Aratürktiki at hemdepne qilin'ghan qedimiy qebriler néme deydu?

Muxbirimiz qutlan
2014-10-31
Élxet
Pikir
Share
Print
Aratürk nahiyesining qirsay qedimiy qebristanliqigha hemdepne qilin'ghan 2300 yilliq atlarning iskiliti
Aratürk nahiyesining qirsay qedimiy qebristanliqigha hemdepne qilin'ghan 2300 yilliq atlarning iskiliti
(Menbe: tengritagh tori)

Yéqinda aratürk nahiyesining qirsay kentidin at hemdepne qilin'ghan 2300 yilliq tarixqa ige qedimiy qebriler bayqalghan.

Melum bolushiche, mezkur qebriler qumul wilayitining aratürk nahiyesige qarashliq qirsay kentige 300 métir kélidighan da'irige jaylashqan.

Bu yil öktebirning bashliridin bashlap shinjang Uyghur aptonom rayonluq medeniyet yadikarliqliri tetqiqat orni mexsus bir arxéologiyelik qézish guruppisi teshkillep mezkur qebrilerni qazghan.

Qézish netijisidin qarighanda, mezkur qebrilerge öz dewridiki eng ésil yügrük atlar tallinip ölgüchige qurbanliq qilin'ghan we hemdepne süpitide kömülgen. Qebrilerdiki adem jesetlirining iskilitliri bilen uninggha hemdepne qilin'ghan atlarning beden iskilitliri öz péti saqlan'ghan. Qazghuchilar qebrilerge hemdepne qilin'ghan atlarning iskilitliridin ularning öz dewridiki eng küchlük we eng saghlam atlar ikenlikini perez qilghan.

Bu heqte ziyaritimizni qobul qilghan gérmaniye göttén'gen uniwérsitétining tetqiqatchisi, doktor ablet semet bügünki aratürk nahiyesining qedimki zamanlarda hon, Uyghur we bashqa türkiy tilliq xelqler ejdadlirining at medeniyiti yaratqan muhim rayonlardin biri ikenlikini tekitlidi.

U yene özining eyni waqitta qumulgha qilghan ilmiy tekshürüsh sepiride aratürk taghliridin at, bugha, jeren qatarliq haywanatlar süretliri chüshürülgen qiya tash resimlirini körgenlikini, bu rayonning qedimki hon, Uyghur we türkiy xelqler pa'aliyet élip barghan belbaghlardin ikenlikini ilgiri sürdi.

Doktor qahar barat ependimu bu heqte ziyaritimizni qobul qilip, altay we tengritagh éteklirining qedimdin buyan sisiyan, hon, Uyghur we bashqa türkiy qebililirining at arqiliq tarix sehnisige chiqqan makan bolghanliqini alahide tilgha aldi.

Aratürktiki qirsay qedimiy qebristanliqini qézishqa qatnashqan xitay arxéologi wang yungchyang muxbirlargha bayanat bérip mundaq dégen: "Mezkur qebrilerdin qéziwélin'ghan hemdepne haywanlar we buyumlardin qarighanda, u junggo ottura tüzlenglikidiki qedimiy qebrilerning alahidilikige yéqinlishidu." halbuki, bu heqte pikir bayan qilghan Uyghur bilim ademliri wang yungchyangning bu hökümini ret qilidu.

Doktor ablet semet Uyghurlar wetinidin bayqalghan at bilen baghliq bolghan herqandaq bir medeniyetning shek-shübhisizki, bu yerdiki yerlik xelqler bilen munasiwetlik ikenlikini tekitleydu.

Qahar barat ependimu shimaliy we merkiziy asiyadiki qedimki atliqlar medeniyitining hergizmu xwangxé deryasi wadisidiki xitay medeniyiti bilen ortaqliqqa ige emeslikini égiri süridu.

Tepsilatini awaz ulinishtin anglighaysiz.

Toluq bet