Вирҗинийә уйғур бирлики командиси путбол мусабиқисиниң чемпийони болди

Мухбиримиз ирадә
2017-07-04
Елхәт
Пикир
Share
Принт
Америка қитәсидики уйғурларниң 3-нөвәтлик путбол лоңқисини талишиш достлуқ мусабиқисидин көрүнүш. 2017-Йили 2-июл.
Америка қитәсидики уйғурларниң 3-нөвәтлик путбол лоңқисини талишиш достлуқ мусабиқисидин көрүнүш. 2017-Йили 2-июл.
Photo: RFA

Америка қитәсидики уйғурларниң 3-нөвәтлик путбол лоңқисини талишиш достлуқ мусабиқиси 4-июл күни ғәлибилик аяғлашти. Мусабиқиниң ахирқи күнидә калифорнийә уйғур командиси билән вирҗинийә уйғур бирлики командиси һәл қилғуч мусабиқә ойниди.

Америка қитәсидики уйғурларниң 3-нөвәтлик путбол лоңқисини талишиш достлуқ мусабиқиси 1-июл күни әтигән бостон шәһиридә башланған иди. 4 Күн давам қилған мусабиқә җәрянида вирҗинийәдики уйғур бирлик командиси, тәклимакан командиси, калифорнийә уйғур командиси, бостон-нюйорк бирләшмә командиси вә канада уйғур командиси қатарлиқ 5 команда өз-ара мусабиқиләшкән. Мусабиқилишиш давамида бостон-нюйорк командиси үчүнчиликни қазанғандин кейин, ахирида калифорнийә уйғур командиси билән вирҗинийә уйғур бирлики командиси һәл қилғуч чемпийонлуқ талишиш мусабиқиси ойнаш шәрипини қолға кәлтүргән. Кәскин давам қилған учришиш нәтиҗисидә вирҗинийә штатидин барған уйғур бирлики командиси 1 гә қарши 2 нәтиҗә билән калифорнийә командисини йеңип 3-нөвәтлик путбол лоңқисини талишиш достлуқ мусабиқисиниң чемпийонлуқиға еришкән.

Мусабиқә ахирида мусабиқә мәйданидин зияритимизни қобул қилған вашингтон-вирҗинийә тәклимакан уйғур командисиниң мәсуллиридин җүрәт обул әпәнди зияритимизни қобул қилип, бу қетимлиқ мусабиқиниң күткәндинму мувәппәқийәтлик өткәнликини ейтти.

Бу йиллиқ мусабиқигә вирҗинийә штатидин тәклимакан командисиму қатнашқан болуп, бу уларниң тунҗи қетим мусабиқигә қатнишиши болуп һесаблиниду. Бу командиниң алаһидилики болса, бу команда асасән вирҗинийә штатидики оттура яшлиқлардин тәшкилләнгән болушидур. Җүрәт әпәндиниң ейтишичә, улар гәрчә мусабиқиләрдә яшларға йеңилип қалған болсиму, әмма уларниң роһи яшларға үлгә болған.

Бу қетимлиқ мусабиқиниң саһибхана командиси, йәни бостон-нюйорк уйғур командисиниң тернери учқун ғаппар әпәндиму зияритимизни қобул қилип, бу нөвәтлик мусабиқиниң өзини қаттиқ тәсирләндүргәнликини ейтти.

Учқун әпәнди сөзи давамида, бу мусабиқиниң бир путбол риқабитидин бәк, яшларға миллий роһни вә уюшқақлиқ роһини йетилдүридиған әһмийәтлик бир сорун болғанлиқини билдүрди.

Мәлум болушичә, америка қитәсидики уйғурларниң келәр йиллиқ путбол мусабиқисини келәр йили вирҗинийә штатида өткүзүш пиланланған болуп, вирҗинийә тәклимакан командиси саһибханилиқни өз үстигә алидикән.

Пикирләр (0)
Share
Толуқ бәт