Вәтинигә қайтқан роһ: мәрһум күрәш көсәнниң йиғмилири шиветсийә музика архипида (2)

Мухбиримиз қутлан
2016-11-01
Елхәт
Пикир
Share
Принт
Мәрһум күрәш көсән әпәндиниң мәқбәриси.
Мәрһум күрәш көсән әпәндиниң мәқбәриси.
Photo: RFA

Мәрһум күрәш көсән вапатиниң 10 йиллиқ хатирисидә униң күрәш роһиға бай һаяти замандашлириниң әслимилиридә яд етилгән болса, униң бир өмүр топлиған хусусий йиғмилири шиветсийә дөләтлик музика архипида сифирлаштурулуп, зиярәтчиләрниң һузуриға сунулди.

Униң бүгүн шиветсийәдә яшаватқан бир туғқан сиңлиси мунәввәр султан ханим бу мунасивәт билән радийомиз зияритини қобул қилип, акисиниң өмүр дәптиридин хатирә тәқдим қилди.

Мунәввәр ханимниң әслишичә, акиси күрәш султан «көсән» дегән бу тәхәллусни 1987-йилидин башлап рәсмий қолланған болуп, 1988-йили үрүмчидики сәнәт институтини пүттүрүш мурасимиға беғишлап «көсән симфонийәси» намлиқ даңлиқ музикисини иҗад қилған икән.

Мәрһум күрәш көсәнниң сәбдашлиридин бүгүн германийәдә яшаватқан аблимит турсун әпәнди униң «күрәш өлмәйду» намлиқ өлмәс нахшиси һәққидә тохтилип, «бу нахша күрәш көсәнниң күрәш қайнимиға толған һаяти вә униң әркинлик йолидики мәңгү өлмәс күрәш роһиға беғишланған хас әсәрдур,» дәп көрсәтти.

Аблимит турсун йәнә мәрһум күрәш көсән һаят вақтидила өзиниң сәнәт таланти арқилиқ шиветсийә музика саһәсидикиләрниң диққитини чәккәнликини, униң хусусий йиғмилириниң бүгүн шиветсийә архип вә музейлиридин орун елишиниң хушаллинарлиқ бир иш икәнликини тәкитлиди.

Күрәш көсәнниң сәпдиши вә аилә туғқанлиридин абдушүкүр муһәммәт әпәндиму радийомиз зияритини қобул қилип, мәрһумниң хусусий йиғмилириниң қандақ бир җәрян билән шиветсийә дөләтлик музика архипидин орун алғанлиқини баян қилди.

Патрик хәлзон - шиветсийә музика архипиниң һавалиси билән мәрһум күрәш көсәнниң хусусий йиғмилирини каталоглаштурған вә униң сифирлиқ архипини ишләп чиққан яш шивет уйғуршунаслиридин бири. У бу һәқтә радийомиз зияритини қобул қилип, шиветсийә музика архипида мәхсус орун аҗритилған күрәш көсән йиғмилириниң немиләрни өз ичигә алидиғанлиқини тонуштуруп өтти.

Абдушүкүр муһәммәт әпәнди ахирида шиветсийә музика архипидики күрәш көсән йиғмилириниң даириси һәққидә учур берип, бу йиғминиң шималий явропадики уйғур җамаитиниң җәмийәт тарихини билиштә интайин муһим мәнбә болуп қалидиғанлиқини илгири сүрди.

Пикирләр (0)
Share
Толуқ бәт