin qurulghan "Asiya-tinch okyan erkinlik herkiti" jem'iyiti teripidin uyushturulghan iken. Bu mezkur jem'iyet qurulghandin buyan chaqirilghan 4-nöwetlik xelq'araliq yighin iken.

Ilham mexmut ependining bildürüshiche, bu nöwetlik yighin'gha koriye, teywen, xongkong, yaponiye qatarliq dölet we rayonlardiki teshkilatlar hem pa'aliyetchiler doklat bérishke teklip qilin'ghan. Yighinda nuqtiliq halda xitayning asiya-tinch okyan rayonidiki döletler we xelqlerge élip kelgen tehditliri bash téma qilin'ghan. 

Yighinda xongkongluqlarning démokratiye telep qilish herkiti, teywenning xitayning tehditige uchrishi, shimaliy we jenubiy koriyening hazirgha qeder birlikke kélelmeslik mesilisi hemde xitayning Uyghur qatarliq xelqlerge qaratqan étnik basturushi qatarliq bir qatar mesilililer heqqide mexsus doklatlar orunlashturulghan. 

Ilham mexmut ependi özining 7-noyabir küni Uyghurlarning omumiy weziyiti toghrisida tonushturush xaraktérliq doklat bergenlikini, 8-noyabir küni mexsus Uyghur weziyiti heqqide ayrim doklat béridighanliqini bildürdi.

Ilham mexmut ependining ilgiri sürüshiche, u 7-nobirdiki doklatida nöwette Uyghur diyarida 2 milyondin 3 milyon'gha qeder Uyghur, qazaq qatarliq yerlik xeqlerning "Qayta terbiyilesh" namidiki jaza lagérliri we türmilerge qamalghanliqini bayan qilghan. U doklatida lagérdin qoyup bérilgen Uyghurlarning xitay shirketliri teripidin lagér ichi yaki lagér yénigha qurulghan zawut-fabrikilarda erzan emgek küchi qilip ishlitiliwatqanliqi, lagér sirtidiki Uyghurlarning bolsa qattiq nazaret astigha élinip, ularning tili, medeniyiti we diniy étiqadining cheklen'genlikini, rayonning üsti ochuq türmige aylandurulghanliqini emeliy misallar bilen chüshendürüp ötken. 

Ilham mexmut ependining bildürüshiche, uning 7-noyabir küni Uyghurlarning omumiy weziyiti heqqide bergen doklatigha qarita mezkur yighinni teshkilligen "Asiya-tinch okyan erkinlik herkiti" jem'iyiti we uning ezalirining inkasi xéli küchlük bolghan. Bolupmu mezkur jem'iyetning qurghuchisi, yeni koriyening 22-nöwetlik sabiq bash ministéri, koriye uniwérsitétining proféssori ro jaybong ependi yaxshi inkas qayturghan. Yighindin kéyin u ilham mexmut bilen ayrim körüshüp, Uyghur mesilisini koriyeliklerge tonushturush, bolupmu siyasiy sahesidikilerge téximu keng tonushturushning muhimliqini we bu mesilide özining tirishchanliq körsitidighanliqini bildürgen.

Pikirler (0)
Share
Toluq bet