Мисирдин қайтқан 7 ашпәз «террорлуқ» җинайити артилип 10 йиллиқтин юқири кесиветилгән

Мухбиримиз шөһрәт һошур
2019-07-15
Елхәт
Пикир
Share
Принт
Мисирдики әсләм ашханисиниң хизмәтчилиридин абдузайир.
Мисирдики әсләм ашханисиниң хизмәтчилиридин абдузайир.
RFA/Shöhret Hoshur

Сабиқ мәһбус мәмәттурсун османниң хотәндә қамақханида көргән вә аңлиғанлириға асасән баян қилишичә, униң билән мисирдики әсләм уйғур ашханисида ишлигән 7 киши, юртиға қайтқандин кейин бир җинайәтчиләр гуруһи дәп қарилинип 10 йиллиқтин юқири охшимиған муддәттә кесиветилгән. Мәмәттурсун бу 7 ашпәзниң хотән ханериқниң бир кәнтидики кишиләр икәнликини баян қилғаниди.

Мухбиримизниң телефонини қобул қилған ханериқ йезисидики бир кәнт хадими мисирдин қайтип кәлгәндин кейин кесиветилгән кишиләрниң ханериқ 10-кәнт, йәни төвән ханериқ кәнтиниң кишилири икәнликини дәлиллиди.

Илгири мисирда 6 ай ашпәзлик қилғанлиқи үчүн хотәндә 1 йилдин артуқ қамақханида ятқан сабиқ мәһбус мәмәттурсун осман, мисирда өзи билән бир ашханида йәни әсләм ашханисида ишлигән 7 ашпәзниң 2016 ‏-йили юртиға қайтқандин кейин, 2017‏-йилниң оттура-ахирлири 10 йиллиқтин юқири кесиветилгәнликини ашкарилиди. Униң дейишичә, мисирдики әсләм ашханисиниң хизмәтчилиридин абдузайир вә абдуваҗид 20 йиллиқтин, қаһар 18 йиллиқ, абдуварис, әнәс абдусаламлар 15 йиллиқтин кесилгән. Ашханиға ишлириға ярдәмләшкән 70 яшлиқ абдусалам дегән кишиму 12 йиллиқ кесилгән.

Мәмәттурсунниң дейишичә, булар еғир қейин-қистақниң нәтиҗисидә өзлири садир қилмиған қилмишни бойниға елишқа, йәни «мисирға ашпәзлик үчүн кәлгән әмәс, бөлгүнчилик вә террорлуқ үчүн пурсәт издәп кәлгән» дәп иқрарнамә йезишқа мәҗбур болған. Һәтта бәзилири мисирдин вәзипә билән қайта кәлгәнлики һәққидә иқрарнамә язған.

Илгири мисирда оқуған бирәйләнниң баян қилишичә, әсләм ашханиси мисирдики 6-7 уйғур ашханисидин бири йәни нисбәтән тонулғини болуп, мисирдики уйғурларға қарита тутқун башланғанда, әң аввал мана мушу ашханиға печәт селинған вә тутқун мана мушу ашханидин башланған.

Мәмәттурсун осман әслидә бу ашпәзләрниңму өзигә охшашла тирикчилик койидики кишиләр икәнликини, әмма сорақчилар, җинайәтчиләр гуруһини паш қилса, мукапати катта болидиғанлиқи үчүн әсләм ашханисидики бу йәттә ашпәзни бир-биригә четип җинайәтчиләр гуруһи қилип дело турғузғанлиқини илгири сүрди.

Мәлум болушичә бу йәттә ашпәз хотәнниң ханериқ йеза, төвән ханериқ кәнтидиндур. Телефонимизни қобул қилған ханериқ йезилиқ һөкүмәт хадимлири мисирдин қайтқан бу 7 ашпәзниң қанчә йиллиқтин кесилгәнлики һәққидики соалимизға җавабән, бу һәқтә наһийәлик һөкүмәттин җаваб елишимизни тәвсийә қилди. Ханериқ кәнт кадирлиридин бири, мисирдин қайтип кесиветилгән ашпәзләрниң ханериқ 10 ‏-кәнт йәни төвән ханериқ кәнтидин икәнликини дәлиллиди.

Һөрмәтлик радио аңлиғучилар, юқирида, мисирдин юртиға қайтқан 7 ашпәзниң җинайәтчиләр гуруһи дәп қарилинип 10 нәччә йиллиқтин кесиветилгәнлики һәққидә аңлитиш бәрдуқ.

Толуқ бәт