Хенәндики түрмә даирилири уйғур районидин йөткәп келингән мәһбусларниң барлиқини инкар қилмиди

Мухбиримиз шөһрәт һошур
2019-07-26
Елхәт
Пикир
Share
Принт
Сим тикән билән чөридәлгән лагер дәрвазисидики хитай дөләт байриқи. 2019-Йили 4-июн, йеңисар.
Сим тикән билән чөридәлгән лагер дәрвазисидики хитай дөләт байриқи. 2019-Йили 4-июн, йеңисар.
AFP

Италийәдә чиқидиған «зимистан» тори мушу айниң 21-күни уйғур районидин хитай өлкилиригә йөткәлгән мәһбуслар һәққидә йәнә бир хәвәр бәргән вә бу хәвәрдә 2000 чә уйғурниң хенәндики икки түрмигә орунлаштурулғанлиқи баян қилинған иди. Мухбиримизниң телефонини қобул қилған хенәндики түрмә хадимлири уйғур районидин йөткәп келингән мәһбусларниң барлиқини инкар қилмиди. Өткән айда зияритимизни қобул қилған сабиқ мәһбус мәмәттурсун осман хотәндә қамақтики мәзгилидә камирдиши аблимит абдумеҗитниң 2017‏-йили 5‏-айниң 7‏-күни хенәнгә йөткәлгәнлик һәққидә «кесимнамә» тапшурувалғанлиқини баян қилған иди.

«Бәйду» учур амбирида көрситилишичә, хенәндә 1-, 2-, 3- вә 4-түрмиләрдин башқа йәнә җеңҗу түрмиси, пиңяң түрмиси вә шиняң түрмиси қатарлиқ йәр намлири билән аталған аз дегәндә 14 түрмә бар икән. «Зимистан» ториниң мәзкур хәвиридә уйғур районидин йөткәлгән 2000 миң мәһбусниң хенәндики икки түрмигә орунлаштурулғанлиқи йезилған. Шуңа биз аввал хенән өлкилик түрмә башқуруш идарисигә телефон қилдуқ. Биз улардин уйғур районидин йөткәлгән мәһбусларниң қайси түрмиләргә орунлаштурулғанлиқини сориғинимизда бир мәсул хадим өзиниң бу ишқа алақисиз бир ишханида ишләйдиғанлиқини баян қилип, соаллиримизға җаваб беришни рәт қилди. «Зимистан» ториниң хәвиридә уйғур районидин мәһбус йөткилиштин аввал хенәндә түрмиләрниң қурулмиси вә түзүмлиридә өзгәртиш елип берилғанлиқи, һәтта уйғур районидин кәлгән мәһбусларни қандақ башқуруш һәққидә түрмә хадимлириға қарита «мәхсус тәрбийәләш» елип берилғанлиқи қәйт қилинған. Хенәнниң җеңҗу түрмисидики бир хадим уйғур районидин бу түрмигә йөткәлгән мәһбусларниң омуми санини сориғинимизда у һәқтә түрминиң сиясий бөлүмидин мәлумат елишимизни тәвсийә қилди. Әмма йөткәлгән мәһбусларниң мәвҗутлуқини инкар қилмиди.

Өткән айда сабиқ мәһбус мәмәттурсун осман билән өткүзгән сөһбитимиз давамида у хотәндә қамақтики аблимит абдумиҗит исимлик бир камердишиниң кесилгән вә хенәнгә йөткилидиғанлиқи һәққидә «һөкүмнамә» тапшурувалғанлиқини баян қилған иди. У йәнә камердишиниң шу күни «һөкүмнамә» ни тапшурувелиш җәряниниму тәпсилий баян қилған иди. Биз йәнә хенәндики шиняң түрмисигиму телефон қилдуқ вә униңдин уйғур районидин йөткәлгән мәһбусларниң қайси түрмиләрдә икәнликини сориғинимизда уму охшашла соалимизға җаваб бериштин өзини қачурди. Биз униңдин бу түрмидә уйғур районидин йөткәлгән мәһбуслар һәққидә бир йиғин ечилған яки ечилмиғанлиқини сориғинимизда у бу һәқтиму алақидар ишхана билән көрүшүшимизни тәвсийә қилди.

Сабиқ мәһбус мәмәттурсун османниң баян қилишичә, униң камирдиши аблимит абдумиҗитниң 2017‏-йили 5‏-айниң 7‏-яки 8‏-күнлири йөткәлгән икән. Қамақтики чеғида 15 йилдин юқири кесилгәнләрниң хитай өлкилиригә йөткиливатқанлиқидин хәвәр тапқанлиқини баян қилған мәмәттурсун осман мәһбус йөткәш ишиниң һазир ахбаратта хәвәр қилиниватқандин хели бурун, йәни 2017‏-йилниң бешидила башланғанлиқини илгири сүрди.

Ахирида телефонимизни қобул қилған хенән өлкилик 4‏-түрмә хадими мәзкур түрмидә қанчилик уйғур барлиқини сориғинимизда у мухбирниң кимлики айдиңлашмай туруп бу һәқтә мәлумат берәлмәйдиғанлиқини ейтти. Биз униңдин охшаш соални тәкрар сориғинимизда сориливатқан теминиң «дөләт мәхпийәтлики» икәнликини, шуңа мәлумат берәлмәйдиғанлиқини ейтти. Биз униңдин уйғур районидин мәһбусларниң қачандин башлап йөткәлгәнлики сориғинимизда бу учурниму дейишкә болмайдиған баян қилди.

Пикирләр (0)
Share
Толуқ бәт