Тонулған сәнәткар мәрһум күрәш күсән тәвәллутиниң 60-йиллиқи хатириләнди

Ихтиярий мухбиримиз әркин тарим
2019-09-10
Елхәт
Пикир
Share
Принт
Тонулған сәнәткар мәрһум күрәш күсән тәвәллутиниң 60-йиллиқи хатириләш мурасимида уйғур өсмүр декламатсийә қилмақта. 2019-Йили 6-сентәбир, истанбул.
Тонулған сәнәткар мәрһум күрәш күсән тәвәллутиниң 60-йиллиқи хатириләш мурасимида уйғур өсмүр декламатсийә қилмақта. 2019-Йили 6-сентәбир, истанбул.
RFA/Erkin Tarim

Бу йил атақлиқ музикант вә нахшичи мәрһум күрәш күсән туғулғанлиқиға 60 йил болған хатирә йилидур. Бу мунасивәт билән 9-айниң 6-күни истанбул фатиһ султан мәһмәт университетиниң залида «тонулған сәнәтчи, шаир, композитор күрәш күсәнниң тәвәллутиниң 60 йиллиқини хатириләш» паалийити өткүзүлди. Мәзкур хатириләш паалийитигә дуня уйғур қурултийи муавин рәиси пәрһат муһәммиди әпәнди, уйғур академийәсиниң рәһбәрлири, америка, канада, явропа дөләтлири, қазақистан вә түркийәниң һәрқайси җайлиридин кәлгән уйғурлардин болуп көп санда киши иштирак қилди. Мәрһум күрәш күсәнниң аяли бәхтигүл, икки пәрзәнти вә сиңлиси алаһидә тәклип бойичә қатнашти.

Йиғинниң күн тәртипигә бойичә истанбулдики таңнури тәлим тәрбийә мәктипи оқуғучилири «шәрқий түркистанниң истиқлал маршини» оқуди.

Хатириләш йиғининиң ечилиш нутқини мәрһум күрәш күсәнни хатириләш паалийитини уюштурған уйғур академийәси рәиси профессор доктор алимҗан инайәт әпәнди, тәклимакан уйғур нәшрияти мудири абдуҗелил туран әпәнди вә дуня уйғур язғучилар җәмийити мәсуллиридин абдушүкүр муһәммәт әпәнди сөзлиди.

Кейин таңнури тәлим тәрбийә мәктипи оқуғучиси шүкран қасим күрәш күсәнниң «атландуқ» дегән нахшисини орундап бәрди. Арқидин америка аләм қатнаш идариси оптика инженери доктор әркин сидиқ әпәнди, австралийәдин кәлгән уйғур зиялийси мәмәтимин әла әпәнди, японийәдин кәлгән һаҗи қутлуқ қадири әпәнди қатарлиқлар сөзләп, мәрһум сәнәтчи күрәш күсәнгә юқири баһа бәрди.

Тонулған сәнәтчи, шаир вә композитор мәрһум күрәш күсәнниң тәвәллутиниң 60 йиллиқини хатириләш йиғининиң ечилиш нутқини профессор доктор алимҗан инайәт әпәнди сөзлиди. У, сөзидә күрәш күсәнниң пидакар, җәсур нахшилири вә шеирлири билән күрәш қилған қәһриман икәнликини баян қилди.

Йиғинниң күнтәртипи бойичә күрәш күсәнниң аяли бәхтигүл ханим йолдиши күрәш күсәнниң уйғур дияри вә чәтәлдики һаятини уйғурларниң әркинликигә атиған әл оғлани икәнликини баян қилди.

Күрәш күсәнниң чәтәлгә чиққандин кейин миллий азадлиқ һәрикитигә қатнишип сиясий һаятини башлиғандин буян иҗад қилған «истиқлал марши», «ур америка» һәмдә «рабийә қадир» қатарлиқ иҗадий нахшилирида миллий туйғу, лирикилиқ аһаң һәмдә җәсур сиясий исянкар роһ җипсилашқан аҗайип өзгичә бир мелодийә шәкилләнгән. У явропа әллиридә көп қетим консерт берип, уйғур сәнитини тонуштурған. Униң аяли бәхтигүл ханим хатириләш йиғинида сөзлигән сөзидә күрәш күсән ишләткән барлиқ чалғу әсваблири вә аваз материяллириниң шиветсийә дөләтлик музейиға қоюлғанлиқини баян қилди.

Истанбулда өткүзүлгән мәрһум күрәш күсәнни хатириләш йиғинида дуняниң һәр қайси җайлиридин кәлгән кәсипдашлири арқа-арқидин сәһнигә чиқип, униң билән болған әслимилирини сөзлигәндин сирт униң һаятиға юқири баһа бәрди. Йиғин ахирида йиғин әһлигә күрәш күсәнниң һаят кәчүрмишлири баян қилинған «күрәш өлмәйду» намлиқ китаб тарқитип берилди. Биз китаб һәққидә техиму тәпсилий мәлумат игиләш үчүн мәзкур китабниң аптори абдушүкүр муһәммәт әпәндигә микрофонимизни узаттуқ. У, «күрәш өлмәйду» намлиқ китабиниң истанбулдики тәклимакан уйғур нәшрияти тәрипидин нәшр қилинғанлиқини вә китабта мәрһум күрәш күсәнниң 1959-йили кучада туғулуп 2006-йили шиветсийәдә вапат болғучә болған вақиттики һаятиниң тәсвирләнгәнликини ейтти.

Күрәш күсән уйғур дияри ичи вә сиртидики уйғурлар арисида кәң тонулған сәнәткар болуп, у шиветсийәгә барғандин кейин, нахшилири вә сиясий паалийәтлири арқилиқ уйғурларни тонутуш билән қалмай «ғәрб шамили» намида журнал чиқарғаниди.

Пикирләр (0)
Share
Толуқ бәт