Türkiye hökümiti: oqush mukapatigha yilda üch qétim iltimas qilishqa bolidu

Ixtiyariy muxbirimiz erkin tarim
2018-01-11
Élxet
Pikir
Share
Print
https://www.turkiyeburslari.gov.tr Tor sehipiside élan qilin'ghan uqturushtin süretke élin'ghan. 2018-Yili 11-yanwar.
https://www.turkiyeburslari.gov.tr Tor sehipiside élan qilin'ghan uqturushtin süretke élin'ghan. 2018-Yili 11-yanwar.
turkiyeburslari.gov.tr

Türkiye bash ministirliqigha qarashliq tashqi türkler we qérindash milletler idarisi türkiyede oqush mukapati élish üchün bundin kéyin yilda üch qétim iltimasi qobul qilidighanliqini uqturdi.

Mezkur idarining https://www.turkiyeburslari.gov.tr Tor sehipiside élan qilin'ghan uqturushqa asaslan'ghanda, bezi döletlerdiki oqu-oqutush mewsumlirining burun axirlishishidek ehwal közde tutulup, türkiye oqush mukapatigha iltimas qilghuchilarni saqlatmasliq üchün, oqush mukapati iltimasi yilda üch qétimgha köpeytilgen.

  1. Qétimliq türkiye oqush mukapati iltimasi 2017-yili 30-öktebirdin 30-noyabirghiche, iltimaslarning netijisini élan qilish waqti bolsa 2018-yili 1-ayning 15-küni iken.
  2. Qétimliq türkiye oqush mukapati iltimas qobul qilish waqti 2018-yili 5-féwraldin 5-martqiche bolup, iltimas netijisi 15-may küni élan qilinidiken.
  3. Qétimliq türkiye oqush mukapati iltimasini qobul qilish waqti, 2018-yili 16-apréldin 14-mayghiche bolup, iltimas netijisi 24-iyul küni élan qilinidiken.


Yuqiridikisi omumiy uqturush bolup, xitay pasportluq Uyghurlarmu iltimas qilsa bolidiken. Uyghur oqughuchilarning magistir we doktorluq üchün oqushqa iltimas qilish waqti ikkinchi qétimliq iltimas waqti bolup, ular bu yil 5 féwraldin 5-martqiche iltimas qilsa bolidiken.

Aliy mekteplerning toluq kursi üchün iltimas waqti 3-qétimliqi bolup, 16-apréldin 14-mayghiche iltimas qilsa bolidiken.

Iltimas qilmaqchi bolghan Uyghur oqughuchi namzatlar yuqirida déyilgen türkiye oqush mukapatigha iltimas qilish bashlan'ghan waqitlarda https://www.turkiyeburslari.gov.tr Tori bétide telep qilin'ghan matériyallarni teyyarlap biwasite iltimas qilsa bolidiken.

Biz igiligen melumatlargha asaslan'ghanda, ötken yili 5-aydin bashlap xitay türkiyede diniy ilimler kespide oquwatqan oqughuchilar bilen misirda oquwatqan oqughuchilarning yurtigha qaytishini telep qilghan, shundaqla pasport bérishnimu toxtatqan. Ular bu yil iltimas qilalamdu? ismini ashkarilashni xalimighan türkiye tashqi türkler we qérindash milletler idarisining bu ishqa mes'ul xadimliridin biri, Uyghurlar iltimas qilsa bolidighanliqini, emma xitaydin pasport élishigha arilashmaydighanliqini bayan qildi.

Istanbuldiki Uyghur akadémiyesining mu'awin re'isi doxtur exmetjan polat ependi türkiye bash ministirliq tarmiqidiki tashqi türkler we qérindash milletler idarisining 2012-yilidin tartip oqush mukapati bériwatqanliqini, u, yili 150 Uyghur oqughuchi qobul qilin'ghan bolsimu, kéyinki yillarda barghanséri aziyip mangghanliqini bayan qilghandin kéyin buning sewebliri heqqide toxtaldi.

Doxtur exmet polat ependi hazir Uyghur diyarining weziyitining éghir ikenlikini, tallan'ghan oqughuchilarning türkiyege kélish éhtimalining töwen ikenlikini, shunga türkiyening bu siyasitidin chet'ellerdiki Uyghurlarning behrimen bolushi kéreklikini bayan qildi.

Merkizi türkiyening istanbul shehiride turushluq Uyghur akadémiyesi 2009-yili qurulghan künidin tartip türkiyede oqushni xalaydighan Uyghurlargha yardem qilip kelmekte. Doxtur exmet polat ependi türkiye oqush mukapat puligha iltimas qilidighan Uyghurlar özliri bilen alaqileshse yol körsitidighanliqini tekitlidi.

Türkiye uzun yillardin béri, bolupmu 1980-yillardin kéyin Uyghurlar eng köp kélip oquwatqan döletlerdin biri hésablinidu. Uyghur diyaridiki Uyghurlarning türkiyege kélip oqush yolining tosulmasliqi üchün néme qilish kérek ?dep sorighinimizda, türkiye istratégiyelik chüshenchiler instituti mutexessisi doktor erkin ekrem ependi öz qarishini bildürdi.

Qimmetlik radi'o anglighuchilar 2017-yilida 163 dölettin 107 ming oqughuchi namzati iltimas sun'ghan bolup, 8500 etrapida namzat uniwérsitétlargha orunlashturulghan. Bularning ichide 40 oqughuchi Uyghur diyaridin kelgen iken.

Pikirler (1)
Share

Sutuq

Din Istabul

Essalamu'eleykum
Bu yil, ewwelen allahning pezli andin qalsa, istabulda oqughuchilargha xizmet qilip kiliwatqan "Sutuq bughraxan ilim we mediniyet weqpi" ning nahayiti jiq küch chiqirish netijiside, esli waqti ötüp ketken bolsimu alahide étiwar qilip misirdin türkiyege kelgen oqughuchilardin 180 oqughuchi bu mukapatqa érishti we hazir ular rahet oquwatidu.
Mezkur weqipke buning üchün we bundin bashqa nechche yüz oqughuchilarnng türlük kesiplerge orunlishishigha sewepchi bolghanliqi hemde ular mekteplerge kirip bolghandin kéyinmu ularning turmush ehwalini hel qilish charisini izdep bash qaturup yol méngiwatqanliqi üchün chin könglimizdin minnetdarmizwe bundin kéyinmu utuqlarni tileymiz. We bashqa qérindashlarni ular bilen hemkarlishishqa chaqirimiz.

Jan 18, 2018 01:06 AM

Toluq bet