Мәрһум күрәш күсән туғулғанлиқиға 60 йил толғанда

Мухбиримиз қутлан
2019-08-14
Елхәт
Пикир
Share
Принт
Мәрһум күрәш көсән әпәндиниң мәқбәриси.
Мәрһум күрәш көсән әпәндиниң мәқбәриси.
Photo: RFA

Күрәш күсән заманимиздики от йүрәк сәнәткар, уйғур миллий һәрикитидики көзгә көрүнгән паалийәтчи вә скандинавийә әллиридә уйғур тәшкилатлириниң қурулуши һәм раваҗлиниши үчүн асас салған шәхсләрниң биридур.

У 2006-йили 47 йешида бу дунядин кәтти. Худди шаир адил туниязниң «қәшқәрдики йәр шари» намлиқ дастанидики «ят тупраққа көмүлгәндә сән, көмүлиду қәлбиңгә вәтән» дегән мисралирида ейтилғинидәк, күрәш күсәнниң җисми ят тупраққа көмүлгән болсиму, әмма отлуқ қәлби вәтинигә көмүлди. 

У һаят вақтида йирақтики вәтини һәққидә аҗайип ялқунлуқ хитабларни вә җәңгивар күйләрни яңратқан иди.

Шундақ, мәрһумниң җисми бу дунядин кәткән болсиму, әмма униң исми билән қоюлған күрәш ирадиси һелиһәм униң ялқунлуқ мисралирида, вәтән ишқида урулған дутарлириниң тарлирида яңримақта. 

Мәрһумниң вапатидин кейинки шунчә узун йилларда униң қалдурған излири вә отлуқ нидалири тарим ойманлиқидин явропа қирғақлириғичә болған узақ йәрләрдә яңрап турди. Худди у өзиниң «күрәш өлмәйду» дегән нахшисида ейтқинидәк, «күрәш өлмиди һәм өлмәйду! . . .» 

2006-Йили 10-айниң 30-күни мәрһум күрәш күсән 47 йешида шиветсийәдә қаза қилғанда униң аяли бәхтигүл радиомиз зияритини қобул қилип, мәрһумниң һаят вақтида нурғун арзу-арманлириниң барлиқини, туюқсиз кәлгән әҗәлниң уни вақитсиз у дуняға елип кәткәнликини, уйғур хәлқи йеқин кәлгүсидә униң йоқлуқидин шәкилләнгән бир бошлуқни һаман һес қилидиғанлиқини билдүргән иди.

Мәрһумниң өлүмидин кейин униң йоқлуқи муһаҗирәттики уйғур җамаити арисида, болупму шиветсийәдики уйғурлар арисида рәсмий билинди. Күрәш күсән һаят вақтида униң билән биллә күрәш қилған мәсләкдашлиридин шиветсийә уйғур комитетиниң сабиқ рәиси маһинур һәсәнова радиомиз зияритини қобул қилип, мәрһумни чоңқур сеғинғанлиқини, униң қисқиғинә өмридә қалдурған шунчә көп мәниви мираслириниң муһаҗирәттики уйғур җамаитини күрәшкә, бирликкә вә кәлгүсигә болған үмидкә йетәкләп кәлгәнликини билдүрди. 

Мәрһум күрәш өзиниң «шеһитлар өлмәйду» намлиқ нахшисида вәтини, миллити вә һөрлүки үчүн җанлирини пида қилған шеһитларниң җисми өлсиму, әмма роһиниң әл қәлбидә мәңгү өлмәйдиғанлиқини тәкитләп өткән иди.

Толуқ бәт