Almatada Uyghurlar xatirilesh pa'aliyiti ötküzdi

Ixtiyariy muxbirimiz oyghan
2016-04-06
Élxet
Pikir
Share
Print
Sherqiy türkistan jumhuriyiti milliy armiyisining 61 yilliqini, barin weqesining 26 yilliqini xatirilesh pa'aliyitide siyasetshunas qehriman ghojamberdi söz qilmaqta. 2016-Yili 6-aprél, almata.
Sherqiy türkistan jumhuriyiti milliy armiyisining 61 yilliqini, barin weqesining 26 yilliqini xatirilesh pa'aliyitide siyasetshunas qehriman ghojamberdi söz qilmaqta. 2016-Yili 6-aprél, almata.
RFA/Oyghan

6-Aprélda almata shehirining sultanqorghan mehellisidiki "Arzum" kaféxanisigha jem bolghan Uyghurlar sherqiy türkistan jumhuriyiti milliy armiyisining 71 yilliqini, barin weqesining 26 yilliqini xatirilidi. Almata shehiri we nahiyelerdin kelgen wekiller qatnashqan bu murasimda aldi bilen azadliq we erkinlik yolida qurban bolghanlargha atap qur'an oquldi. Andin sözge chiqqan Uyghur yashliridin biri erkin exmetof sherqiy türkistan jumhuriyiti milliy armiyisining tarixi heqqide doklat oqudi. Murasimda yéqinda qazaqistan jumhuriyiti boyiche ötken parlamént mejlisi we yerlik meslihetlerge ötken saylamlar hem ularda Uyghurlarning yetken utuqliri, barin weqesining Uyghur milliy azadliq herikitide tutqan orni, xitay we xitay kommunistik hakimiyitining bügünki ehwali, ulardiki iqtisadiy we siyasiy krizis, rabiye qadir bashliq dunya Uyghur qurultiyining élip bériwatqan pa'aliyetliri heqqide siyasetshunas qehriman ghojamberdi etrapliq melumat berdi.

Murasimning üchinchi qismida mushu yili firansiye paytexti parizhda ötidighan dunya Uyghurlirining nöwettiki qurultiyi hem uning teyyarliq mesililiri muhakime qilindi. Yighin qatnashquchiliri almata shehiri we nahiyelerdin wekillerni saylidi we ularning tizimini testiqlidi. Bu qétimliq qurultayning telepliri, uning qatnashquchiliri aldida turghan jawabkarliq heqqide q. Ghojamberdi öz pikirlirini otturigha qoydi.

Ziyaritimizni qobul qilghan almata shehirining turghuni arupjan musayéf mezkur murasimda bolupmu siyasetshunas qehriman ghojamberdining barin weqesi, uning kélip-chiqish sewebliri hem aqiwetliri heqqide bergen melumatining köpchilikke qattiq tesir qilghanliqini ilgiri sürüp, mundaq dédi: "Heqiqeten barin mesilisi bilen köpligen döletler Uyghurlarni tonudi. Bügünki mejlisning yene bir ehmiyiti hazirqi xitayning ehwali toghriliq q. Ghojamberdi melumat berdi. Shundaqla mushu yili parizhda dunyawi Uyghur qurultiyi échilmaqchi. Uninggha wekillerni saylash toghriliq nahayiti yaxshi gepler boldi. Bügünki mejlisimiz nahayiti köngüllük, yaxshi ötti."

Murasimda sözge chiqqan dunya Uyghur ayalliri birliki re'isining ottura asiyadiki orunbasari asiyem turdiyéwa, shundaqla arup musayéf, kamil turdiyéf, shamaxun jumaxunof we bashqilar Uyghurlarning ötmüsh tarixi we bügünki ehwali toghriliq ötküzülüwatqan mundaq pa'aliyetlerning ehmiyiti, bolupmu her töt yilda chaqirilidighan qurultaylarning ehwali, telepliri heqqide öz pikir-tekliplirini berdi. Shundaqla bu pa'aliyette söz alghan "Inayet" jem'iyetlik birleshmisining re'isi turghanjan rozaxunof qazaqistan Uyghurlirining ma'arip sahesidiki bezi jiddiy mesililirini hel qilish boyiche öz pikirlirini ilgiri sürdi. U yashlargha sapaliq we yuqiri derijilik bilim bérishning yollirini teklip qildi.
Dunya Uyghur ayalliri birlikining qazaqistandiki ezalirining biri gülwerem toxtaxun qizi mezkur pa'aliyette sherqiy türkistan jumhuriyitining milliy armiyisi tarixi, barin weqesi, dunya Uyghur qurultiyining bügünki künde élip bériwatqan pa'aliyetliri heqqide bay melumatlargha ige bolghanliqini bildürüp, mundaq dédi: "Bu yerde Uyghur xelqimizge tesir qilghudek yaxshi sözler éytildi. Oyghinish üchün éytilghan bu sözler özini Uyghur dep hésablighan her bir insanning yürikige yetse, dep ümid qilimen, elwette. Oyghan'ghan yerde weten saqlinidu. Weten bar yerde millet saqlinidu."

Toluq bet