Gherb dunyasidiki Uyghurlar (6B)

Muxbirimiz qutlan
2016-06-30
Élxet
Pikir
Share
Print

Ikkinchi qisim: muweppeqiyet üchün töligen bedeller

Yawropadiki Uyghur muhajir topluqliri ichidin yétiship chiqqan bir qisim bilim ademliri özlirining kespiy sahediki ajayip tirishchanliqi we qaytmas iradisi bilen muhajirettiki Uyghurlar hayatining eng güzel sehipilirini yaratti.

Shiwétsiye paytexti sitokholmdiki karoliniska institutining sélishturma dorigerlik bölümide méditsina tetqiqati bilen shughulliniwatqan doktor hawaxan raxman özining uzun mezgillik kespiy izdinish hayatini esliginide chongqur iptixarliq hés qilidu.

U 1979-yili shinjang tébbiy institutigha oqushqa kirgendin buyan hazirghiche tébbiy sahede 37 yilliq oqush we izdinish jeryanini béshidin ötküzidu. 35 Yashqa kirgende tébbiy penler boyiche mastérliq oqushini tamamlap, dawamliq ilgirileydu. U 40 yashqa yéqinlashqanda daniyening arxus uniwérsitétida doktorluq oqushini bashlaydu. 2001-Yilidin étibaren taki bügünki kün'ge qeder shimaliy yawropadiki daniye, shiwétsiye, norwégiye qatarliq döletlerning méditsina sahesidiki eng dangliq uniwérsitétlirida tetqiqatini dawamlashturidu. U kespiy sahediki herqandaq bir insanda eger öz kespige bolghan ottek muhebbet bilen tinimsiz tirishchanliq bolghinida yetkili bolmaydighan nishanning bolmaydighanliqigha qattiq ishinidu.

Özi yaxshi körgen kespi üchün bedel tölesh, öz kespi saheside tinimsiz izdinish, yérim yolda hergizmu waz kechmeslik abdurehimjan ghénining muweppeqiyetke érishishidiki özige xas prinsipidur.

Nöwette gollandiyediki bir xelq'araliq chong shirkette tupraq analizchisi bolup ishlewatqan abduréhimjan öz kespiy saheside oqush we xizmet tépish jeryanida muhajirettiki nurghun kishilerge oxshashla ümidsizlen'gen, ganggirighan chaghlirining bolghanliqini, emma hergizmu ümidsizlik ichige gherq bolup ketmigenlikini, belki téximu zor chidam bilen aldigha qarap mangghanliqini alahide tekitleydu.

Gheyret we chidam shundaqla öz tallishigha ishinish axirqi hésabta abdurehimjanning kélechekke bolghan ümid shamini parlitidu. Nurghun qétimliq meghlubiyettin yiqilip qopqan, öz nishanidin esla waz kechmigen abduréhimjan aldinqi yili gollandiyediki bir chong shirkettin yüzturane körüshüshke chaqiritilidu.

Dégendek, uzun yilliq japaliq izdinishning netijisi körülidu. Muhajiret hayatida duch kélidighan barliq issiq-soghuqlarning hemmisini tétip körgen, emma eng qiyin peytlerdimu öz nishanidin waz kechmigen abdurehimjan 2015-yilining dékabir éyida gollandiyediki mezkur xelq'araliq shirkette tupraq analizchisi süpitide ish bashlaydu.

Shinjang tébbiy uniwérsitétni püttürüp qaramaydiki bir doxturxanida börek késellikliri doxturi bolup ishligen aman'gül qasim muhajirettiki riqabetke tolghan hayatta öz kespini dawamlashturushtin ibaret bu chüshtin hergizmu waz kechmeydu.

U bu yolda yillarche tirishchanliq körsitip, méditsina kespige eng qattiq telep qoyulidighan shiwétsiyede axiri bu dölettiki eng aliy méditsina orni bolghan karoliniska institutigha xizmetke kirip, börek késellikliri doxturi bolidu.

Gérmaniyening myunxén shehiridiki "Tengritagh" Uyghur réstoranining ayal xojayini gülnar xanim gérmaniyediki Uyghur jama'itining ishlirida eng aktip rol oynawatqan ayallirining biri.

U özining gérmaniyediki hayat musapisini esliginide her xil qazanlarda qaynap, musapirettiki köpligen kishilerge oxshashla intayin mol hayat tejribisige érishkenlikini ilgiri süridu.

Gülnar xanim özining gérmaniyege deslep kelgen yillirida öz kespi bolghan boghaltirliq saheside oqughanliqini, oqush püttürgendin kéyin xizmet izdep yüzlerche urun'ghan iltimas yazghanliqini, eng axirida bir férmida ma'ashsiz praktika qilish usuli arqiliq shu shirkettin ish tapqanliqidek tejribisini anglarmenler diqqitige sundi.

(Dawami bar)

Toluq bet