«ئانا تىل دەرسلىكى» ناملىق كىتاب تۈركىيەدە نەشردىن چىقتى

ئىختىيارىي مۇخبىرىمىز ئەركىن تارىم
2017-01-30
ئېلخەت
پىكىر
Share
پرىنت
ئۇيغۇر زىيالىيسى ئابدۇۋەلى ئايۇپ ئەپەندى يازغان «ئۇيغۇر ئائىلە مائارىپى قوللانمىلىرى - ئانا تىل دەرسلىكى» ناملىق كىتابنىڭ مۇقاۋىسى
ئۇيغۇر زىيالىيسى ئابدۇۋەلى ئايۇپ ئەپەندى يازغان «ئۇيغۇر ئائىلە مائارىپى قوللانمىلىرى - ئانا تىل دەرسلىكى» ناملىق كىتابنىڭ مۇقاۋىسى
RFA/Erkin Tarim

چەتئەلدىكى ئۇيغۇر نوپۇسىنىڭ كۆپىيىشىگە ئەگىشىپ، چەتئەلدىكى ئۇيغۇرلاردا ئانا تىل ئۆگىنىشكە بولغان قىزىقىشمۇ كۈچەيمەكتە.

ئۇيغۇرلارنىڭ بۇ تەلىپىنى قاندۇرۇش مەقسىتى بىلەن ئانا تىل پائالىيەتچىسى، ئۇيغۇر زىيالىيسى ئابدۇۋەلى ئايۇپ ئەپەندى يازغان «ئۇيغۇر ئائىلە مائارىپى قوللانمىلىرى-ئانا تىل دەرسلىكى» ناملىق ئەسەر ئىستانبۇل تەدبىر نەشرىياتى تەرىپىدىن نەشردىن چىقتى. كىتاب 164 بەتتىن تەركىب تاپقان بولۇپ، ئۇيغۇرچىدىن ساۋاتى چىقمىغان ياكى چالا چىققان 6 ياشتىن 10 ياشقىچە بولغان بالىلارنىڭ ئۇيغۇرچە ئۆگىنىشى ئۈچۈن تەييارلانغان.

كىتاب ھەققىدە زىيارىتىمىزنى قوبۇل قىلغان مەزكۇر كىتابنىڭ تۈزگۈچىسى ئابدۇۋەلى ئايۇپ ئەپەندى، چەتئەلدىكى ئۇيغۇرلارنىڭ جىددىي تەلىپىگە بىنائەن بۇ كىتابنى تۈزۈپ چىققانلىقىنى بايان قىلدى.

ئابدۇۋەلى ئايۇپ ئەپەندى كىتابنىڭ ئۇيغۇرلارغا خاس بالىلار قوشاقلىرى، مەسەل ۋە بالىلار چۆچەكلىرى، ئاپتورنىڭ ئەسەرلىرىدىن تېكىستلەر ۋە مەشىقلەرنى ئۆز ئىچىگە ئالغانلىقىنى ئوتتۇرىغا قويدى.

ئابدۇۋەلى ئايۇپ ئەپەندى «ئانا تىل دەرسلىكى» كىتابىنى پەقەت مەكتەپلەردە ئۇيغۇر تىلى ئۆگىتىش ئۈچۈنلا ئەمەس، بالىلارغا ئائىلىلەردە ئۇيغۇرچە ئۆگىتىشنىمۇ نەزەردە تۇتۇپ، بۇ كىتابنىڭ ئومۇمىي ئىسمىنى«ئائىلە مائارىپى قوللانمىسى» دەپ قويغانلىقىنى ئىلگىرى سۈردى.

مەركىزى مىللەتلەر ئۇنىۋېرسىتېتىنى پۈتتۈرگەندىن كېيىن، ئىستانبۇلدا تەتقىقات ئىشلىرى بىلەن شۇغۇللىنىۋاتقان باتۇر قاراخان ئەپەندى ئابدۇۋەلى ئايۇپ يازغان ۋە بۇندىن كېيىن داۋامى چىقىدىغان «ئائىلە مائارىپى قوللانمىسى-ئانا تىل دەرسلىكى» ناملىق ئەسەرنىڭ بىر بوشلۇقنى تولدۇرغانلىقىنى ئىلگىرى سۈردى.

ئابدۇۋەلى ئايۇپ ئەپەندى ئۇيغۇر دىيارىدا ئانا تىل دەرسلىكى نامىدا كىتابنىڭ بارلىقىنى، ئەمما ئۇنىڭ پەقەتلا ئۇيغۇر بالىلارغا كوممۇنىست ئىدىيەسىنى سىڭدۈرۈش مەقسىتىدە تەييارلانغانلىقىنى، بۇنىڭ بولسا ئىلمىي، بالىلار قوبۇل قىلالايدىغان، ئۇيغۇرلارنىڭ مىللىي ئەنئەنىسىنى سىڭدۈرۈش مەقسىتىدە تەييارلانغانلىقىنى تەكىتلىدى.

تۈركىيەدىكى ھاجىتەپپە ئۇنىۋېرسىتېتىنىڭ  تارىخ ئوقۇتقۇچى، دوكتور ئەركىن ئەكرەم ئەپەندى  ئابدۇۋەلى ئايۇپنىڭ مەزكۇر دەرسلىك كىتابىغا يۇقىرى باھا بېرىپ، بۇ خىلدىكى ئۇيغۇر ئانا تىل  دەرسلىكلىرىنىڭ ۋە ئۇيغۇر تىلى ئوقۇتۇشنىڭ  چەتئەللەردىكى  ئۇيغۇرلارنىڭ مىللىي كىملىكىنى ساقلاپ قېلىشتا مۇھىم ئەھمىيەتكە ئىگە ئىكەنلىكىنى بىلدۈردى.

پىكىرلەر (1)
Share

Risalet

دىن Belgiye

Essalamu eleykum,
Bu ana tili derislikining neshirdin chiqqini meni bek hush qildi.Endi mening demekchi bolghinim shu derislikni peqetla kona yeziqta bolup qalmay ,belki hazirqi yengi yeziqtimu neshir qilinsa ...Chet eldiki Uyghurlar balilirimizni oqutidighan derisliklerning yoq bolushidin qiynilivatqan mezgilde yahshi bolar edi...

Jan 31, 2017 05:01 AM

تولۇق بەت