Чен чүәнго қатарлиқ хитай әмәлдарлириниң сахта мақалә яқлап илмий унван алғанлиқи паш болмақта

Мухбиримиз меһрибан
2019-02-27
Елхәт
Пикир
Share
Принт
Уйғур аптоном райониниң партком секретари чен чүәнго қораллиқ күчләрни зиярәт қилмақта.
Уйғур аптоном райониниң партком секретари чен чүәнго қораллиқ күчләрни зиярәт қилмақта.
ts.cn

19-Феврал күни бейҗиң кино институтиниң мәктәп торида хитайда тонулған кино артиси чи тйәнлиңниң мәзкур институтта 2018-йиллиқ докторлуқ илмий унвани үчүн яқлиған дисертатсийәсидә сахтилиқ ишләткини үчүн униң илмий унваниниң бикар қилинғанлиқи вә униң устази чен хавниң доктор асперанти тәрбийәләш салаһийитиниң елип ташланғанлиқи елан қилинған.

Мәзкур вәқәдин кейин иҗтимаий таратқулардики муназириләр вә хәлқара таратқуларниң диққити йәнә бир қетим хитай әмәлдарлирида барғанчә әвҗ еливатқан илмий унван сахтилиқиға мәркәзләшти.

Әнглийәдә чиқидиған «малийә вақти гезити» ниң 27-феврал күнидики санида елан қилинған «юқири дәриҗилик хитай әмәлдарлириниң докторлуқ десиртатсийәсидики сахтилиқлар» сәрләвһәлик мақалида хитай рәиси ши җиңпиңни өз ичигә алған нурғунлиған хитай әмәлдарлириниң аталмиш докторлуқ унваниға улар пүтүн күнлүк һөкүмәт хизмити ишләватқан шараит астида еришкәнлики тилға елинған.

Мақалида баян қилинишичә, нөвәттә уйғур аптоном районида парткомниң секретарлиқ вәзиписидә туруватқан чен чүәнго хубей өлкисиниң вухән санаәт университетидин алған иқтисат пәнлиридики доктурлуқ илмий унванини 2004-йили хенән өлкисидә муавин партком секритари болуп пүтүн күнлүк хизмәт қиливатқан шараитта алған икән.

Мақалида чен чүәнгониң докторлуқ десертасийәсидики көчүрүлгән мәзмунлар һәққидә хитайчә иҗтимаий таратқуларда тарқалған учурлар нәқил қилип елинған. Мақалида йәнә чен чүәнгониң 2004-йили елан қилған «оттура җуңгодики әмгәк капиталиниң җуғлиниши билән иқтисадий әрәққиятниң өз-ара мунасивити» намлиқ доктурлуқ десертатсийәсидики 13 праграфниң хитай иҗтимаий пәнләр академийәсидики профессор мо җехоң 2002-йили елан қилған «иқтисадий анализ вә адәм капитали» намлиқ доктурлуқ десиртатсийәси билән пүтүнләй охшаш икәнлики, 65 параграфниң җу җимин исимлик йәнә бирәйләнниң 2002-йили җинән университетида доктурлуқ дисертатсийәси үчүн елан қилған «иқтисадий өсүштә адәм капитали вә униң тәқсим қилиниши» намлиқ мақалидин көчүрүп елинғанлиқи, кириш сөз қисминиң болса тәтқиқатчи ли линниң 2000-йили «хенән сода институти илмий журнили» да елан қилған хитайниң оттура қисмидики бәш өлкисиниң сәкрәтмә шәкиллик иқтисадий тәрәққияти һәққидики мақалисидин көчүрүлгәнлики қәйт қилинған.

Америка кларемонт мәк кенна университетиниң сиясий пәнләр профессори пей миншинниң «малийә вақти гезити» мухбириға билдүрүшичә, 1990-йилдин кейинки хитай компартийәсиниң юқири дәриҗилик әмәлдарлири арисида өзини һәр хил илмий унванлар билән пәрдазлаш долқуни көтүрүлгән икән.

Униң билдүрүшичә, ши җинпиңни өз ичигә алған юқири дәриҗилик хитай әмәлдарлириниң зор көп қисми пүтүн күнлүк һөкүмәт хизмити билән шуғуллиниватқан шараитта докторлуқ унваниға еришкән болуп, уларниң илмий унван үчүн яқлиған десиртатсийәсилириниң әмәлийәттә башқиларниң әмгигидин көчүрүвелинған сахта мақалиләр икәнлики тамамән ениқ икән.

Америка уйғур бирләшмисиниң рәиси елшат һәсән әпәндиниң қаришичә, хитай рәиси ши җинпиң вә уйғур аптоном райониниң партком секретари чен чүәнгоға охшаш юқири дәриҗилик хитай әмәлдарлириниң диплом вә унван сахтилиқи хитай компартийә әмәлдарлиридики омумлашқан кәйпият икән.

Елшат һәсән әпәнди йәнә илгири шихәнзә шәһиридики институтта оқутқучи болған мәзгилидики әһвални әсләп, биңтуәндики башқарма дәриҗилик хитай кадирлириниң икки айлиқ яки бирнәччә һәптилик тәрбийәләш курслириға қатнишиш арқилиқ илмий унван алалайдиған әһваллириға шаһит болғанлиқини билдүрди.

Елшат һәсән әпәнди йәнә ши җиңпиң вә чен чүәнгоға охшаш 2-әвлад хитай коммунист әмәлдарлириниң хитайниң «мәдәнийәт зор инқилабий» дәвриниң мәһсулатлири икәнликини, билим вә илмий әмгәктин йирақ болған бу әмәлдарларниң бу аталмиш докторлуқ унвани билән өзини пәрдазлап, техиму юқири әмәл тутушни мәқсәт қилғанлиқини тәкитлиди.

Хитай һөкүмити тәрипидин үзлүксиз тәқиб астида туруватқан кишилик һоқуқ паалийәтчилиридин шәндуң университетиниң пенсийәгә чиққан профессори сүн венгуваң әпәнди илгири радийомиз хитай бөлүминиң зияритини қобул қилғинида хитай әмәлдарлириниң сахта унванлири һәққидә тохтилип, мундақ дегән иди: «хитайниң юқири дәриҗилик әмәлдарлири өзини пәрдазлаш вә техиму юқири мәртивигә еришиш үчүн һәр хил йоллар арқилиқ даңлиқ университетлардин диплом вә унванларға еришиши хитайда омумлишип кәткән бир әһвал. Хитайдики вәзипә өтәватқан әмәлдарлар алдираш хизмәт қиливатқан шараитларда докторлуқ унвани үчүн оқуши интайин мүшкүл. Әмма улар йәнила һәр хил амалларни тепип чиқип өз мәқситигә йетиду. Бу хитайда тамамән омумлашқан әһвал.»

Пикирләр (0)
Share
Толуқ бәт