Алматада уйғурлар хатириләш паалийити өткүзди

Ихтиярий мухбиримиз ойған
2016-04-06
Елхәт
Пикир
Share
Принт
Шәрқий түркистан җумһурийити миллий армийисиниң 61 йиллиқини, барин вәқәсиниң 26 йиллиқини хатириләш паалийитидә сиясәтшунас қәһриман ғоҗамбәрди сөз қилмақта. 2016-Йили 6-апрел, алмата.
Шәрқий түркистан җумһурийити миллий армийисиниң 61 йиллиқини, барин вәқәсиниң 26 йиллиқини хатириләш паалийитидә сиясәтшунас қәһриман ғоҗамбәрди сөз қилмақта. 2016-Йили 6-апрел, алмата.
RFA/Oyghan

6-Апрелда алмата шәһириниң султанқорған мәһәллисидики «арзум» кафеханисиға җәм болған уйғурлар шәрқий түркистан җумһурийити миллий армийисиниң 71 йиллиқини, барин вәқәсиниң 26 йиллиқини хатирилиди. Алмата шәһири вә наһийәләрдин кәлгән вәкилләр қатнашқан бу мурасимда алди билән азадлиқ вә әркинлик йолида қурбан болғанларға атап қуран оқулди. Андин сөзгә чиққан уйғур яшлиридин бири әркин әхмәтоф шәрқий түркистан җумһурийити миллий армийисиниң тарихи һәққидә доклат оқуди. Мурасимда йеқинда қазақистан җумһурийити бойичә өткән парламент мәҗлиси вә йәрлик мәслиһәтләргә өткән сайламлар һәм уларда уйғурларниң йәткән утуқлири, барин вәқәсиниң уйғур миллий азадлиқ һәрикитидә тутқан орни, хитай вә хитай коммунистик һакимийитиниң бүгүнки әһвали, улардики иқтисадий вә сиясий кризис, рабийә қадир башлиқ дуня уйғур қурултийиниң елип бериватқан паалийәтлири һәққидә сиясәтшунас қәһриман ғоҗамбәрди әтраплиқ мәлумат бәрди.

Мурасимниң үчинчи қисмида мушу йили фирансийә пайтәхти парижда өтидиған дуня уйғурлириниң нөвәттики қурултийи һәм униң тәйярлиқ мәсилилири муһакимә қилинди. Йиғин қатнашқучилири алмата шәһири вә наһийәләрдин вәкилләрни сайлиди вә уларниң тизимини тәстиқлиди. Бу қетимлиқ қурултайниң тәләплири, униң қатнашқучилири алдида турған җавабкарлиқ һәққидә қ. Ғоҗамбәрди өз пикирлирини оттуриға қойди.

Зияритимизни қобул қилған алмата шәһириниң турғуни арупҗан мусайеф мәзкур мурасимда болупму сиясәтшунас қәһриман ғоҗамбәрдиниң барин вәқәси, униң келип-чиқиш сәвәблири һәм ақивәтлири һәққидә бәргән мәлуматиниң көпчиликкә қаттиқ тәсир қилғанлиқини илгири сүрүп, мундақ деди: «һәқиқәтән барин мәсилиси билән көплигән дөләтләр уйғурларни тонуди. Бүгүнки мәҗлисниң йәнә бир әһмийити һазирқи хитайниң әһвали тоғрилиқ қ. Ғоҗамбәрди мәлумат бәрди. Шундақла мушу йили парижда дуняви уйғур қурултийи ечилмақчи. Униңға вәкилләрни сайлаш тоғрилиқ наһайити яхши гәпләр болди. Бүгүнки мәҗлисимиз наһайити көңүллүк, яхши өтти.»

Мурасимда сөзгә чиққан дуня уйғур аяллири бирлики рәисиниң оттура асиядики орунбасари асийәм турдийева, шундақла аруп мусайеф, камил турдийеф, шамахун җумахуноф вә башқилар уйғурларниң өтмүш тарихи вә бүгүнки әһвали тоғрилиқ өткүзүлүватқан мундақ паалийәтләрниң әһмийити, болупму һәр төт йилда чақирилидиған қурултайларниң әһвали, тәләплири һәққидә өз пикир-тәклиплирини бәрди. Шундақла бу паалийәттә сөз алған «инайәт» җәмийәтлик бирләшмисиниң рәиси турғанҗан розахуноф қазақистан уйғурлириниң маарип саһәсидики бәзи җиддий мәсилилирини һәл қилиш бойичә өз пикирлирини илгири сүрди. У яшларға сапалиқ вә юқири дәриҗилик билим беришниң йоллирини тәклип қилди.
Дуня уйғур аяллири бирликиниң қазақистандики әзалириниң бири гүлвәрәм тохтахун қизи мәзкур паалийәттә шәрқий түркистан җумһурийитиниң миллий армийиси тарихи, барин вәқәси, дуня уйғур қурултийиниң бүгүнки күндә елип бериватқан паалийәтлири һәққидә бай мәлуматларға игә болғанлиқини билдүрүп, мундақ деди: «бу йәрдә уйғур хәлқимизгә тәсир қилғудәк яхши сөзләр ейтилди. Ойғиниш үчүн ейтилған бу сөзләр өзини уйғур дәп һесаблиған һәр бир инсанниң йүрикигә йәтсә, дәп үмид қилимән, әлвәттә. Ойғанған йәрдә вәтән сақлиниду. Вәтән бар йәрдә милләт сақлиниду.»

Пикирләр (0)
Share
Толуқ бәт