Аратүрктики ат һәмдәпнә қилинған қәдимий қәбриләр немә дәйду?

Мухбиримиз қутлан
2014-10-31
Елхәт
Пикир
Share
Принт
Аратүрк наһийәсиниң қирсай қәдимий қәбристанлиқиға һәмдәпнә қилинған 2300 йиллиқ атларниң искилити
Аратүрк наһийәсиниң қирсай қәдимий қәбристанлиқиға һәмдәпнә қилинған 2300 йиллиқ атларниң искилити
(Мәнбә: тәңритағ тори)

Йеқинда аратүрк наһийәсиниң қирсай кәнтидин ат һәмдәпнә қилинған 2300 йиллиқ тарихқа игә қәдимий қәбриләр байқалған.

Мәлум болушичә, мәзкур қәбриләр қумул вилайитиниң аратүрк наһийәсигә қарашлиқ қирсай кәнтигә 300 метир келидиған даиригә җайлашқан.

Бу йил өктәбирниң башлиридин башлап шинҗаң уйғур аптоном районлуқ мәдәнийәт ядикарлиқлири тәтқиқат орни мәхсус бир археологийәлик қезиш гурупписи тәшкилләп мәзкур қәбриләрни қазған.

Қезиш нәтиҗисидин қариғанда, мәзкур қәбриләргә өз дәвридики әң есил йүгрүк атлар таллинип өлгүчигә қурбанлиқ қилинған вә һәмдәпнә сүпитидә көмүлгән. Қәбриләрдики адәм җәсәтлириниң искилитлири билән униңға һәмдәпнә қилинған атларниң бәдән искилитлири өз пети сақланған. Қазғучилар қәбриләргә һәмдәпнә қилинған атларниң искилитлиридин уларниң өз дәвридики әң күчлүк вә әң сағлам атлар икәнликини пәрәз қилған.

Бу һәқтә зияритимизни қобул қилған германийә гөттенгән университетиниң тәтқиқатчиси, доктор абләт сәмәт бүгүнки аратүрк наһийәсиниң қәдимки заманларда һон, уйғур вә башқа түркий тиллиқ хәлқләр әҗдадлириниң ат мәдәнийити яратқан муһим районлардин бири икәнликини тәкитлиди.

У йәнә өзиниң әйни вақитта қумулға қилған илмий тәкшүрүш сәпиридә аратүрк тағлиридин ат, буға, җәрән қатарлиқ һайванатлар сүрәтлири чүшүрүлгән қия таш рәсимлирини көргәнликини, бу районниң қәдимки һон, уйғур вә түркий хәлқләр паалийәт елип барған бәлбағлардин икәнликини илгири сүрди.

Доктор қаһар барат әпәндиму бу һәқтә зияритимизни қобул қилип, алтай вә тәңритағ етәклириниң қәдимдин буян сисиян, һон, уйғур вә башқа түркий қәбилилириниң ат арқилиқ тарих сәһнисигә чиққан макан болғанлиқини алаһидә тилға алди.

Аратүрктики қирсай қәдимий қәбристанлиқини қезишқа қатнашқан хитай археологи ваң юңчяң мухбирларға баянат берип мундақ дегән: «мәзкур қәбриләрдин қезивелинған һәмдәпнә һайванлар вә буюмлардин қариғанда, у җуңго оттура түзләңликидики қәдимий қәбриләрниң алаһидиликигә йеқинлишиду.» Һалбуки, бу һәқтә пикир баян қилған уйғур билим адәмлири ваң юңчяңниң бу һөкүмини рәт қилиду.

Доктор абләт сәмәт уйғурлар вәтинидин байқалған ат билән бағлиқ болған һәрқандақ бир мәдәнийәтниң шәк-шүбһисизки, бу йәрдики йәрлик хәлқләр билән мунасивәтлик икәнликини тәкитләйду.

Қаһар барат әпәндиму шималий вә мәркизий асиядики қәдимки атлиқлар мәдәнийитиниң һәргизму хваңхе дәряси вадисидики хитай мәдәнийити билән ортақлиққа игә әмәсликини егири сүриду.

Тәпсилатини аваз улиништин аңлиғайсиз.

Пикирләр (0)
Share
Толуқ бәт